2 SAMUELA 5:3 - Jinghpaw Hanson Version Bible

³ Shing rai Israela agyi salang ni yawng, Hebron mare de hkawhkam wa kaw du sa ma ai: Dawi hkawhkam mung, dai Hebron mare hta Yehowa a man e shanhte hte ga shaka tawn da wu ai rai nna, shanhte mung Dawi hpe namman chya ya ai hte Israela hkawhkam aya dang mu ai.

Jinghpaw Common Language Bible 2009

³ Dai rai nna Israela ningbaw ni yawng gaw Hebron mare e nga ai Hkawhkam Dawi hpang de du sa ma ai. Shi mung shanhte hte chyoi pra ga shaka galaw nna jinghku hku tawn wu ai; shanhte gaw shi hpe namman jaw ya nhtawm shi mung Israela a hkawhkam tai wa nu ai.

2 SAMUELA 5:3 ပူးပေါင်းရင်းမြစ်များ

2 SAMUELA 2:4

Shaloi Yuda amyu masha ni sa nhtawm, Dawi hpe namman jaw let, Yuda amyu hta hkawhkam aya dang mu ai. Ya, Gilead mung na Yabesha mare masha ni, Shawlu hpe makoi mayang kau sai lam Dawi hpe sa tsun shana mu ai.

2 SAMUELA 2:7

Ya chyawm gaw n-gun da ting nna, nden shaja nga ai nanhte a madu Shawlu si mat sai; Yuda amyu masha ni ngai hpe namman jaw nna ngai e shanhte a ntsa e hkawhkam aya dang mani ai,” ngu nna hkang dat mu ai.

2 SAMUELA 3:21

Bai Abna gaw Dawi hpe, Israela masha ni yawng, nang hte ga shaka shangang lu na matu mung, nang madu myit hte tup up sha nga lu na matu mung ngai rawt sa wa nna, dai ni mahkra hpe nye madu nang hkawhkam wa kaw woi jahpawng na nngai ngu wu ai. Dawi mung Abna hpe dat dat nna, shi gaw ngwipyaw ai hte sa wa ai.

1 HKAWHKAM 1:34

dai shara hta e hkinjawng Zadok yan myihtoi Nahtan gaw, shi hpe Israela hkawhkam shatai na matu, namman chya ya mu ga: pahke dum let, hkawhkam Shawlumon gaw ahkrung nga u ga law,” ngu nna tsun mu;

2 HKAWHKAM 11:17

Dai hta kaga Yehoiada gaw, hkawhkam wa hte mung masha ni gaw, Yehowa a masha tai mu ga nga, Yehowa hte ga shaka tawn da shagun mu ai; bai, hkawhkam wa hte mung masha ni hpe mung, ga shaka tawn da shagun mu ai.

1 HKAWHKAM LABAU 11:1

Shaloi Israela masha ni yawng, Hebron mare de Dawi kaw sa du nna, Yu u, anhte gaw na a nrut nra, na a hkum shan rai nga ga ai.

1 HKAWHKAM LABAU 11:3

Shing rai, Israela agyi salang ni yawng, Hebron mare de Hkawhkam wa kaw sa du nna, Dawi gaw Hebron mare hta e, Yehowa a man e shanhte hte ga shaka tawn da nhtawm, shanhte gaw, Samuela a n-gup hta Yehowa tsun da ai hte maren, Israela hkawhkam tai na matu, Dawi hpe namman chya ya mu ai.

1 HKAWHKAM LABAU 28:4

“Shing nga timung, Ngai Israela amyu ntsa e prat dingsa e hkawhkam tai na nga Israela Karai Kasang Yehowa nan, nye wa nta na ngai hpe lata la ni ai; kaning rai nme law, agyi amyu tai na matu Yuda amyu hpe shi lata la wu ai: Yuda amyu hta nye wa nta hpe mung, Israela amyu yawng a ntsa e up na matu, nye wa a shadang sha ni hta shi ngai hpe sharawng awng ni ai:

2 HKAWHKAM LABAU 23:16

Bai Yehoiada gaw, mung masha ni mahkra hte hkawhkam wa gaw, Yehowa masha tai mu ga nga, shi hte ga shaka tawn da shangun mu ai.

NEHEMIA 9:38

“Shing rai hkrum sha timung, anhte tengman ai ga shaka tawn da nna, ka da ai; anhte a du ni, Lewi masha ni hte hkinjawng ni gaw, dai laika hpe dazik shakap ma ai,” ngu nna tsun mu ai.

PRU MAT 3:16

Sa wa su, Israela a salang ni hpe jahpawng nhtawm shanhte hpe ning ngu mu: Nanhte a nji nwa ni a Karai Kasang, Abraham, Isak, Yaku kaw dan pru nna, Ngai nanhte hpe gaja wa kawan yu nna, Egutu mung e nanhte hpe di ai lam ngai mu se ai;

YAWSHU 10:36

Bai Yawshu gaw Israela masha ni mahkra hte rau Eglon mare nna Hebron de htawt nhtawm dai de gasat ma ai:

TARA AGYI 11:11

Dai rai nna Yephta gaw, Gilead salang ni hte rau wa ai rai nna, mung masha ni shi hpe du hte hpyen du shatai mu ai: Yephta mung, shi a lam nlang Mizpa shara e, Yehowa man e tsun da wu ai.

1 SAMUELA 11:15

Masha nlang hte mung Gilgala de wa nna, dai yang e Yehowa man e Shawlu hpe hkawhkam aya dang ya mu ai: dai yang, Yehowa man e mahku hkungga mung nawng jau mu ai; Shawlu hte Israela masha ni nlang hte mung, dai yang e ja ja kabu gara nga ma ai.

1 SAMUELA 16:13

Samuela mung shi a namman tau la nna, kahpu ni a hpawng ka-ang e, shi hpe namman chya wu ai; dai shani kaw nna Yehowa a wenyi Dawi a ntsa e adung nga ai. Shing rai Samuela rawt nna, Rama de bai wa ai.

1 SAMUELA 23:18

Shaloi shan lahkawng gaw, Yehowa man e ga shaka tawn da ma ai: shing rai Dawi gaw dai maling e nga nga nna, Yonahtan mung nta de bai wa ai.