YEREMIA 7:9 - Jinghpaw Common Language Bible 2009

⁹ Nang gaw arai lagu ai, masha sat ai, numshaw lashaw amu shut hpyit ai, masu ga tsun nna dagam ai, Bala hpara hpe shagu hkungga nawng jau ai, shawng de nang garai n chye yu ai karai ni hpe nawku nga ndai.

Jinghpaw Hanson Version Bible

⁹ “Nanhte gaw masha rai lagu ai, masha sat ai, num shaw la shaw ai, n teng n man ai hku dagam ai, Bala man e manam pyaw ai baw nat nawng nna, tinang n chye ai hpara hpang de hkan nang let,

YEREMIA 7:9 ပူးပေါင်းရင်းမြစ်များ

1 HKAWHKAM 18:21

Elia mung amyu masha ni nga ai de lung wa nhtawm, “Nanhte gaw gade na hkra hpa mung n daw dan ai nga nga na ngu nga myit ni? Dai Madu gaw Karai Kasang rai nga ai rai yang, shi hpe nawku mu; rai ti mung Bala mahtang karai kasang rai yang gaw shi hpe nawku mu!,” ngu nna tsun wu ai. Rai ti mung amyu masha ni chyawm gaw ga hkaw mi pyi n htan ai sha nga nga ma ai.

PRU MAT 20:3

“Ngai hta kaga karai kasang shaje hpe nawku lu na n rai.

ESAIA 1:13

Nanhte a shagu hkungga ni la sa tim, dai gaw kaman lila rai nga ai. Nanhte nat nawng ai manam pyaw ai sama hpe mung ngai matsat nngai. Nanhte galaw ai Shata Praw na Lusha poi, Bansa Nhtoi ni, hte makam masham hpawng ni hpe ngai n yu sharang lu nngai; dai ni mahkra gaw nanhte galaw ai yubak mara ni a jaw e hten mat nga sai.

ESAIA 58:2

Shanhte gaw ngai hpe shani shagu nawku ma ai, shanhte gaw nye a lam ni hpe chye na matu hte nye a tara ni madat mara na matu grai sharawng ma ai lam tsun ma ai. Shanhte gaw shanhte hpe teng man ai tara ni jaw ya na matu hte ngai hpe nawku ai hta shanhte awng sharawng nga ai lam tsun ma ai,” ngu nna tsun ai.

YEREMIA 1:16

Shanhte gaw yubak shut hpyit masai; shanhte ni ngai hpe kau da masai, kaga karai ni hpe shagu hkungga nawng ya masai, hpara sumla ni galaw nna dai ni hpe nawku nga masai majaw nye a amyu masha ni hpe ngai ari jaw na nngai.

YEREMIA 11:13

Yuda amyu masha ni gaw shanhte a mare ni law nga ai made karai ni mung law nga ma ai; Yerusalem mare masha ni mung mare kata hta nmaw lam ni law nga ai zawn matsat shabat re ai Bala hpara hpe shagu hkungga nawng jau ya na matu tawn hkungri ni hpe gaw sharawt da nga manu ai.

YEREMIA 11:17

“Chyahtum Chyalai N-gun hte hpring ai dai Madu ngai nan, Israela hte Yuda hpe hkai da ni ai; rai ti mung, ya gaw, ngai shanhte hpe ru yak tsin-yam tsindam hte jahkrit na nngai. Shanhte shut hpyit ai amu galaw ma ai majaw shanhte gaw shanhte hkum nan a matu ndai amu shapraw manu ai; shanhte gaw Bala hpara a man e, shagu hkungga nawng jau ai lai hte ngai hpe pawt sindawng shangun da mi ai,” ngu nna tsun wu ai.

YEREMIA 13:10

Ndai n hkru ai masha ni gaw nye a ga hpe hkan sa madat mara na matu n hkap la ma ai. Shanhte gaw shawng de na zawn du ja ai hte n hkru nga ma ai rai nna kaga hpara ni hpe nawku ai hte daw jau ma ai. Shanhte gaw loi mi pyi n kaja mat sai hte tsam mat sai ndai shingkyit ni zawn tai mat na mara ai.

YEREMIA 18:15

Timung, nye a amyu masha ni ngai hpe malap kau manu ai; shanhte gaw hpara sumla ni hpe manam pyaw ai baw nat nawng ma ai. Shanhte gaw shanhte hkawm sa ang ai hkrun lam hta ahtu kataw mat ma ai; shanhte gaw moi na lam dingsa hta loi mi mung n hkan mat ma ai; shanhte gaw n san da ai lam ntsa hkan e she, hkawm nga ma ai.

