YEREMIA 2:3 - Jinghpaw Common Language Bible 2009

³ Israela e, nang hpe chyu sha ngai madu nngai; nang gaw nye a matu chyoi pra nga ndai. Ngai gaw nang hpe machyi shangun ai masha shagu a ntsa e nni nkri hte tsin-yam tsindam dat dat nngai. Dai Madu ngai nan tsun ni ai,” ngu nna tsun ai.

Jinghpaw Hanson Version Bible

³ Dai shaloi e Israela gaw Yehowa a matu chyoi pra nga ai hte, shawng si ai nsi naisi rai nga ai; shi hpe map sha maw sha ai ni yawng mara kap nga ma ai; shanhte a ntsa e shoihpa shoirang du na ra ai,” nga nna Yehowa tsun ai.

YEREMIA 2:3 ပူးပေါင်းရင်းမြစ်များ

PRU MAT 22:29

“Shawng myin ai na a nsi naisi, sabyi jahku hte tsanlun sau ni ngai hpe jaw jau lu na rai ndai. Shawng shaprat ai na a shadang sha alat ni ngai hpe jaw na rai ndai.

PRU MAT 23:16

“Nanhte nsi naisi shu hpang wa ai shaloi, Nlung Nnan Poi galaw na rai myit dai. Nanhte a sabyi sun hte namsi namsaw sun ni kaw na namsi namsaw shinggyin la ai mangai aten hta Nmut Shinggyin Poi mung galaw lu na rai myit dai.

ESAIA 41:11

“Nang hpe pawt sindawng ai ni gaw hkrat sum ai a kaya kahpa lam hpe chye wa na mara ai. Nang hpe gasat ai ni si mat na mara ai

ESAIA 47:6

Ngai gaw nye a amyu masha ni hpe masin pawt ni ai; ngai gaw shanhte hpe nye a matu zawn kachyi mi mung n sawn ai sha di kau ni ai: Ngai gaw shanhte hpe na a daru magam n-gun npu hta tawn da ni ai, nang shanhte hpe matsan dum myit n madun ndai, asak kaba sai ni hpe pyi laja lana di nga ndai.

YEREMIA 12:14

Dai Madu gaw, “Nye a amyu masha Israela hpe ngai jaw tawn ai lamu ga hpe jahten sharun kau ya ai Israela a htingbu ni hte seng nna tsun dan na lam lama mi ngai lu nngai. Ngai gaw hkai bawng hpe gang baw kau ai zawn n hkru ai amyu masha ni hpe shanhte a mungdan ni kaw na baw kau na we ai; ngai gaw Yuda mung hpe shanhte a lata kaw nna hkye mawai la na nngai.

YEREMIA 2:4

Yaku a aru arat ni hte Israela a amyu bawsang ni e, dai Madu a mungga hpe madat mu.

YEREMIA 30:16

Rai ti mung, ya chyawm gaw, nanhte hpe kawa sha ai ni yawng hte gaw kawa sha kau ai hkrum na mara ai, nanhte a gumlau hpyen ni yawng bawng dung masha ni zawn woi la ai hkrum na mara ai. Nanhte hpe dip gamyet sha ai ni yawng dip gamyet sha ai hkrum na mara ai, nanhte hpe hpya lu hpya sha ai ni yawng hpya lu hpya sha ai bai hkrum na mara ai.

YEREMIA 50:7

Shanhte hpe mu ai ni yawng gaw shanhte hpe gasat kau nga ma ai. Shanhte a gumlau hpyen ni gaw, ‘Shanhte gaw dai Madu hpe yubak galaw shut kau manu ai, dai rai nna anhte galaw kau ai amu gaw shut ai n rai. Shanhte a kaji kawa ni gaw dai Madu hpe kam hpa ma ai, shanhte hkum nan mung shi hta sadi dung nga ang ma ai,’ ngu nna tsun ma ai.

YOELA 1:3

Dai hte seng ai lam nanhte a kashu kasha ni hpe tsun dan mu; shanhte mung shanhte a kashu kasha ni hpe tsun dan na mara ai, hpang prat ban mi hte ban mi hkai shachyaw mat wa na mara ai.

AMO LAIKA (AMOS) 6:1

Nanhte a matu Ziun hta ndai zawn ngwi pyaw ai asak hkrun lam lu la ai hte Samari mung e sim sa shim ai lam hkam sha lu ai, ndai galu kaba ai Israela amyu baw a galu kaba ai ningbaw ni kaw karum la na matu sa du ai masha ni gaw nanhte a matu kade wa hkrit hpa rai na rai nga a hka!

