1 SAMUELA 26:8 - Jinghpaw Hanson Version Bible

⁸ Shaloi Abishai gaw, “Karai Kasang gaw, na a hpyen wa hpe na a lata hta dai ni ap ya ra ai: dai rai nna, aga de hkrang hkra ari hte kalang ta sha ngai shi hpe galun htinggrang kau we ga; lahkawng lang pyi, n kahtap na nngai,” ngu nna Dawi hpe hpyi wu ai.

Jinghpaw Common Language Bible 2009

⁸ Abishai gaw Dawi hpe, “Karai Kasang gaw na a gumlau hpyen wa hpe na a lata hta dai na ap ya ra ai. Dai rai nna shi a nri hte nan aga de hkrang hkra kalang lata shi hpe galun htinggrang kau we ga, lahkawng lang pyi n kahtap ra na nngai!,” ngu nna tsun wu ai.

1 SAMUELA 26:8 ပူးပေါင်းရင်းမြစ်များ

2 SAMUELA 16:9

Dai re ai majaw Zeruia kasha Abishai gaw hkawhkam wa hpe, “Gwi chyasi wora, hpa nga nna me nye madu hkawhkam wa hpe matsa nga a ta? Ngai sa htau kau se ga,” ngu nna hpyi wu ai.

SHAKAWN KUNGDAWN 31:8

Gumlau ni a lata hta nang ngai hpe ap kau ndai n rai, Dam lada ai shara e, nang nye a lagaw hpe shatsap ya ndai.

YEREMIA 40:15

Karea kasha Yohanan chyawm gaw, Nehtania kasha Ishmaela hpe ngai sa sat kau na ahkang jaw e; kadai mung dai lam chye lu na n rai; shi gaw nang hpe sat kau nna, nang kaw hpawng nga ai Yuda masha ni mahkra gaw dumbru dumbra rai mat nna, Yuda mung hta naw ngam nga ai ni, hpa majaw htum mat hkrum na ma ta? ngu nna Mizpa mare e Gedalia hpe mayun tsun wu ai.

NAHUM 1:9

Nanhte gaw Yehowa hpe hpa lam hpaji daw myit ta? shi gaw htum hkra shamyit kau na myit dai: sharu shatsang ai lam bai pru lu na n rai.

ROMA 11:32

Karai Kasang chyawm gaw, nlang hte hpe chyeju madun dan lu hkra, nlang hte hpe n madat n mara ai hta ban hkum da mu ai.

TARA JAHPRANG 32:30

Shanhte a shamyet lunghkrung shanhte e dut ya ai n rai yang, Yehowa nan shanhte kaw ap kau ai n rai yang, Marai langai sha masha hkying mi hpe, Marai lahkawng e sha mun mi hpe, kaning rai hkan jahtaw kau lu a ta?

YAWSHU 21:44

Yehowa kaji kawa ni hpe ga shaka da ai hte maren, grup yin shara shagu hta ban sa shangun mu ai rai nna, shanhte a man e kadai masha hpyen wa mung n tsap lu ma ai; Yehowa shanhte hpe masha hpyen ni yawng a lata na shaw la mu ai.

TARA AGYI 1:4

Shing rai Yuda hpyen rawt wu ai. Yehowa mung, Hkanani hte Perizi masha ni hpe shi a lata hta ap wu ai rai nna, shanhte gaw Bezek mare e masha mun mi hpe gasat kau mu ai.

1 SAMUELA 23:14

Dawi chyawm gaw, Zihpa bum ga na hkaraw nhkap hkan e nga nga ai rai nna, Shawlu shani shagu tam nga timung, Karai Kasang gaw Dawi hpe shi a lata de n ap kau wu ai.

1 SAMUELA 24:4

Shaloi Dawi a masha ni gaw, “Yu u, Yehowa nang hpe tsun ai, Na a hpyen wa hpe na a lata hta ngai ap ya na de ai; shi hta nang hpa di mayu yang di lu na rin dai, nga ai nhtoi ya du ra ai,” ngu nna shi hpe tsun mu yang, Dawi rawt nna, Shawlu hpun nga ai palawng nshang daw hpe, atsin sha gadoi dut la ya wu ai.

1 SAMUELA 24:5

Shing rai, Shawlu a palawng rep di la kau ai majaw, Dawi myit malai bai lu ai rai nna,

1 SAMUELA 26:23

Dai ni Yehowa nang hpe nye a lata hta ap kau nit dai rai timung, shi a namman chya hkam ai wa hpe ngai n hkra nngai; Yehowa gaw kadai hpe rai timung, tinang a dinghpring ai hte kangka ai hta hkan nna, akyu htang jaw na ra ai.

1 SAMUELA 26:7

Shing rai Dawi yan Abishai gaw dai dap de shana e sa wa ma ai: shaloi, yu u, Shawlu gaw, leng dap a ka-ang e yup nga nna, shi a ri gaw baw nhtung e ga hta jung da wu ai: Abna hte shi a masha ni gaw grup yin e yup nga ma ai.

1 SAMUELA 26:9

Dawi chyawm gaw, “Shi hpe hkum hkra et; Yehowa a namman jaw hkam ai wa hpe kadai wa mi ra n rawng ai hkra lu na rai ta?” ngu nna Abishai hpe daru wu ai.