2 KORINHTU 6:3 - Jinghpaw Hanson Version Bible

³ Ndai daw ai aya gaw shatan nhkan n hkrum u ga, hpa lam hta mung ahtu kataw shara loi mi muk anhte n shatai ai sha,

Jinghpaw Common Language Bible 2009

³ Anhte galaw ai amu hte seng nna kadai wa mung shatan nhkan hte mara tam ai lam n byin shangun mayu ga ai majaw, anhte gaw kade a lam mung ahtu kataw shara hpa n byin hkra shakut ga ai.

2 KORINHTU 6:3 ပူးပေါင်းရင်းမြစ်များ

MAHTE 17:27

rai timung, anhte a majaw shanhte myit n kataw mu ga, nawng de sa nna, nga myek jahkrat bang u; shawng lu ai nga hpe shaw la nhtawm, n-gup mahka yang, shekela pa mi nang mu na ru ai: dai hpe la nna, ngai hte na a matu shanhte hpe ya u,” ngu nna shi hpe tsun wu ai.

MAHTE 18:6

Ngai hpe kamsham nga ai, ndai ma kaji ni hta na langai mi hpe, myit kataw shangun ai wa kadai mung, shi a du hta htumrin lung kaba noi nna, nawng na sung htum ai shara de jahkrat kau na gaw, ging nga ai.

KASA 19:27

Dai rai nna, anhte a bungli hpoi mat na hpe tsang ra ai hta n-ga, galu kaba ai Hpara shayi Artemi a nawku htingnu gaw hpa n tai mat nna, Asi mung ting hte mungkan ting nawku ai Hpara shayi sha a hpung shingkang hpoi mat na mung, myit tsang shara rai nga ai,” ngu nna tsun mu ai.

ROMA 14:13

Dai re ai majaw, anhte shada da hpa n jeyang saga; kadai rai timung, tinang hpunau a matu ahtu kadawng shara hte myit kataw shara n tawn da na lam she, jeyang nga mu.

1 KORINHTU 9:12

Sara kaga ni gaw nanhte hta shing re ai ahkang lu ma yang gaw, anhte grau nna lu ang ga ai, n rai ni? Rai timung, dai ahkang hpe anhte n hkan ai sha, Hkristu a kabu gara shiga hpe n shadang u ga she, anhte lam shagu hta shakut sharang nga ga ai.

1 KORINHTU 9:22

N-gun n ja ai ni hpe lum la lu hkra, n-gun n ja ai ni hta e, n-gun n ja ai wa zawn, ngai tai nga nngai: nkau mi hpe lam langai ngai hte hkye hkrang la lu hkra, masha yawng mayawng hta lam yawng mayawng, ngai hkan shatsup nngai.

2 KORINHTU 1:12

Kaning rai nme law, Karai Kasang a chyoi pra nna san seng ai myit hte, dinghta hpaji n lawm ai sha, Karai Kasang a chyeju hte, mungkan ga e anhte htinglet nga nna, nanhte hte rau grau nna dai zawn rai nga ga ai hpe, anhte a myit masin a sakse hkam ai lam ngu ai gaw, anhte a gumrawng shara rai nga ai.

2 KORINHTU 8:20

anhte a lata hte galaw daw ai, ndai alu kaba lahkawn ai hta, kadai mung anhte hpe mara shagun shara n nga u ga, sadi nga ga ai;