1 SAMUELA 10:1 - Jinghpaw Hanson Version Bible

¹ Shaloi Samuela gaw, namman tauba la nna, Shawlu a baw e jaw bun nhtawm shi hpe pup nna, “Yehowa gaw, shi a Sali amyu a du tai na matu, nang hpe namman chya ya nit dai, n rai ni?

Jinghpaw Common Language Bible 2009

¹ Dai hpang Samuela gaw tsanlun sau rawng ai di bu langai la nna Shawlu a baw ntsa e ru jaw nna shi hpe pup let, “Shi a amyu masha Israela hpe up hkang ai du tai na matu, dai Madu gaw nang hpe namman jaw ya nga ai. Dai rai nna shi a amyu masha ni hpe nang up hkang nna shanhte a gumlau hpyen ni yawng a lata kaw nna mung shanhte hpe makawp maga ya na rai ndai. Ndai gaw dai Madu nang hpe lata la nna shi a amyu masha ni hpe up hkang na du tai na matu nang hpe madun ai sakse rai nga ai.

1 SAMUELA 10:1 ပူးပေါင်းရင်းမြစ်များ

2 SAMUELA 1:14

Bai Dawi gaw, “Yehowa a namman jaw hkam ai wa hpe sat lu na gaw, na a lata kaning rai dawn gwi a ta?” ngu nna tsun let,

2 SAMUELA 19:39

Shing rai masha ni mahkra Yawdan hka rap ma ai; hkawhkam wa mung shi hkum nan rap nna, Barazili hpe pup let shi hpe shaman ya wu ai; bai shi gaw shi a shara de nhtang wa ai.

2 SAMUELA 20:19

Israela amyu hta ngwipyaw lam hkan nna kangka dingman ai jan langai mi rai nga nngai: nang chyawm gaw, Israela mi rai nga nngai: nang chyawm gaw, Israela mare, Israela kanu langai mi hpe hpya kau na maw nga ndai: Yehowa sali wunli hpe hpa rai mayu kau mayu n ta? ngu wu ai.

2 SAMUELA 5:2

Moi shawng de, anhte a ntsa e Shawlu naw up nga yang nna, nang hkum nan Israela amyu hpe, woi pru woi shang ai wa rai nga nit dai: Yehowa mung, ‘Nang gaw nye a amyu Israela hpe, woi rem na wa hte nye amyu Israela ntsa e Du magam nang tai lu na ndai,’ nga nna nang madu hpe tsun nit dai,” ngu nna sa shang sa wang wu ai.

1 HKAWHKAM 1:34

dai shara hta e hkinjawng Zadok yan myihtoi Nahtan gaw, shi hpe Israela hkawhkam shatai na matu, namman chya ya mu ga: pahke dum let, hkawhkam Shawlumon gaw ahkrung nga u ga law,” ngu nna tsun mu;

1 HKAWHKAM 19:18

Rai timung, Bala man e lahput n hput di nna, shi hpe n pup yu ai, Israela masha hkying sanit hte hpe ngai naw jahti da na nme ai,” ngu wu ai.

2 HKAWHKAM 20:5

“Bai nhtang u; nye a amyu du Hezekia hpe ning ngu u; ‘Na nwa Dawi a Karai Kasang Yehowa ning nga ai, Na akyu hpyi ai ga ngai na ni ai, na myi prwi ngai mu nngai: yu u, ngai nang hpe shamai ya nna, masum ya laman e Yehowa a nta hta nang shang lu na ndai.

2 HKAWHKAM 9:1

Dai shaloi myihtoi Elisha gaw, myihtoi ma ni hta na langai mi hpe shaga la nna, “Shingkyit kyit u; ndai namman tau lang nna Ramot-gilead de sa wa su.

2 HKAWHKAM 9:12

Bai shanhte gaw, “N chye ga ai; tsun dan yu mi,” ngu mu yang, shi gaw, “Dai wa gaw wora lera hku tsun nna, Yehowa ning nga ai: Nang Israela hkawhkam tai na matu, ngai nang hpe chya ya sade ai,” nga nna ngai hpe htawn tsun ai, ngu mu ai.

