ZEHPANI 3:9 - Jinghpaw Common Language Bible 2009

⁹ “Dai hpang, ngai gaw masha amyu baw ni hpe galai kau nna shanhte gaw kaga hpara ni hpe n nawku ai sha ngai kaw chyu akyu hpyi wa na mara ai. Shanhte yawng nye a ga matsun ni hpe madat mara hkan sa na mara ai.

Jinghpaw Hanson Version Bible

⁹ “Dai hpang e, amyu baw ni mahkra gaw, Yehowa amying hpe shaga nna, myit langai sha hte shi hpe daw jau lu hkra, ngai shanhte hpe san seng ai n-gup jaw na nngai.

ZEHPANI 3:9 ပူးပေါင်းရင်းမြစ်များ

NINGPAWT NINGHPANG 11:1

Shawng e, mungkan ga ting na masha amyu ni hta tsun shaga ai ga langai sha nga ai rai nna dai ga hpe lang nga ma ai.

NINGPAWT NINGHPANG 4:26

Shet mung shadang sha langai lu ai rai nna shi hpe Enusha ngu nna shamying wu ai. Dai aten kaw nna nawku daw jau ai hta dai Madu a chyoi pra ai mying ningsang hpe amyu masha ni lang hpang wa masai.

SHAKAWN KUNGDAWN 113:3

Jan pru ai kaw nna, jan shang ai aten du hkra, Dai Madu a mying nsang hpe shakawn nga mu!

SHAKAWN KUNGDAWN 22:27

Amyu baw ni yawng hte gaw Madu hpe dum na mara ai. Mungkan shara shagu de na masha ni shi kaw kayin wa na mara ai; Masha amyu baw yawng hte mung, shi hpe nawku daw jau na mara ai.

ESAIA 19:18

Dai aten du ai shaloi, Egutu mung na mare manga hta Hebre ga shaga wa na mara ai. Dai masha ni gaw Chyahtum Chyalai N-gun rawng nga ai dai Madu a mying nsang hta shanhte a ga shaka dagam da na mara ai. Mare langai mi gaw “Jan a Mare,” ngu shamying hkrum na ra ai.

ESAIA 57:19

Ngai gaw ni ai, tsan ai shara hkan nga ai ni yawng hpe ngwi pyaw sim sa lam jaw na nngai! Ngai gaw nye a amyu masha ni hpe shamai shatsai na nngai.

ESAIA 6:7

Shi gaw dai grung nga ai wan n-ga hte nye a nten hpe ahtawk ya let, “Ndai hte na a nten hpe hkra ya sai, ya gaw na a mara mung n nga mat nit dai, na a yubak ni hpe raw dat kau ya sai,” ngu nna tsun ai.

YEREMIA 16:19

Madu e, nang gaw ngai hpe makawp maga ai hte n-gun atsam jaw ya ai wa rai nga ndai; nang gaw ngai hpe ru tsang hkrum ai aten ni hta karum la nga ndai. Mungkan ga a jahtum de na amyu baw ni gaw nang kaw du sa wa nna, “Anhte a kaji kawa ni gaw hpara sumla ni hta kaga hpa mung n nga nga ai, dai ni gaw hpa akyu n rawng ai hte kaman lila hkrai rai nga ai.

EZEKELA 37:17

Dai hpang, hpun chyen lahkawng yan a matu yan hpe langai sha tai mat hkra, na a lata hta lang da u.

HABAKU 2:14

Rai ti mung, Panglai ni gaw hka hte hpring nga ai zawn ginding aga gaw dai Madu a hpung shingkang a machye machyang hpaji hte hpring nga na ra ai.

ZEHPANI 2:11

Dai Madu gaw shanhte hpe jahkrit shama dat na ra ai. Shi gaw aga ting na karai ni hpe kaman de shayu kau tawn na ra ai, shaloi masha amyu baw shagu gaw shanhte a shara kaw na shi hpe nawku na mara ai.

ZEHKARIA 14:9

Dai hpang, dai Madu gaw mungkan ting a hkawhkam tai na ra ai; masha shagu mung shi hpe Karai Kasang hku nawku nna shi a amying maren sha rai nga ai hpe chye lu na mara ai.

ZEHKARIA 2:11

Dai aten e, masha amyu baw law law ni dai Madu hpang de sa wa nna, shi a amyu masha ni tai wa na mara ai. Shi gaw nanhte a ka-ang hta shanu nga nna, nanhte hpang de ngai hpe shi shangun dat ai hpe nanhte chye lu na marin dai.

MAHTE 12:35

Kaja ai wa gaw tinang a kaja ai sut dek hta na kaja ai arai ni shapraw wu ai; n kaja ai wa mahtang gaw, n kaja ai sut dek hta na n kaja ai arai ni shapraw wu ai.

EHPESU 4:29

Nse ai ga hkaw mi mung nanhte a n- gup na n pru u ga, madat mara nga ai ni a matu akyu byin hkra ra nga ai hte maren shadaw shalan na matu mai kaja ai ga sha atsun nga mu.

SHINGRAN 11:15

Dai hpang sanit ngu na lamu kasa gaw shi a pahtau dum dat wu ai. Shaloi sumsing lamu hta e nsen kaba ngoi pru wa ai gaw, “Mungkan ga na mungdan hpe up na ahkang aya gaw, anhte a Madu Meshia a lata de rai nga sai rai nna, shi gaw htani htana prat dingsa e a up nga na sai law!,” nga nna tsun nga ai.