YEREMIA 4:4 - Jinghpaw Common Language Bible 2009

⁴ Dai Madu ngai hte tawn da ai na a ga shaka hpe shagrin da u; Yuda hte Yerusalem amyu masha ni e, na a hkum hpe ngai hta ap nawng tawn u. Dai hku nang n galaw ai rai yang, nang galaw kau sai n hkru ai amu ni a majaw nye a pawt sindawng ai gaw wan zawn hkru na ra ai. Dai gaw hkru nna dai hpe kadai mung krip lu na ra ai n rai,” ngu nna tsun wu ai.

Jinghpaw Hanson Version Bible

⁴ Yuda hte Yerusalem masha ni e, Yehowa matu mara tinang dai matu gadoi hkam mu; nanhte a myit masin a hpyi magap hpe hkoi kau mu; shing n rai, nanhte a n hkru n hkra ai amu majaw, nye a pawt sindawng ai gaw wan zawn pru nna, kadai n sat lu hkra hkru na ra ai.

YEREMIA 4:4 ပူးပေါင်းရင်းမြစ်များ

2 HKAWHKAM LABAU 34:25

Shanhte gaw ngai hpe ningdang kau nna kaga karai shaje ni hpe shagu hkungga ni nawng ya ai amu yawng mayawng galaw let ngai hpe pawt sindawng shangun nga masai. Nye a masin kahtet ai gaw Yerusalem hpe hkap daw na masin shalut ya nga ai rai nna dai gaw krip mat na n rai.

ESAIA 10:17

Karai Kasang, Israela a nhtoi gaw wan tai na ra ai. Israela a chyoi pra ai Karai Kasang gaw wan shinglet tai na ra ai, dai gaw lani mi hta sha arai shagu hte hpe hkru kau na ra ai, ju hpun ni hte sumwum ni hpe pyi hkru kau na ra ai.

ESAIA 30:33

Moi chyaloi nhkoi kaw nna Asuri hkawseng hpe nat na matu wan htung kaba shara mi hkyen da nga ai. Dai gaw sung ai hte dam lada rai nna hpun ni hte sumpum shatsaw da nga ai. Dai Madu gaw dai shara hta wan shachyi na matu wan shinglet gawut bang dat na ra ai.

ESAIA 51:17

Yerusalem e, rawt u! Nang hkum nan jasu nna rawt u! Nang gaw dai Madu masin kahtet ai majaw nang hpe jaw lu ai ari gawm hpe lu kau nga ndai; Nang gaw dai hpe lu kau ai majaw, dai gaw nang hpe ndi nda byin shangun nga ai.

YEREMIA 15:14

Nye a myit kahtet ai gaw wan zawn rai nna dai gaw htani htana agrung nga na ra ai majaw, shanhte hpa mung n chye ai mungdan hta shanhte a gumlau hpyen ni a man e daw jau shangun na we ai,” ngu nna tsun ni ai.

YEREMIA 21:5

Ngai gaw nang hpe nye a n-gun mahkra hte, pawt sindawng ai, n-yun bu ai, masin kahtet ai hte hkap gasat na nngai.

YEREMIA 23:19

Shi a pawt sindawng ai gaw nbung laru rai nga nna dai sindawng kahtet ai bungsha gaw n hkru ai wa a baw ntsa e ahpawt na ra ai,

YEREMIA 36:7

Dai Madu gaw ndai amyu masha ni hpe shi a hkrit hpa pawt sindawng ai hte myit kahtet let jahkrit shama nu ai majaw, shanhte gaw n hkru n shawp ai amu kaw na kayin wa nhtawm dai Madu hpe akyu hpyi dam wa ma nhten.”

YEREMIA 44:22

Nanhte a n hkru n shawp ai hte matsat shabat re ai arawn alai ni hpe dai Madu gaw loi mi pyi n lu sharang nu ai majaw, nanhte a mungdan gaw dai ni rai nga ai hte maren shingran sharat katsi mat ai hte dai mung hta kadai mung shanu nga ai n rai. Dai gaw yu hkrit hpa shara tai mat nna dai mungdan a mying hpe mung masha amyu ni dagam dala ga tsun ai hta lang nga ma ai.

YEREMIA 9:25

Dai Madu gaw, “Egutu, Yuda, Edom, Amon, Moba masha ni hte kara kadun daw nna zaibru jang e nga ai masha ni hpe ngai ari jaw na aten du wa ra ai. Ndai amyu masha ni yawng hte wa matu gadoi nga ma ti mung, dai hpe masat dingsat galaw ai ga shaka hpe n kam ma ai. Ndai amyu masha ni hte Israela amyu masha ni langai mi mung nye a ga shaka hpe n hkan nga ma ai,” ngu nna tsun ai.

SHARUNG SHAYAWT 4:11

Dai Madu gaw shi a sindawng kahtet ai n-gun tup hpe ru dat nu ai; shi gaw Ziun hpe ga du hkra hkru kau ai wan shachyi nu ai.

EZEKELA 16:38

Ngai gaw nang hpe la shaw ai amu hte masha sat ai amu a matu daw dan na nngai; nye a pawt sindawng ai hte myit kahtet ai hta, ngai nang hpe si ari jaw na nngai.

EZEKELA 18:31

Nanhte galaw shut kau yu sai n hkru ai amu mahkra hpe kau da nhtawm myit nnan, myit masin nnan ni hpe hkam la mu. Israela amyu masha ni e, nanhte hpa majaw si mayu nga myit ni?

