2 SAMUELA 1:23 - Jinghpaw Hanson Version Bible

²³ Shawlu yan Yonahtan, hkrung nga dingsa tsawra nja, Si wa sai mung n daw n hka; Shan gaw, wa hpai kalang hta grau laram, Hkanghkyi hta n-gun grau ningtsam rai ma ai.

Jinghpaw Common Language Bible 2009

²³ “Shawlu hte Yonahtan grai mau na zawn hkrung nga dingsa tsaw ra nja; si wa ai mung ndaw nhka, galang ni hta grau laram, hkanghkyi ni hta grau ningtsam rawng nga ai.

2 SAMUELA 1:23 ပူးပေါင်းရင်းမြစ်များ

2 SAMUELA 1:24

Israela shayi sha ni e, Shawlu a majaw hkrap mu: Shi nanhte hpe bujung hpajap shabu jahpun nna, Nanhte a hpun palawng ni hta aja mawn sumli ya manit dai.

2 SAMUELA 2:18

Dai majan hta Zeruia kasha ni masum, Yoab, Abishai, Asahela hte lawm ma ai: Asahela gaw nam shan zawn laram ai wa rai nga ai.

2 SAMUELA 23:20

Bai Kabazela mare kaw na, share re ai Yehoiada kasha Benaia mung lawm nga ai; dai wa galaw ai magam amu kaba gaw Moba masha Ariela a shadang sha lahkawng hpe sat kau wu ai: hkyen htat ai nshung ta aten e, nhkun de shang nna hkanghkyi hpe sat kau wu ai.

1 HKAWHKAM LABAU 12:8

Bai Dawi nga ai nam mali na hpyen dap ni hta, hprawng shingbyi nga ai, nden ja ai share ni, hpyen majan amu chye galaw nna, ri n-gang chye lang ai Gad masha ni mung lawm ma ai: shanhte a myi man gaw hkanghkyi myi man hte bung nna, bum lang ga hkan na tsu aya zawn gat laram chye ma ai.

YOBA 9:26

Dai ni gaw lawan nga ai sanghpaw li ni hte, shahpa htim magra ai langda zawn, lai mat wa ma ai.

GA SHAGAWP 30:30

Dai gaw, dusat yawng hta n-gun grau ja nna, Kadai hpe n yen ai, hkanghkyi;

Shawlumon A Mahkawn Ga 5:16

Shi a n-gup hta na ga dwi ga sau pru nga ai: Rai sa, shi gaw hkum ting tsawra mai nga ai. Yerusalem na shayi chyinghkawn ni e, Dai wa gaw, ngai tsawra ai wa, nye a kanawn wa, rai nga ai.

YEREMIA 4:13

Yu u, sa wa ai hkawhkam gaw sumwi zawn du na ra ai; shi a leng ni gaw, bungsha zawn rai nga ai; shi a gumra ni gaw, langda hta grau laram nga ma ai; anhte gaw dingnye lu ga ai: hten byak ai hkrum saga ai.

SHARUNG SHAYAWT 4:19

Anhte hpe hkan shachyut ai ni gaw, ntsa malen na langda ni hta grau lawan ma ai; Shanhte gaw bum lang hkan e, anhte hpe hkan shachyut ma ai; nam mali hkan e anhte hpe gyam ma ai.

TARA JAHPRANG 28:49

Yehowa gaw, kalang htim ai zawn larau ai masha amyu mi, tsan ai shara lamu ga htum na, nang hpang de sa gasat shangun na ra ai; dai amyu a shaga ai ga nang chye na na n rai:

TARA AGYI 14:18

Shaloi mare masha ni gaw sanit ya shani e, jan garai n du yang sa nhtawm, “Lagat jahku hta hpa grau dwi a ta? Hkanghkyi hta hpa grau ja a ta?” ngu nna htai mu ai. Dai rai nna shi gaw, “Nanhte nye a nga upra hte n galau yang, kanang na nye gumwai lachyum mi n mu law,” ngu nna shanhte hpe tsun wu ai.

1 SAMUELA 18:1

Shing rai Shawlu hte ga tsun ngut ai hpang, Yonahtan a myit gaw Dawi a myit hte makyit mat lu ai rai nna, Yonahtan gaw Dawi hpe shi hkum hte maren tsawra wu ai.

1 SAMUELA 20:2

Yonahtan chyawm gaw, “Dai gaw n rai u ga; nang si lu na n rai: yu u, wa gaw ngai hpe n tsun ai amu kaji kaba hpa mung n galaw yu ai; dai lam teng yang gaw, ngai n chye hkra, hpa majaw ip da na a ta? dai gaw teng ai n rai,” ngu wu ai.