2 KORINHTU 11:20 - Jinghpaw Hanson Version Bible

²⁰ Kaning rai nme law, marai langai ngai nanhte hpe rim yam ai, kashun sha ai, rim la ai, tinang a hkum hpe shagrau ai hte nanhte hpe shabyi kahpret ya myit yang gaw, dai wa hpe nanhte sharang ya nga myit dai.

Jinghpaw Common Language Bible 2009

²⁰ Nanhte gaw, nanhte hpe reng sha ai ni, nanhte a ntsa e ahkaw ahkang la ai ni, nanhte hpe mahkam hte rim la ai ni, nanhte hpe yu kaji ai ni, nanhte a myi man kahpret ya ai ni kadai hpe mung nanhte hkam mana nga myit dai.

2 KORINHTU 11:20 ပူးပေါင်းရင်းမြစ်များ

ESAIA 50:6

Ngai gaw kayat ai ni hpe nye a shingma, shabyi mun baw ai ni hpe nye a shabyi, ap ya nngai: kaya jahkrum ai hte mayen mahtaw bun ai kaw na, nye a myi man kayin kau ai n rai.

SHARUNG SHAYAWT 3:30

Tinang a shabyi kayat ai wa hpe ja ya nna, shatan nhkan hte shi hpring chyat nga u ga.

MARKU 12:40

gaida gaina ni a nta ni hpe, shanhte hpya lu hpya sha nna, hpyi hpun ai hte galu galang akyu hpyi ma ai. Dai ni gaw dawdan kau ai grau nna hkrum na mara ai,” ngu mu ai.

LUKA 6:29

Na a shabyi maga mi bye ai wa hpe, maga mi naw ja ya u; na a palawng galu la kau ya ai wa hpe, na a lawnghkoi mung hkum ndang u.

1 KORINHTU 4:11

Ya ten du hkra anhte kawsi hpang gara, singgu krin, adup adep hkrum nna, nga shara garen nga ai hte,

2 KORINHTU 1:24

Ning nga tsun ai gaw, nanhte a kamsham ai hpe anhte madu nga ai n re ai sha, nanhte a kabu gara ai hta shingdep shingtau ai ni anhte rai nga ga ai; kaning rai nme law, kamsham ai hta nanhte grin grin tsap nga myit dai.

2 KORINHTU 10:5

masha a myit mang ai hku hte, Karai Kasang a chye chyang ai lam hpe hkum da mayu ai tsaw matsaw hte hpe, anhte sharun shabya lu ai hte, Hkristu a ga madat mara na lam a npu e myit mang shagu hpe sharen da mu ai;

2 KORINHTU 11:3

Rai timung, lapu gaw shi a hkalem ai hte Ewa hpe lau kau wu ai zawn, Hkristu a san seng ai hte chyoi pra ai lam hpe kau da hkra, nanhte a myit mang hten na hpe, ngai tsang nga nngai.

2 KORINHTU 12:16

Nanhte hpe ngai n sharu shatsang nga ai teng u ga; rai timung, ngai zai rawng nna hkalem ai hte nanhte hpe rim la nga ai, tsun nga myit yang gaw,

GALATI 2:4

Lagyim jashawn ai masu ai hpunau ni a majaw, dai lam ngai galaw nngai n rai; Hkristu Yesu hta e anhte lu la ai lawt wa ai lam hpe kin-yu yu nna, anhte hpe mayam shayam na shanhte shang wa ma ai;

GALATI 4:25

dai Hagara gaw, Arabi mung na Sina bum rai nga ai: shi gaw ya e de nga ai Yerusalem hte bung nga ai; kaning rai nme law, shi gaw shi a kashu kasha ni hte nawng, mayam rai nga ma ai.

GALATI 4:3

Dai hte maren, anhte ma naw rai nga ga yang, mungkan ga a hkang ai tara npu e anhte naw yamnga ga ai.

GALATI 4:9

Ya chyawm nanhte gaw Karai Kasang hpe chye nga ai hta n-ga, Karai Kasang gaw nanhte hpe chye sayang me, n-gun kya ai hte matsan mayan re ai hkang ai tara hpang de, nanhte hpa rai bai nhtang nna, de a mayam bai tai mayu nga myit hka?

GALATI 5:1

Anhte shanglawt tai na matu, Hkristu gaw anhte hpe shalawt dat mi ai: dai re ai majaw agrin nga nna, dai mayam a kandang npu e bai hkum ahkang nga myit.

GALATI 5:10

Nanhte myit kaga ga n rawng nga myit dai, ngu nna dai Madu hta nanhte a lam ngai myit da nga nngai: nanhte hpe sharu shatsang ai wa gaw, kadai rai timung, tinang mara a jeyang ai hkrum na ra ai.

GALATI 6:12

Hkum shan a ahpraw nsam hpe tau yu ai ni kadai mung, Hkristu Yesu a wudang a majaw zingri zingrat ai n hkrum mu ga, nanhte hpe matu gadoi hkam na, adip arip di myit dai.

HPILIPI 3:19

Dai ni a chyahtum ai gaw, hten byak ai rai nga malu ai; dai ni a Karai Kasang gaw, tinang a kan rai nga ai hte, tinang a kaya kahpa hta shanhte a gumrawng shara rai nga ma ai; dinghta ga na arai hpe hkrai shanhte myit tsang nga ma ai.

1 HTESALONI 2:5

Kaning rai nme law, nanhte chye nga myit dai hte maren, anhte galoi mung a shapyaw ai ga hpe nsung ga ai hte, ka-up nga ai nammak lawhpa n rawng nga ai gaw, Karai Kasang nan sakse rai nga ai: