ŊwɑꞋnɛ-Gɑŋntúu Yɛ́su Kɛlístɔ 9:31 - Kɑɑ Fí

³¹ Ɛ́ pɔ́ ŋkɑ́ yîyɑ́, ŋɡɔŋ pɑpɛ́m Yɛ́su tsʉʉ nɑ́ŋ tsɛt mɔ́fíitɛ. Pɛ́ pɔɔ pɛn ŋ́ɡɑ́ɑnɛ wɔ́p nǔu pɑk-ŋɡɔŋ-Judɛ̂ pɔ́. Tɛ mbɑ tsɛt pɑk-ŋɡɔŋ-Ŋɡɑlilɛɛ tɛ mbɑ Sɑmɑlîi. Pɔ́p pɛtsʉʉ pɔ́ ńtɔ́ɔtɛ mɛmbʉʉ mɔ́p, ŋ́kẅiꞋ ńtɛntɛ, ḿbɔ́ ńzúꞋ ntsu-Tsɑpʉɔ. Zẅikŋɛ-Sɛ́ pɛn ḿbɔ́ ńtɔ́ɔtɛ wɔ́p, ḿbɛn ŋ́ɡɛ ndɛn wɔ́p kẅiꞋ ńzɑ́ɑ.

ŊwɑꞋnɛ-Gɑŋntúu Yɛ́su Kɛlístɔ 9:31 ပူးပေါင်းရင်းမြစ်များ

ŊwɑꞋnɛ-Gɑŋntúu Yɛ́su Kɛlístɔ 12:24

Ɛ́ kɛ ŋ́ɡʉ nǔu sẅíŋɛ-Sɛ́, ɛ́ pɔ́ ŋ́kẅiꞋ ɛ́sɑt zʉꞋ ŋ́ɡʉ pɔ nɛ́ mbi.

ŊwɑꞋnɛ-Gɑŋntúu Yɛ́su Kɛlístɔ 16:5

Pʉɔ-Kɛlístɔ pɔ́ ŋ́kẅiꞋ ńzɑ́p tʉ́m nǔu Sɛ́ ńdɔk ŋ́ɡʉ pɔ nɛ́ mbi. Ndɛn wɔ́p pɔ́ ḿbɔ́ lɛ́Ꞌ tsʉʉ, ŋ́kẅiꞋ kẅiꞋnɛ.

ŊwɑꞋnɛ-Gɑŋntúu Yɛ́su Kɛlístɔ 2:47

Pɔ́p kɑ pɔ́ ŋ́ɡúꞋlɛ Sɛ́ tɛꞋ. Lɑ́Ꞌ tsʉʉ kɔŋ yɔ́p ntɛ́ nɛnɑ́ŋ. Ɛ́ pɔ́ lɛ́Ꞌ tsʉʉ, Tsɑpʉɔ pɔ́ ńdɔk pʉɔ pi ɑ ɡɛnɛ pɔ́p luk, ńdɔk ŋ́kẅiꞋ nɔɔ yɔ́p.

ŊwɑꞋnɛ-Gɑŋntúu Yɛ́su Kɛlístɔ 20:32

Ŋ kɛ́ ḿbɔ́ ŋkɔ̂ɔnɛ pɑꞋɑ ḿbɔ́ fɛ́ɛ wʉ́ʉ mbɔ̌ Sɛ́ ḿbɛn ḿbɔ́ ńcú mbɔ̌ pʉʉ ŋɡɔ pʉʉ zẅíꞋlɛ sẅiŋɛ yɛ́ yi ɛ́ nyɛtnɛ pɑ́Ꞌ ɑ ɡɑ́nɛ fuꞋ níinɛ yɛkŋɛ pɔ́Ꞌɔ. Yîyɑ́ sẅiŋɛ kuꞋ nɛɡɛ pʉʉ kẅiꞋ ńzɑ́p tʉ́m nǔu Sɛ́. A lɛɛ nǔu ŋ́ɡɑ́ yúu sʉ́Ꞌnɛ yi ɑ kɑ niitɛ́nɛ ńzɑ́p ntɛ́ pʉɔ pinɛ pɔ́p pɛ́ tsʉʉ.

ŊwɑꞋnɛ-Gɑŋntúu Yɛ́su Kɛlístɔ 5:11

Yɔ nu lɛɛ cúlɛ-pʉɔ-Kɛlístɔ mbɑ pɛcɔ́ pʉɔ pí pɔ́p kɑ zúꞋnɛ yɔ nu pɔ́k tɛꞋ.

ŊwɑꞋnɛ-Gɑŋntúu Yɛ́su Kɛlístɔ 6:7

Sẅiŋɛ-Sɛ́ kɑ pɔ́ ŋ́kẅiꞋ ɛ́sɑt pɔ zʉꞋ. Nɔɔ-pɑzɑ́p tʉ́m nǔu Yɛ́su pɔ́ ŋ́kẅiꞋ ńzɑ́ɑ Yɛlúsɑlɛm. PɑnɔŋpɔꞋ tɛ ńzɑ́ɑ zɑ́p tʉ́m nǔu Yɛ́su.

ŊwɑꞋnɛ-Gɑŋntúu Yɛ́su Kɛlístɔ 8:1

Ɛ́ kɑ fú lɛ́Ꞌ ɛ̂yɑ́, pɛ́ zɛ nɛnyɛt nɔɔ-pɑpɛ́m Yɛ́su nɛ́ ŋɡʉ̈ɔ́Ꞌ Yɛlúsɑlɛm tɛꞋ. Pɔ́p kʉɔ, ɛ́sɑt zʉꞋ nǔu shʉ́ Judɛ̂ pɔ́p Sɑmɑlîi tɛ ɛ́ tsʉ́Ꞌ pɔ ndɑꞋ ɡɑŋntúu-Yɛ́su Yɛlúsɑlɛm.

Pʉɔ-Lɔ́mɑ 14:17

Ɛ́ zɛɛ ŋ́ɡɔ ḿbɔ́, nu-nɛfɔɔ-Sɛ́ kɑ́ pɔ́ nu-yúupɛjʉ́ kɛ pɔ nu-mɛluꞋ pɔ́. Nu-nɛfɔɔ-Sɛ́ pɔ́ pɔ nɛɡɛ mɛnu mi ɛ́ fúnɛ mbɔ̌ Zẅikŋɛ Lɛ́ɛnɛ́nɛ. Ɛ́ pɔ́ pɔ nɛɡɛ mɛnu mi ɛ́ ndʉ́ŋndʉŋ mbi Sɛ́, ḿbɔ́ nɛnɑ́ŋ nɛ́ mɔ́fíitɛ, ḿbɔ́ nɛnɑ́ŋ nɛ́ tsɑ́ɑtɛ.

Pʉɔ-Lɔ́mɑ 14:19

Pɔ́Ꞌɔ lɑ́, pɛkŋɛ lɔɔ yúu mi ɛ́ ɡʉ ŋ́ɡɛ pɛkŋɛ nɑ́ŋ nɛ́ mɔ́fíitɛ, ḿbɛn ŋ́kẅiꞋ ńtɔ́ɔtɛ mɛmbʉʉ mɛkŋɛ nǔu nɛzɑ́p tʉ́m nǔu Sɛ́.

Pʉɔ-Lɔ́mɑ 15:13

Pɔ́Ꞌɔ, mɔ sɛ́ ńtsɑ́ɑ ŋɡɔ Sɛ́ ẅí jʉ́ ɡɛnɛ lɑ pɛ́ nɑ́ŋ ḿbɔ́ ńzẅíꞋlɛ yúu, ɑ lɛɛ nǔu pɑ́Ꞌ pʉʉ zɑ́pnɛ tʉ́m nǔu wɛ́, ŋ́ɡɛ tsɑ́ɑtɛ pɔ́p mɔ́fíitɛ jʉ́ tʉ́m yʉ́ʉ, ńjí ŋɡɔ Zẅikŋɛ Lɛ́ɛnɛ́nɛ ɡʉ ńdɔk mɛtʉʉ mɛ́ ŋ́ɡɛ pʉʉ pɔ́ kwɑꞋ pɑnɑ́ŋ ńzẅíꞋlɛ yúu mi Sɛ́ kɑ kɑ́Ꞌnɛ.

Pʉɔ-Lɔ́mɑ 5:5

Pɛkŋɛ kɛ́ ḿbɔɔ ńzẅíꞋlɛ pɔ́Ꞌɔ pɔ zʉꞋ níinɛ pɔ́, mbíꞋŋɡɔ Sɛ́ ɛ́fú nǔu Zẅikŋɛ yɛ́ yi ɑ kɑ ɡɑ́nɛ mbɔ̌ pɛkŋɛ, ńnyɛt wɛkŋɛ pɑ́ꞋtɛꞋ ŋɡɔ ɑ kɔŋ wɛkŋɛ.

1 Kɔlɛ̂ŋtɛ 14:12

Ɛ́ pɛn ḿbɔ́ mbɔ̌ pʉʉ ḿbɔ́ pɔ pɔ́Ꞌɔ. Pɑ́Ꞌ pʉʉ sɛ́ ḿbɔ́ ńtsɑ́ɑ tɛꞋ ŋɡɔ Zẅikŋɛ Lɛ́ɛnɛ́nɛ lɔk pɔ́fɑꞋ ntɛ́ nɛntɛ ŋ́ɡɑ́ fuꞋ níinɛ yʉ́ʉ lɑ́. Pʉʉ sɛ́ ńnɑ́ŋ ńtsɑ́ɑ ŋɡɔ ɛ́ kẅiꞋ ńzɑ́ɑ lɑ́, ɛ́ pɔ́ pɔ nɛlɔk ŋ́ɡɛ cúꞋlɛ tsʉʉ kẅiꞋ ńzɑ́p tʉ́m nǔu Sɛ́.

1 Kɔlɛ̂ŋtɛ 14:26

Pɔ́ɔpɛ́mɑ́ pɑ́ɑ pɑ́Ꞌ ɛ́ pɑ́Ꞌɑ lɑɑ pɛkŋɛ ɡɛ ŋɡɔ́ku? Pʉʉ lɑɑ ḿbɔ́ tɛ ńcúꞋlɛ, ŋu wʉʉ ɡẅɛɛ zɔp ŋki ɑ zɔp, ŋu ɡẅɛɛ yúu mi ɑ ɡʉ ńzíꞋ pɛcɔ́ pʉɔ, ɑ zíꞋ, ŋu ɡẅɛɛ yúu mi Sɛ́ sɛ́ ńnyɛt wɛ́, ɑ cú, ŋu ɡẅɛɛ nu yí ɑ ɡʉ ńcú nɛ́ sẅiŋɛ yi pɛ́ kɑ́ pɔ́ ńjí pɔ́ ɑ cú, ŋu ɡẅɛɛ nɛkyɛ́Ꞌtɛ ɑ kyɛ́Ꞌtɛ. Lɑ́ ɛ́ sɛ́ ḿbíkŋɛ ŋɡɔ mîmɑ́ mɛyúu tsʉʉ cẅɛ́lɛ́ nɛlɔk ŋ́ɡɛ cúꞋlɛ-pʉɔ-Kɛlístɔ tsʉʉ kẅiꞋ ńzɑ́p tʉ́m nǔu Sɛ́.

2 Kɔlɛ̂ŋtɛ 10:8

Tsɑpʉɔ kɑ zɑ́pnɛ wɛ́k, nɛtʉ́ʉ mbi ńcú nu mbɔ̌ pʉʉ, nɛlɔk ŋ́ɡɛ cúꞋlɛ yʉ́ʉ kẅiꞋ ŋ́ɡʉ pɔ́p nɛ́ mbi, ɛ́ ŋkɑɑ pɔ́ nɛlɔk ńtɑ́k pɔ́. Ɛ́ lɑɑ ńzɛɛ ḿbɔ́ yi mɔ sɛ́ ńdɔk ẅîwɑ́ nɛpɔ́ ŋ́kɑꞋmɛ tɛ ɛ́ lɛɛ, mbɔ ɛ́ lɑɑ ḿbɔ́ sʉ́ʉ pɔɔ wɑ́ɑ kɔ́.

2 Kɔlɛ̂ŋtɛ 12:19

Líkcɔ́, mbɔ pʉʉ ńdɑ́Ꞌmɔ́ ńzɛ nɛkwɑŋɛ ŋɡɔ pɛk sɛ́ ńdɔɔ nɛzɔŋ tú yɛ́k mbɔ̌ pʉʉ. Ŋɡɑ́ŋ ɛ́ kɑ́ pɔ́ pɔ́Ꞌɔ pɔ́. Pɛk ɡɔ́ ńcú nu, ɛ́ pɔ́ pɔ nǔu ntɛ́ yi Kɛlístɔ sɛ́ ŋ́kɔŋ, pɛk pɛn ńtʉ́ʉ pɔ mbi Sɛ́ lɑ ńcú. Pɔ́ɔpɛ́mɑ́ pɑ́ɑ pɛ́ tʉʉndɛn, pɛk ɡɔ́ ńcú pɔ́Ꞌɔ, ɛ́ pɔ́ pɔ nɛlɔk ŋ́ɡɛ, pʉʉ kẅiꞋ ńzɑ́p tʉ́m yʉ́ʉ nǔu Sɛ́.

2 Kɔlɛ̂ŋtɛ 13:10

Yúu mi ɛ́ ɡɛnɛ, m bɛ́t pɔ ŋɡɑ sɛsɑ ŋ́ŋwɑꞋnɛ yɔ nu tsʉʉ, ḿbɔ́ ńtsɑ́ɑ ŋɡɔ ŋ kɛ́ ɡɛ ńtɔ́ tɛ kúu tsɛtsɛt pʉʉ ńdɔk pɑ́Ꞌ Tsɑpʉɔ kɑ tíknɛ wɑ́ɑ mbi pʉʉ, ńcʉ̈ɔ́k wʉ́ʉ cʉ́ɔknɛ pɔ́. Tsɑpʉɔ kɑ tík wɑ́ɑ mbi pʉʉ pɔ nɛɡɛ cúꞋlɛ kẅiꞋ ŋ́ɡʉ nɛ́ mbi. A ŋkɑɑ tík wɑ́ɑ ŋɡɔ n tɑ́k tɑ́knɛ pɔ́.

2 Kɔlɛ̂ŋtɛ 7:1

Pɔ́ɔpɛ́mɑ́ pɑ́ɑ pɛ́ tʉʉndɛn, pɑ́Ꞌ Sɛ́ kɑ kɑꞋnɛ mɔnɛ mɛnu mbɔ̌ pɛkŋɛ lɑ́, ɛ́ sɛ́ ḿbíkŋɛ ŋɡɔ kwɑꞋ pɛkŋɛ nɛ́ tú yɛkŋɛ kʉ̈ɔ́ mɛnu mi ɛ́ kɑ́ pɔŋ Sɛ́ pɔ́, mi pɛ́ ɡɛ ɡɛnɛ, tɛ mbɑ mi pɛ́ kwɑŋɛ kwɑŋɛ́nɛ, ŋ́kẅiꞋ ńdɔk nɛpɔ́ kɛ́ lɔ́Ꞌ ŋ́ɡʉ nɛ́ mbi tɛ ńdẅiklɛ, ŋ́ɡɔ ŋ́ɡɛ, ḿbɔ́ ḿbɔ́k Sɛ́.

Ɛ́fɛ̂zɛ 4:12

A kɑ zɑ́pnɛ pîpɑ́ pʉɔ nɛpɔ́ yi pɔ́p ɡʉ cẅɛ́lɛ́ pʉɔ-Kɛlístɔ nɛfɑꞋ fɑꞋ-Sɛ́, cúꞋlɛ-pʉɔ-Kɛlístɔ yi ɛ́ mbɑp mbʉʉ yɛ́, kẅiꞋ ŋ́ɡʉ nɛ́ mbi.

Ɛ́fɛ̂zɛ 4:16

Jʉ́ ɡɛnɛ mɛzʉꞋ-mbʉʉ-cúꞋlɛ ńtɛmtɛ ḿbɔ́ tɑ́Ꞌ yúu. Mɛŋɑŋ-mbʉʉ tɛ ńzɑ́ɑ cẅɛ́lɛ́ nɛɡɛ mɛzʉꞋ-mbʉʉ tɛmtɛ, mbɑ yɛ́tɛ́ zʉꞋ-mbʉʉ lɑ́ pɛn ḿbɔ́ tɛ ḿbɔ́ ɛ́fɑꞋ yɛ́ fɑꞋ, mbɑp-mbʉʉ tsʉʉ tɛmtɛ ŋ́ɡúꞋ, ńtɛntɛ ńdɛɛ pɔ nǔu ŋkɔŋɛ yi ɛ́ tsɛtsɛt pɔ́p.

Ɛ́fɛ̂zɛ 4:29

ḿbɑ́ɑ mbɑ tɑ́Ꞌ sẅiŋɛ kɛpɔŋ nɛcẅɛt ntsu pʉʉ. Pʉʉ cú pɔ nu yi ɛ́ ɡʉ cẅɛ́lɛ́ nǔu yîyɑ́ ŋkɑ́, ɛ́ pɔ́ pɔ sẅiŋɛ sʉ́Ꞌnɛ yi ɛ́ ɡʉ cẅɛ́lɛ́ pɛcɔ́ pʉɔ pɔ́p nɛkẅiꞋ ńzɑ́p tʉ́m nǔu Sɛ́. Pʉʉ cú pɔ nu yi ɛ́ ɡʉ cẅɛ́lɛ́ mbɑ wɔ̌ lɑ́ nǔu pʉɔ pi pɔ́p sɛ́ ńzẅíꞋlɛ.

