ESAIA 21:2 - Jinghpaw Hanson Version Bible

² Hkrithpa shingran ngai mu nngai; myit magaw ai wa gaw, magaw ai hku galaw nga ai, jahten shabyak ai wa gaw jahten shabyak nga ai; Elam masha ni e, lung wa mu; Medi masha ni e, wang tawn mu: dai mare a majaw madai ai lam yawng, ngai jasim kau we ai.

Jinghpaw Common Language Bible 2009

² Ngai gaw mazut byin masa ni a shingran, gumle gumlau ai hte jahten shabyak ai shingran ni hpe mu se ai. Elam hpyen luksuk e, htim gasat mu! Medi hpyen luksuk e, mare ni hpe wang tawn mu! Karai Kasang gaw Babelon mung e shabyin nu ai nni nkri hpe jahtum kau na ra ai.

ESAIA 21:2 ပူးပေါင်းရင်းမြစ်များ

NINGPAWT NINGHPANG 10:22

Shem a shadang sha ni gaw, Elam, Ashura, Arhpaza, Luda, Aram hte rai ma ai.

2 HKAWHKAM 17:6

Hoshea hkaw dung ai jahku ning hta e, Asuri hkawhkam gaw Samari mare hpe lu la nna, Israela masha ni hpe Asuri mung de bawng rim wa ai hte, shanhte hpe Hala shara e, Gozan hka makau na Habora ginwang hte, Mede masha ni a mare ni hta nga shangun mu ai.

SHAKAWN KUNGDAWN 119:158

Hkalem sha ai ni na a mungga hpe n hkan nang ai majaw, Ngai shanhte hpe mu mada nna, myit yu machyi nga nngai.

SHAKAWN KUNGDAWN 12:5

“Ru tsang hkrum ai ni a ru tsang ai hte, Matsan mayan ni a sharung shayawt ai a majaw, Ya ngai rawt wa na nngai rai nna, Ba galawp ai wa hpe shingbyi shara hta tawn da na nngai,” nga nna Yehowa tsun ai.

SHAKAWN KUNGDAWN 25:3

Rai sa, nang hpe myit mada ai ni nlang, kaya kahpa n hkrum lu ma ai. Myit magaw ai ni mahtang, kaya kahpa hkrum na mara ai.

SHAKAWN KUNGDAWN 60:3

Na a amyu hpe ru tsang nang jahkrum nna, Nang ai tsabyi anhte hpe jaw shalu mi ai.

SHAKAWN KUNGDAWN 79:11

Bawng dung ai ni a madai ai gaw nang kaw hkrang shang u ga: Na a galu kaba ai lahpum hte, si ang ai ma ni hpe bau sin u.

GA SHAGAWP 13:15

Nyan kaja rawng ai wa gaw, myi man pa nga ai; Shut hpyit ai ni a lam chyawm gaw, yak htum ai lam rai nga ai.

ESAIA 11:11

Dai aten e, Madu gaw, lahkawng lang ngu na, shi a lata bai ladawn nna, naw ngam nga ai, shi a amyu masha ni hpe, Asuri mung, Egutu mung, Pahtru mung, Hkusha mung, Elam mung, Shina mung, Hamat mung hte nammukdara zunlawng ni hta na, mawai la na ra ai.

ESAIA 14:4

nang gaw Babelon hkawhkam hpe sha-ang let, ndai ga shagawp ning nga tsun na ndai: Adip arip re ai wa gaw htum mat sahka! Ja mare gaw nyawp mat sahka!

ESAIA 14:7

Mungkan ting ban sa ngwipyaw nga ai; mung masha ni nlaw mahkawn ma ai.

ESAIA 22:6

Elam amyu gaw pala ndum hte hpawn, hpyen leng ni hte gumra jawn ai ni hpe shangun nna, Kira amyu gaw n-gang shapraw dan wu ai.

ESAIA 24:16

Dinghpring ai wa gaw hpung shingkang rawng u ga, nga ai mahkawn ga, lamu ga htum ai maga de na anhte na lu ga ai. Ngai chyawm gaw, Matsan nngai, matsan nngai; ngai hta dingnye nga u ga; myit magaw ai ni gaw, myit magaw ai lam galaw ma ai; gaja wa, myit magaw ai wa gaw myit magaw ai lam grai galaw sai.

ESAIA 33:1

Jahten shabyak shabyin timung, jahten shabyak garai n hkrum ai, hkalem ai hku galaw timung, hkalem kau ai garai n hkrum ai wa e, nang dingnye lu ndai. Nang jahten shabyak shabyin ngut jang, nang nan jahten shabyak ai hkrum na rin dai; nang hkalem kau ai shatup ngut jang, shanhte gaw nang hpe hkalem kau na mara ai.

ESAIA 35:10

Yehowa majaw hkye hkrang la hkrum ai ni gaw nhtang wa nna, mahkawn mangoi let Ziun bum de du na mara ai: shanhte a baw ntsa e htani htana kabu gara gup na ra ai: shanhte awng sharawng let kabu gara nga nna, yawn hkyen ai hte madai ai gaw sim mat na ra ai.