EZEKELA 20:33

“Ngai gaw Tsaw Htum ai dai Madu, ahkrung nga ai Karai Kasang rai nga nngai, dai majaw nye a masin kahtet ai hta ngai nanhte hpe nye a n-gun ja ai lata, nye a daru magam n-gun mahkra hte up na nngai, ngu ngai nanhte hpe shadum nngai.

EZEKELA 21:17

Ngai mung lata lahpawk dum ai hte nye a sindawng kahtet ai gaw kawp mat na ra ai. Dai Madu ngai nan tsun ni ai.”

EZEKELA 24:13

Yerusalem mare e, na a nse nsa ai arawn alai ni gaw nang hpe awu asin di kau nit dai. Nang hpe ngai jasan shapra na shakut ti mung, nang awu asin naw hkrum nga ndai. Nye a n-gun tup sindawng kahtet ai hpe nang n hkam sha dingsa, jasan jaseng hkrum na ndai n rai.

EZEKELA 24:8

Ngai gaw masin pawt ai matai dawp la lu hkra, makoi magap n lu ai dai shara hta asai tawn da ni ai.”

EZEKELA 44:7

Nye a matu ngu nna sau man hte shagu hkungga asai ni hpe nawng ya myit dai shaloi, nye a ga n madat n mara ai maigan masha ni ngu ai matu n gadoi ai ni hpe jashawn nna nye a Nawku Htingnu hpe awu asin di kau nga myit dai. Dai rai nna nye a amyu masha ni gaw shanhte galaw kau sai matsat shabat amu ni yawng a jaw e, nye a ga shaka hpe jahten kau manu ai.

EZEKELA 6:12

Tsan tsan e nga ai ni mung machyi makaw hkrum nna si mat na mara ai; ani sha nga ai ni mung hpyen majan hta sat kau hkrum nna naw ngam nga ai ni gaw kawsi kyet ai hte si mat na mara ai. Shanhte yawng hte gaw nye a sindawng kahtet ai n-gun namchyim hkam sha na mara ai.

EZEKELA 8:18

Shanhte gaw nye a sindawng kahtet ai n-gun yawng hpe hkam sha na mara ai. Ngai gaw shanhte hpe jahkrung da na n rai; ngai shanhte hpe matsan dum na n rai. Shanhte gaw ngai hpe marawn jahtau lu ai daram hpyi jahtau ma ti mung, shanhte a hpyi jahtau ai nsen hpe ngai madat ya na n rai,” ngu nna tsun wu ai.

JAW JAU 26:28

nanhte hpe ngai pawt sindawng ai hte nhtan shai ai hku galaw nna shawng na hta grau sawng ai yubak ari htam sanit bai jaw na made ai.

JAW JAU 26:41

ngai hte nhtan shai shangun sai majaw shanhte a gumlau hpyen ni a mung de sa kau dat ai hpe shanhte yin la na mara ai. Hpang jahtum e, nanhte a amyu matu ni shagrit shanem ai hte shanhte a yubak mara hte gumlau ai amu a ari hpe hkam la ai shaloi,

AMO LAIKA (AMOS) 5:6

Dai Madu kaw sa mu, nanhte hkrung nga lu na rai myit dai. Nanhte n sa ai rai yang, Israela amyu masha ni a ntsa e wan hkrat bun ai zawn ye magawn mat wa na ra ai. Wan gaw Behtela masha ni hpe hkru kau nna kadai mung dai hpe sat kau lu na ra ai n rai.

ZEHPANI 2:2

nanhte gaw nbung e shapoi kau hkrum ai numhkaw zawn garai n gawt kau hkrum ai hte dai Madu a masin kahtet ai gaw garai n hkru ai sha nanhte a ntsa de garai n du ai hte shi a sindawng kahtet ai hpe madun ai shani garai n du yang, nanhte a n hkru ai lam hpe hpyi nem nga mu.

ROMA 2:25

Dai jep ai Tara hpe hkan shatup myit yang gaw, matu gadoi hkam ai lam akyu rawng nga ai; rai ti mung tara hpe tawt lai ai wa nang rai nga n yang gaw, matu gadoi ai hking galoi mung n hkam la ai mahtang grau kaja nga ai.

TARA JAHPRANG 10:16

Dai re ai majaw ya kaw nna dai Madu a ga hpe madat mara nga mu; du hkum shaja da nga myit.

TARA JAHPRANG 30:6

Nanhte hpe mung, nanhte a amyu matu mara ni hpe mung madat mara chye ai myit masin, dai Madu nanhte a Karai Kasang jaw ya na ra ai rai nna nanhte a myit masin kraw lawang mahkra hte shi hpe tsaw ra lu na rai myit dai; shing rai dai mungdan hta nanhte anga nga lu na rai myit dai.

TARA JAHPRANG 32:22

Nye a masin kahtet ai gaw wan zawn grung wa nna, ginding aga ntsa na arai shagu hpe hkru kau na ra ai. Dai gaw mungkan ga a lawu tsang de du hkra dep nna, bum ni a npawt nhpang ni hpe hkru kau na ra ai.

KOLOSE 2:11

Nanhte gaw Dai Madu hte langai sha tai nna asak hkrung ai shaloi e matu gadoi hkam la manit dai rai nga ai. Dai gaw masha a lata hte galaw ai n re ai sha, ndai yubak kap ai hkum shan a n-gun atsam kaw na shalawt dat ai ngu ai Hkristu e shabyin ai matu gadoi hkam ai lam rai nga ai.