Ɛ́fɛ̂zɛ 5:21

Pʉʉ lɔk pɑ́Ꞌ pʉʉ ɡɑ́nɛ mbʉʉ yʉʉ sɛ́ mbi Kɛlístɔ, mbɑ wɔ̌ lɑ́ ɡɑ́ mbʉʉ yɛ sɛ́ mbi mɔ́ɔmɑ́ wɛ.

Filipɛ 2:1

Tɛ nɛpɔ́ ẅi pʉʉ pɛ Kɛlístɔ kɑ tɛmtɛ mɔ́ kɑ́ nɛ́ pɔ́ ŋ́ɡɛ pʉʉ kẅiꞋ ɛ́sʉk pɔ́ ɔɔ? Tɛ ntɛ́ yi Kɛlístɔ lɔknɛ ŋ́kɔŋ wʉ́ʉ kɑ́ pɔ́nɛ ńníꞋ mɛtʉʉ mʉ́ʉ pɔ́ ɔɔ? Tɛ pʉʉ pɛ́ Zẅikŋɛ Lɛ́ɛnɛ́nɛ kɑ́ pɔ́nɛ pɔ́ ɔɔ? Tɛ pʉʉ kɑ́ ɡẅɛɛ ŋkɔŋɛ nɛ́ tsɑ́ɑ mɛjʉ́ŋ tsɛtsɛt pʉʉ pɔ́ ɔɔ?

Kɔlɔsíyɛ̂ŋ 1:10

Pɔ́Ꞌɔ, pʉʉ kuꞋ nɛnɑ́ŋ nǔu ntɛ́ yi Tsɑpʉɔ sɛ́ ŋ́kɔŋ, ḿbɔ́ ŋ́ɡɛ pɔ yúu mi ɛ́ pɔŋnɛ wɛ́, ɛ́fɑꞋ mɛfɑꞋ sʉ́Ꞌnɛ mɛntɛ́ mɛntɛ́, ŋ́kẅiꞋ ńjí jʉ́ Sɛ́.

1 Tɛsɑlɔník 5:11

Pɔ́Ꞌɔ lɑ́, pʉʉ níꞋ mɛtʉʉ mʉ́ʉ pʉʉ nɛ́ pʉʉ, ŋu tɔ́ɔtɛ ŋu, ŋu tɔ́ɔtɛ ŋu, pɑ́Ꞌ pʉʉ sɛ́ ŋ́ɡɛ lɑ́.

1 Timɔtɛ́ɛ 1:4

Cú mbɔ̌ pɔ́p ŋɡɔ pɔ́p nɑ́ mɛnu-mɑ́pitsɔꞋ, pɔ́p mɛlík pɛmɑ̂ɑŋɡɑpnjẅɛt pɔ́p pi pɔ́p sɑ́ŋnɛ ɛ́ pɔɔ ḿmɛ. Yîyɑ́ ntɛ́ mɛnu ɡɛ pɛ́ zɔŋ nu pɔ níinɛ, ɛ́ pɔɔ cẅɛ́lɛ́ nɛjí yúu mi Sɛ́ kɑ kwɑŋɛ́nɛ nɛɡɛ ŋumɛsɔŋ luk pɔ́. Pɛ́ lɔk pɔ nɛzɑ́p tʉ́m nǔu Sɛ́ lɑ ńjí yîyɑ́ yúu.

Ɛ́bɛlʉʉ 4:9

Ɛ́ lɔk pɔ́Ꞌɔ, ńcú ŋɡɔ: Mɔ́fíitɛ ẅi Sɛ́ kɑ fɑꞋnɛ mɛfɑꞋ mɛ́ tɛ ŋ́ɡẅɛɛ nǔu lɛ́Ꞌlɑ́Ꞌ mbɑ́ɑtɛ sɑɑmbɑ́, pɛn ńtʉ́ʉ tʉ́ʉnɛ ḿbɔ́ ńzẅíꞋlɛ pʉɔ-Sɛ́.

Jẅidɛ 1:20

Lɑ́ ŋ́ɡʉ nǔu pʉʉ mbɑ̌ɑ pɛsúu pɑ́ɑ pɛ́ tʉʉndɛn, pʉʉ kẅiꞋ ńnɛn pɔ nǔu sẅiŋɛ yi pɛ́ kɑ zíꞋnɛ wʉ́ʉ ɛ́ fú mbɔ̌ Sɛ́ pʉʉ pɛ́m lɑ́. Pʉʉ lɔk mɛtʉʉ-Zẅikŋɛ Lɛ́ɛnɛ́nɛ ńcɛꞋlɛ Sɛ́.