YEREMIA 19:4

Ngai gaw ndai amu hpe galaw na nngai, hpa majaw nga yang, amyu masha ni gaw ngai hpe kau da manu ai; shanhte mung, shanhte a kaji kawa ni mung, Yuda hkawhkam ni mung n chye ai kaga karai ni hpe ndai shara ni hta shagu hkungga ni nawng jau ai hte matsat shabat di kau manu ai. Shanhte gaw ndai shara hta mara n kap ai amyu masha ni a asai ni hte jahpring manu ai,

YEREMIA 32:29

dai hpe wan nat kau na mara ai. Ngai hpe pawt sindawng shangun na nga, nta ni a ntsa e Bala hpara hpe manam pyaw ai baw nat nawng nna, kaga hpara ni hpe sabyi ntsin ru jaw ai hkungga nta ni hte hpawn shanhte gaw dai mare hpe jahkru kau na mara ai.

YEREMIA 44:3

hpa majaw nga yang, shanhte a amyu masha ni gaw n hkru ai amu galaw nna ngai hpe masin pawt shangun nga ma ai. Shanhte gaw shanhte mung, nanhte mung, nanhte a nji nwa ni galoi mung n nawku yu ai kaga karai ni hpe shagu hkungga nawng ya nna daw jau nga ma ai.

YEREMIA 44:8

Nanhte sa du shanu nga ai ndai Egutu mung hta, hpara sumla ni hpe nawku ai lai hte kaga hpara ni hpe nawng jau ai lai galaw let, ngai hpe hpa majaw pawt sindawng shangun nga myit ta? Nanhte hkum hpe shaza na matu mung, mungkan ga na masha amyu baw shagu gaw nanhte hpe asawng asang shatan nhkan ga tsun kau na matu mung, na a mying gaw dagam dala, matsa mawa ga tsun ai zawn lang na matu mung, nanhte gaw ndai n hkru ai amu hpe galaw nga myit ni?

YEREMIA 44:9

Yuda mung na mare ni hte Yerusalem mare lam ni hta nanhte a nji nwa ni galaw ai yubak, nanhte hte nanhte a madu jan ni galaw ai yubak ngu ai dai n hkru n shawp ai amu ni yawng hpe nanhte malap kau manu ni?

YEREMIA 48:35

Shanhte nawku ai shara ni hta wan nat hkungga nawng jau nna, hpara ni hpe shagu hkungga nawng jau ya nga ai Moba amyu masha ni hpe ngai jahtum kau na we ai. Dai Madu ngai nan tsun ni ai.

YEREMIA 5:2

Nang gaw dai Madu hpe nawku na matu tsun tim pyi, nang tsun ai ga hpe nang lachyum n shapraw nga ndai.

YEREMIA 5:7

Dai Madu gaw, “Ngai gaw hpa majaw nye a amyu masha ni a yubak ni hpe raw ya ang nga a ni? Shanhte gaw ngai hpe kau da ai hte karai ajet n rai nga ai ni hpe nawku manu ai. Ngai gaw nye a amyu masha ni hkru kat ai aten du hkra jaw sha ni ai, rai ti mung, shanhte gaw lashaw numshaw amu shut hpyit nhtawm shawa num ni hte shanhte a aten shama nga ma ai.

YEREMIA 7:6

Malet nhprang manam, jahkrai nmai hte gaida gaina ni hpe zai hku adip arip hkum galaw et; Ndai lamu ga hta nga ai mara n kap ai masha ni hpe sat ai lam hkum galaw et. Kaga karai ni hpe nawku ai majaw nang jahten shaza kau ai n hkrum u ga, dai hpe tawn kau u.

EZEKELA 18:18

Lam maga mi hku tsun ga nga yang, shi a kawa chyawm gaw maw lu maw sha nna adip arip di wu ai hte masha shagu hpe n hkru ai amu tut nawng galaw nga ai. Dai rai nna shi hkum nan shut hpyit kau ai yubak ni a majaw shi si nga ai.

EZEKELA 20:30

Nanhte gaw nanhte a kaji kawa ni galaw shut hpyit ai yubak hte maren shanhte a hpara sumla hpang de hpa majaw hkan nang mayu nga myit ni?, ngu nna ngai san nga ai ga, dai Israela amyu masha ni hpe ya jang tsun dan u.