ESAIA 47:6

Ngai gaw nye a amyu hpe pawt kahtet nna, nye a sali wunli hpe jahpoi kau ai hte, na a lata hta shanhte hpe ap kau nngai: nang chyawm gaw shanhte hpe matsan n dum nna, prat kaba ni a ntsa e pyi, li ai kandang mara da nu ai.

YEREMIA 31:20

Ehprim gaw ngai tsawra ai kasha, n rai ni? grai tsawra ai ma, n rai ni? shi hpe daru shagu grai wa naw dum nga nngai; dai re ai majaw, ngai shi a matu myit ndawt nga nngai; gaja wa ngai shi hpe matsan dum na nngai, nga nna Yehowa tsun ai.

YEREMIA 31:25

Hki ba hkrum ai myit masin hpe ngai jahkru shakat nngai; yawn hkyen hkrum ai ni yawng hpe, ngai shalan shabran nngai.

YEREMIA 45:3

nang mahtang, Ngai dingnye lu nngai; Yehowa ngai gawng run ai hta yawn hkyen ai kahtap ya ni ai; ngai gaw yawn madai ai hte hki ba la nngai; ban sa n hkrum nngai, nga ndai.

YEREMIA 49:34

Yuda hkawhkam Zedekia hkaw dung hpang ai aten e, Elam mung hpe lakap nna, myihtoi Yeremia kaw du ai Yehowa a ga gaw da ndai rai nga ai:

YEREMIA 49:35

“Zaw nawng zaw wa up ai Yehowa ning nga ai, Elam a ndan ngu ai, shi a n-gun atsam daju hpe ngai agrawp kau na nngai.

YEREMIA 50:14

Ndan gap ai ni e, Babelon mare grup wang tawn mu; shi gaw Yehowa hpe shut ai majaw, gap sat mu, pala n lahpawt ai gap mu.

YEREMIA 50:34

Rai timung shanhte hpe Hkye hkrang la ai wa gaw, n-gun lagaw rawng ai wa rai nga ai; shi a mying Zaw nawng zaw wa up ai Yehowa rai nga ai: shi gaw gaja wa shanhte a amu hpe maga let, mungkan ting hpe asan apan di shangun nna, Babelon mare masha ni hpe sharu shatsang na ra ai.

YEREMIA 51:11

Pala ni hpe garang mu; n-gang ni hpe la lang mu: Yehowa gaw Medi hkawhkam ni a myit hpe jasu nu ai; shi gaw Babelon mare hpe shamyit kau na maw nga ai; dai gaw Yehowa a matai dawp ai lam, shi a nawku Htingnu a matai htang ai lam, rai nga ai.

YEREMIA 51:44

Babelon mare na Bela hpara hpe ngai dawdan na nngai; shi mayu kau ai hpe, bai nhpat shangun na nngai; masha amyu ni htawm hpang e shi kaw hpawng lu na n rai: gaja wa, Babelon a bunghku run mat na ra ai.

YEREMIA 51:53

Babelon gaw sumsing lamu de dep nna, shi a tsaw htum ai shara hpe hpyen dap shatai timung, shi hpe jahten shabyak ai ni gaw, ngai kaw na pru na mara ai, nga nna Yehowa tsun ai.

SHARUNG SHAYAWT 1:22

Shanhte a yubak mahkra hpe nang sawk yu u: Ngai grai wa madai nna gawng kya nga n ngai majaw, ngai tawt lai ai a jaw e, nang ngai hpe di ai zawn, shanhte hpe mung di mu.

Daniela 5:28

Peresa, ngu ai gaw, na a mungdan hpe karan kau nna Medi hte Persi masha ni hpe ap kau nu ai, nga ai, rai nga ai,” ngu nna hkawhkam wa hpe tsun dan wu ai.

Daniela 5:9

Dai rai nna hkawhkam Belashaza gaw nachying myit ung ang nga nna, shi a myi man sum wa ai hte, shi a du salang ni myit law nga ma ai.

Daniela 8:2

Ngai mu ai shingran gaw da ndai rai nga ai; ngai hkum nan Elam mungdaw na Shushan htingnu hta e rai nga nna, shingran mu yang gaw, Ulai hka kau e rai nga nngai.

Daniela 8:20

Nang mu ai, nrung lahkawng tu ai sagu la gaw, Medi hte Persi hkawhkam rai nga ai.

SHINGRAN 13:10

Masha wa hpe sharen ai wa gaw, sharen da ai hkrum na ra ai; nhtu hte sat ga ai wa mung, nhtu hte si na ra ai. Ndai lam hta chyoi pra ai ni a shakut sharang shara hte makam masham lam dan pru nga ai.

1 SAMUELA 24:13

Moi na ni a ga malai gaw, ‘N hkru ai ni kaw na n hkru ai sha pru chye ai,’ nga ai ga wa teng timung, nye a lata gaw nang kaw n shadu n ga.