SHAKAWN KUNGDAWN 135:4

Yehowa gaw Yaku hpe lata la nna, Israela shi a sali wunli rai nga ai.

SHAKAWN KUNGDAWN 2:12

Dai kasha hpe pup mu: shing n rai yang, shi masin pawt nna nanhte lam e hten bya ai hkrum na myit dai: Kaning rai nme law, shi masin alawan pawt bu na ra ai: Shi hta shingbyi ai ni nlang hte gaw, a lu ma ai.

SHAKAWN KUNGDAWN 78:71

Shi a amyu Yaku hte, shi a sali wunli Israela hpe lanu lahku ya mu ga, kasha hkrat ai sagu yi ni kaw na, shi hpe shaw la wu ai.

PRU MAT 30:23

“Kaja htum ai manan pyaw ai baw, mura sau shekela manga tsa, hpun maza hpyi ni tsa manga shi, hkalamu ni tsa manga shi;

YEREMIA 10:16

Yaku a kamhtaw chyawm gaw, dai hte n bung nga ai; Shi gaw yawng mayawng hpe hpan da ai wa rai nga ai; Israela gaw shi a sali wunli amyu rai nga ai; shi a amying gaw, Zaw nawng zaw wa up ai Yehowa rai nga ai.

EZEKELA 16:13

Shing rai aja gumhpraw hte nang mawn sumli nga ndai; na a hpun palawng gaw, mani ai lachyit sumpan, alai hte maka ka ai sumpan rai nga ai; mani ai shadung, lagat jahku hte sau sha let, grai tsawm htap ai ahpraw nsam pru nna, nang gaw hkawhkam jan aya hkam la nga ndai.

HOSEA 13:2

Ya shanhte gaw yubak je je galaw nna, tinang nyan hkan let, tinang a gumhpraw hte jaw ai hpara sumla galaw ma ai: yawng hte gaw lasama amu hkrai rai nga timung, shanhte gaw dai sumla ni hpe ga tsun nna, hkungga nawng ya ai wa gaw, dumsu kasha ni hpe pup nga a hka!

KASA 13:21

Dai hpang shanhte hkawhkam hpyi nna, Karai Kasang gaw shanhte hpe, Ben-yamin amyu, Kisa a kasha Shawlu hpe mali shi ning laman e, shadun ya mu ai.

TARA JAHPRANG 32:9

Yehowa a kamhtaw chyawm gaw, shi a mayu rai nga ai, Yaku gaw shi a sali wunli rai nga ai.

1 HTESALONI 5:26

Hpunau ni yawng hte hpe, chyoi pra ai pup hte shakram ya mi.

HEBRE 2:10

Kaning rai nme law, kashu kasha law law hpe hpung shingkang hkam la ai de woi wa yang, shanhte a hkye hkrang la ai lam a agyi wa hpe nni nkri hte jahkum shatsup na yawng hpe up nna, yawng a npawt rai nga ai Karai Wa gaw, mai di nga ai.

SHINGRAN 5:8

Dai laika hpe lu la ai shaloi jang, dai dusat amyu mali hte salang hkun mali gaw, dai Sagu Kasha a man e dingnyawm ma ai; shanhte langai hte langai tingse hte chyoi pra ai ni a akyu hpyi ai ga ngu ai manam pyaw ai baw hte hpring chyat nga ai ja gawm lang nga ma ai:

1 SAMUELA 12:3

Ya ngai nang rai nga nngai: gade a dumsu ngai kashun la yu a ta? gade a lawze kashun la yu a ta? kadai hpe maw sha yu a ta? kadai hpe zingri zingrat yu a ta? tinang a myi magap na matu, kadai kaw na manawn kumhpa hkap la yu a ta? Yehowa hte shi a namman chya ai wa a man e nye a lam sakse hkam yu mu; gade a rai kashun la ai rai yang bai wa made ga,” ngu nna tsun mu ai.

1 SAMUELA 13:14

ya chyawm gaw na a magam grin sa na n rai: Yehowa gaw shi a myit dik ai masha tam nga ai; nang mahtang, Yehowa nang hpe hkang da ai ga matsun n hkan nang ndai majaw, Yehowa gaw dai wa hpe shi a amyu Israela du shatai na, san da nu ai,” ngu wu ai.

