YEREMIA 10:5 - Jinghpaw Common Language Bible 2009

⁵ Dai zawn tawk da ai hpara sumla ni gaw ginshau yi hta u ni hpe jahkrit ai u shari sumla ni zawn rai nna, shanhte ga lu shaga ai n rai; shanhte n lu hkawm ai majaw, shanhte hpe hpai hkawm ra nga ai. Dai ni hpe hkum hkrit et, shanhte nang hpe ru yak jahkrum lu ma ai n rai, shanhte na a matu kaja ai amu hpa mung n galaw ya lu ma ai,” ngu nna tsun ai.

Jinghpaw Hanson Version Bible

⁵ Dai ni gaw maka ka ai ma-un hpun hte bung nna, n chye shaga ma ai: tinang hkrai n chye hkawm ai majaw, hpai hkawm ra ai. Dai ni hpe hkum hkrit myit; ruyak jahkrum lu ai n rai; kaja ai mung n chye galaw ma ai.”

YEREMIA 10:5 ပူးပေါင်းရင်းမြစ်များ

1 HKAWHKAM 18:26

Shanhte hpe jaw da ai usu hpe shanhte hpya la nna dai hpe hkyen shachyip tawn nhtawm shana de du hkra, Bala kaw hpyi ma ai. Shanhte gaw, “Bala e, anhte hpe htan ya mi law!,” ngu nna jahtau tsun ma ai. Shing rai shanhte galaw tawn ai tawn hkungri grup grup hta ka manawt nga ma ai. Rai ti mung hpa mahtai mi n pru nga malu ai.

2 HKAWHKAM LABAU 25:15

Shing re ai amu a majaw dai Madu masin pawt ai rai nna Amazia hpang de myihtoi langai shangun dat wu ai. Shaloi myihtoi wa gaw, “Na a lata kaw nna shanhte a masha ni hpe pyi n dang hkye la lu ai maigan karai ni hpe nang hpa majaw nawku nga n ta?,” ngu nna hpyi tsun wu ai.

ESAIA 16:12

Moba masha ni gaw bum ntsa na shanhte a nawku shara ni hte akyu hpyi na matu shanhte a nawku htingnu ni de shanhte hkum nan hki ba ai hte lung wa nga ma ai, rai ti mung dai gaw shanhte hpe mai kaja ai lam galaw ya lu nga ai n rai.

ESAIA 45:20

Dai Madu gaw, “Hkrat mat ai hkawseng mungdan hta naw ngam nga ai masha amyu baw ni e, sa hpawng marit; jep sagawn na matu nanhte nan du marit! Shanhte a hpun hpara sumla ni hte hpai madun ai ni hte shanhte hpe n hkye lu ai karai ni kaw akyu hpyi ai ndai amyu masha ni gaw hpa nan n chye nga ma hka!

ESAIA 46:1

Ndai gaw Babelon karai ni a matu jahtum rai nga ai! Bela hte Nebo yan hpe lang mi nawku yu masai, rai ti mung, ya chyawm gaw dai ni gaw lawze ni a ntsa e daw mara ai hte, hki ba ai yam nga shingma a matu lit rai nga sai.

ESAIA 46:7

Shanhte gaw dai hpe lahpa hta mara nna hpai ma ai; shanhte gaw dai hpe san da ai shara hta tawn da ai rai nna dai shara e n htawt ai sha tsap nga ai. Marai langai ngai dai kaw akyu hpyi yang, htan ya ai n rai, shanhte hpe tsin-yam tsindam kaw na hkye la lu ai n rai.

YEREMIA 10:14

Ndai zawn mu mada ai amu ni hta, amyu masha ni gaw myit n su ai hte nyan tang ai hku hkam sha ma ai; hpara sumla galaw ai ni gaw mak mat nga ma ai; hpa majaw nga yang, shanhte galaw ai karai ni gaw n teng n man ai hte nsoi nsa n rawng nga ai.

HABAKU 2:19

Nanhte gaw dingnye hkrum nga myit dai! Nanhte gaw hpun hkyep hpe, “Yup hprang u!” shing n rai nlung tawng hpe, “Rawt u!,” ngu nna tsun myit dai. Hpara sumla gaw nanhte hpe hpa lam rai tim hpaw madun lu nga a ni? Dai gaw aja gumhpraw hte sup da nga tim, dai hta asak n rawng nga ai.

1 KORINHTU 12:2

Nanhte gaw maigan masha ni naw rai nga ai shaloi e, lam amyu myu hku nna lam dam ai hte asak n rawng ai sumla ni hpe naw lai wa manit dai hpe nanhte nan chye nga myit dai.

1 KORINHTU 8:4

Dai rai nna, sumla ni hpe nawng ai hkungga lusha a lam hte seng nna tsun ga nga yang, sumla ngu ai gaw kaja wa asak hkrung shamu shamawt ai lam n nga ai, hpa n re ai rai nga ai hpe mung, langai sha rai nga ai Karai Kasang hta kaga shaje n nga ai hpe mung, anhte dum chye ga ai.

TARA JAHPRANG 4:28

Dai shara hkan e, myi n mu, na n na, n lu n sha chye ai hte manam n chye ai hpara ni ngu ai shinggyim masha a lata hte tawk da ai hpun hpara, nlung hpara ni hpe nanhte daw jau na marin dai.