EZEKELA 23:39

Shan gaw hpara sumla ni hpe nawng jau na shagu hkungga ni hpe zawn, nye a kasha ni hpe sat ma ai; shan gaw dai shani jang, nye a Nawku Htingnu de sa nna dai hpe awu asin di kau ma ai!

EZEKELA 5:11

“Dai re ai majaw, Ngai gaw ahkrung nga ai Karai Kasang rai nga nngai, dai re ai majaw, ndai gaw Tsaw Htum ai dai Madu a mungga rai nga ai. Nang gaw nye a Nawku Htingnu hpe nang galaw ai n hkru ai amu yawng, matsat shabat re ai amu ni hte awu asin di kau nit dai majaw ngai gaw matsan dum ai myit n rawng ai sha nang hpe kran kadang kau na nngai.

HOSEA 2:13

Ngai gaw shi ngai hpe malap kau nna Bala hpara hpe manam pyaw ai baw nat nawng nna shi hkum hpe ja lung seng ni hte mawn sumli nna shi a sumtsaw ni hpang hkan mat wa ai aten ni a matu ari jaw na nngai.

HOSEA 6:9

Hkinjawng ni mung masha langai hpe lagyim ala nga ai damya hpung mi hte bung nga ma ai. Shehkem mare na chyoi pra ai shara de sa wa ai lam hta pyi shanhte masha sat ma ai. Shanhte gaw ndai n hkru ai amu yawng hpe dasang galaw ma ai.

AMO LAIKA (AMOS) 4:5

Karai Kasang kaw chyeju dum ai myit hte sa nna nanhte a muk nawng jau mu, nanhte la sa ai shajan hkungga ni tsun shakawng dan mu! Dai zawn re ai amu galaw na nanhte tsaw nga myit dai.

ZEHPANI 1:5

Kadai mung tinang nta ntsa de lung wa nna ajan, shata hte shagan ni hpe nawku nga ai ni hpe ngai jahten kau na we ai. Ngai hpe nawku daw jau ai hte ngai hta ga sadi dung nga na nga nna dagam da ai ni ngai kaw nna htak mat wa nhtawm Molek hpara a mying nsang hta ga shaka la ai ni hpe ngai shamyit kau na we ai.

MALAHKI 3:5

Chyahtum Chyalai N-gun rawng ai dai Madu gaw, “Nanhte hpe tara jeyang na matu ngai du sa nna shaba wawt ai ni, numshaw lashaw ai ni, masu let dagam ai ni bungli galaw masha ni a shabrai masu hkalem sha ai ni, gaida ni, jahkrai nmai ni hte maigan masha ni hpe zai hku nna roi rip ai ni hte ngai hpe n hkrit hkungga ai ni hpe kalang dat ngai sakse tai na nngai,” ngu tsun ai.

ROMA 2:2

Shing re ai amu ni hpe galaw ai masha ni a ntsa e Karai Kasang jeyang daw dan ai gaw, teng man nga ai hpe anhte chye nga ga ai.

TARA JAHPRANG 32:17

Shanhte gaw karai jet n re ai ni hpe mung, shanhte a kaji kawa ni galoi mung n chye ai hpara ningnan ni hpe mung, Israela ni galoi mung n madat n mara yu ai hpara ni hpe mung hkungga nawng ya ma ai.

SHINGRAN 21:8

Rai ti mung, hkrit ai myit rawng ai ni, n kam n sham nna sadi n dung ai ni, n hkru n kaja matsat shabat re ai ni, masha sat ai ni, hpye ai amu galaw ai ni, mandan lakle galaw ai ni, sumla nawku ai ni hte, masu magaw ga tsun ai ni yawng hte gaw, wan hte kan grung ai nawng hta ari hkrum lu na mara ai: dai gaw lahkawng lang na si ai lam rai nga ai, nga nna ngai hpe tsun ai.

SHINGRAN 22:15

Rai ti mung, masha zawn pyi n rai hkra n hkru n kaja ai ni, mandan lakle galaw ai ni, hpye ai amu galaw ai ni, masha sat ai ni, sumla nawku ai ni hte masu magaw lam sharawng awng let hkan galaw ai ni yawng hte gaw, mare shinggan e nga lu na mara ai nga nna ngai hpe tsun nngai.

TARA AGYI 5:8

Israela masha ni hpara nnan lata la ma ai shaloi, mungdan kata majan pru nga ai; Israela mun mali hta ninggang langai hpai lu a ni? Nri langai hpai lu a ni?