YONA 1:4 - Jinghpaw Common Language Bible 2009

⁴ Rai ti mung dai Madu gaw ja la ai nbung shangun dat ai rai nna dai nbung laru gaw grai ja ai majaw sanghpaw li gaw agrawp mat na daram hkrit tsang ra nga ai.

Jinghpaw Hanson Version Bible

⁴ Yehowa chyawm gaw, dai nammukdara hta nbung kaba shangun dat wu ai: dai sanghpaw li ganoi noi agrawp mat hkra, nammukdara hta laru kaba ru wa ai. Shing rai li ma ni gaw, hkrit nga ma ai rai nna, langai hte langai tinang a hpara hpe hpyi jahtau nga ma ai:

YONA 1:4 ပူးပေါင်းရင်းမြစ်များ

SHAKAWN KUNGDAWN 135:6

Sumsing lamu hte ginding aga hta e mung, panglai ni hte sung la ai shara shagu hkan e mung, shi myit ai hte maren, galaw nga ai.

SHAKAWN KUNGDAWN 135:7

Mungkan ga a jahtum shara kaw nna laru sumwi ni hpe shi sharawt dat nna; nbung laru a matu myi hprap wan gala ya ai hte shi a dum kata kaw nna, nbung hpe mung shapraw dat wu ai.

PRU MAT 10:13

Shaloi Mawshe gaw shi a dawhkrawng sharawt dat wu ai shaloi dai Madu gaw sinpraw nbung hpe dai mung a ntsa e shani shana bung shangun nhtawm, jahpawt rai jang, dai nbung gaw dinggam-yaw ni hpe woi kanawng da wu ai.

PRU MAT 10:19

Dai Madu gaw sinpraw nbung a malai n-gun ja htum ai sinna nbung hpe dat dat nhtawm dinggam-yaw ni hpe magawn mat wa nna Nawng Hkyeng hta jahkrat bang kau wu ai. Egutu mung ting hta dinggam-yaw langai mung ngam nga ai n rai.

PRU MAT 14:21

Mawshe gaw shi a lata hpe panglai ntsa de ladawn dat wu yang, dai Madu mung n-gun ja ai sinpraw nbung hte panglai hka hpe kanawng shabai da wu ai. Nbung dai gaw shana tup bung nga ai rai nna panglai gaw hkun hkraw ai hkarang ga tai mat nga ai. Dai hka mung garan mat nga sai majaw,

PRU MAT 15:10

Rai ti mung Madu e, nang kaw na nsa shapraw dat yang, Egutu masha ni yawng lup si mat ma ai; dai hkrit hpa hka de, machyu zawn shanhte lup mat ma ai.

YEREMIA 51:16

Shi a hkang da ai ga a majaw, sumsing lamu ntsa na hka ni wu kadu wa nna, shi gaw mungkan ga htum kaw nna sumwi ni hpe shamawng dat wu ai. Shi gaw marang kata hta myihprap gala shangun nna, shi a dum kata kaw na nbung hpe shangun dat wu ai.

AMO LAIKA (AMOS) 4:13

Karai Kasang gaw bum ni hpe galaw da ai wa rai nna nbung hpe hpan da nga ai. Shi gaw shi a myit mang lam masha ni hpe chye shangun nga ai; shi gaw nhtoi hpe nsin galai kau nga ai. Shi gaw ginding aga a tsaw ai shara ni hta hkawm nga ai. Ndai gaw shi a amying shingteng rai nga ai: Chyahtum Chyalai N-gun rawng ai Madu Karai Kasang rai nga ai!

BU HKAWM 11:31

Dai Madu gaw nbung hpe akajawng sha shabung dat nhtawm panglai de na u preng ni hpe ga ntsa kaw nna pe masum du hkra pyen shayu dat wu ai. Dai ni gaw dap ntsa hte de a grup yin deng tsawmra mi tsan hkra man maga shagu de hkrat nga ai.