1 SAMUELA 15:1

Shaloi Samuela gaw Shawlu hpe, “Yehowa amyu Israela hpe up na matu, nang hpe namman chya su, nga nna Yehowa ngai hpe shangun ni ai: dai re ai majaw, Yehowa tsun ai ga ya madat u.

1 SAMUELA 15:17

Shaloi Samuela gaw, “Nang gaw, nang hkum dai pyi, kaji dum ai wa rai nga ninglen, Israela amyu ni a baw nang tai nit dai, n rai ni? Yehowa nang hpe Israela amyu ntsa e hkawhkam shatai na namman chya nit dai;

1 SAMUELA 16:1

Dai rai nna Yehowa Samuela hpe, “Israela hkawhkam aya na ngai jahkrat kau ai Shawlu a majaw, nang gaten du hkra yawn nga na n ta? Na a tau hta namman bang jahpring nna sa su; Betlehem masha Yese hpang de shangun dat de ga; shi a kasha ni hta na langai mi, nye a matu hkawhkam shatai na, ngai san da se ai,” ngu wu ai.

1 SAMUELA 16:13

Samuela mung shi a namman tau la nna, kahpu ni a hpawng ka-ang e, shi hpe namman chya wu ai; dai shani kaw nna Yehowa a wenyi Dawi a ntsa e adung nga ai. Shing rai Samuela rawt nna, Rama de bai wa ai.

1 SAMUELA 2:10

Yehowa hpe daw ai ni, agrawp kau ai hkrum na mu ai; shanhte a ntsa e mu shangoi dat na wu ai: Yehowa lamu ga htum hkra tara dara nna shi a hkawhkam wa hpe n-gun shaja na wu ai, Shi a Namman chya ai wa a nrung sharawt ya na wu ai,” nga nna shakawn wu ai.

1 SAMUELA 24:6

“Yehowa a namman jaw hkam ai nye a Madu gaw, Yehowa a hkang hte namman jaw hkam ai wa rai nga ai majaw, dai nye a Madu hpe shing di na gaw, nye a lata e Yehowa hkum kau ya n ga,” ngu nna shi a masha ni hpe tsun wu ai.

1 SAMUELA 26:11

Yehowa a namman jaw hkam ai wa hpe, ngai lata n du hkra, Yehowa hkum kau n ga law: ya chyawm gaw, shi a baw nhpang na ri hte ntsin namtau hpe, la wa ga,” nga nna tsun let,

1 SAMUELA 26:9

Dawi chyawm gaw, “Shi hpe hkum hkra et; Yehowa a namman jaw hkam ai wa hpe kadai wa mi ra n rawng ai hkra lu na rai ta?” ngu nna Abishai hpe daru wu ai.

1 SAMUELA 8:19

Mung masha ni chyawm gaw Samuela ga n madat ai sha, “N rai law, anhte masha amyu nlang hte bung hkra,

1 SAMUELA 8:9

Ya shanhte a ga madat ya mu; rai timung, shadum jahprang nna shanhte hpe up na hkawhkam wa a htung hking madun dan u,” ngu wu ai.

1 SAMUELA 9:16

“Hpawt de ndai ten e, Ben-yamin ga na masha langai mi, nang hpang de ngai shangun dat na ring ngai; dai wa hpe nye a amyu Israela du shatai nna, namman chya aya dang na rai ndai; shi gaw nye a amyu masha ni hpe, Hpilisti masha ni a lata na hkye la na ra ai: kaning rai nme law, shanhte a jahtau shaga ai nsen, nye a na hta hkrang ra ai rai nna, nye a amyu hpe ngai mada mara se ai,” ngu nna shi hpe shadan dan ya wu ai.

1 SAMUELA 9:27

Mare shingnawm du jang Samuela gaw, “Na ma hpe shawng magang na tsun u,” ngu wu ai; ma mung shawng magang mat wa ai; bai Samuela gaw, “Hkring mi naw tsap u; Ngai nang hpe Karai Kasang a mungga htawn tsun de ga,” ngu wu ai.