HABAKU 1:11

Dai hpang, shanhte gaw nbung zawn poi mat wa nna hkoi mat ma ai. Ndai masha ni a daru magam n-gun gaw shanhte a karai rai nga ai,” ngu nna tsun nu ai.

ZEHKARIA 1:15

atsin zim rai let ngwi pyaw sim sa ai hta kabu gara nga ai masha amyu baw ni hpe ngai masin grai pawt nngai. Ngai gaw nye a amyu masha ni hpe loi mi sha pawt yang, masha amyu baw ni mahtang grau sawng hkra nye a amyu masha ni hpe nni nkri jahkum ma ai.

ZEHKARIA 2:8

Nanhte hpe adup ai wa kadai mung nye a matu manu dan htum ai hpe adup ai wa rai nga ai,” ngu nna tsun wu ai. Dai rai nna, Chyahtum Chyalai N-gun rawng ai dai Madu gaw shi a amyu masha ni hpe hpya ayai kau ai masha amyu baw ni a matu ndai mungga hte hpawn ngai hpe shangun dat wu ai:

BU HKAWM 18:12

“Israela amyu masha ni ngai hpe shaning shagu jaw jau ai shawng ngai ai nsi naisi a kaja htum ai tsanlun sau, sabyi ntsin hte nai mam ngai nang hpe jaw nga nngai.

ROMA 11:16

Dai hta kaga muk tawng langai mi hta na hkyep mi hpe la nna Karai Kasang kaw shawng nawng jau ai rai yang ngam ai muk tawng ting mung nawng jau ai tai sai rai nga ai. Bai nna hpun langai mi a aru ni hpe nawng jau ai rai yang lakung lakying ni hpe mung nawng jau ai tai sai rai nga ai.

ROMA 16:5

Shan a nta e shanu nga ai hpung hpe mung shakram ya mi. Dai hte maren Asi mung e Hkristu a matu shawng kam sham ai wa rai nga ai ngai tsaw ra ai Eponetu hpe shakram ya mi.

EHPESU 1:4

Anhte gaw tsaw ra ai myit hte shi a man e chyoi pra nna mara n rawng ai ni tai wa u ga, anhte Hkristu hte langai sha tai ai a marang e mungkan ga garai n lat kaw nna pyi Karai Kasang gaw anhte hpe lata la mani ai.

TARA JAHPRANG 14:2

Ga ntsa hta nga nga ai masha amyu ni yawng hta na shi a amyu masha ni tai nga na matu shi nanhte hpe lata la nu ai majaw dai Madu nanhte a Karai Kasang gaw nanhte hpe madu da nga ai.

TARA JAHPRANG 26:19

Shi hpan da sai masha amyu baw danghta hta shi a mying ningsang hpe shakawn kungdawn let galu kaba kajai gumhkawng shangun na marin dai. Shi tawn da ai ga sadi hte maren nanhte gaw shi a chyoi pra ai amyu masha majing tai na marin dai.”

TARA JAHPRANG 7:6

Dai Madu nanhte a Karai Kasang gaw nanhte hpe madu da nga myit dai majaw dai amu galaw mu. Shi hte seng ai laksan amyu masha majing shatai na nga, ginding aga ntsa ting na masha amyu yawng hta na nanhte hpe lata la manit dai.

YAKU 1:18

Shi hpan tawn da ai amyu ni yawng hta e anhte nambat langai shara lu ai alat amyu tai u ga, shi a myit ra ai hku hte maren dai teng man ai mungga hte shi anhte hpe shaprat dat mi ai.

1 PETRU 2:9

Rai ti mung nanhte gaw lata la ai amyu, Hkawhkam a hkinjawng ni, chyoi pra ai amyu masha ni hte Karai Kasang shi nan madu nga ai ni rai nga myit dai; shing rai lata la ai lam gaw, nanhte hpe nsin kata kaw nna shi a mauhpa nhtoi de shaga bang wa ai wa a hpung shingkang rawng ai magam amu ni hpe shana shabra shabrawng dat ya na matu rai nga ai.

SHINGRAN 14:4

Dai ni gaw numsha ni hte awu asin n rai yu ai lasha ni rai nga ma ai; shanhte gaw brang jet ni rai nga ma ai. Shanhte gaw Sagu Kasha sa ai shara shagu hkan hkan nang ma ai. Shanhte gaw shinggyim masha ni hta na hkye hkrang la hkrum sai ni rai nna Karai Kasang hte Sagu Kasha kaw shawng sak nawng da sai ni rai nga ma ai.