YAWHAN 7:17 - Jinghpaw Common Language Bible 2009

¹⁷ Dai Madu a myit ra ai lam hkan galaw mayu ai wa kadai mung, ngai sharin shaga ai ga gaw Karai Kasang kaw na re ai, shing n rai nye a myit hte sha tsun ai rai kun?, chye ginhka lu na wu ai.

Jinghpaw Hanson Version Bible

¹⁷ Dai wa a myit hkan mayu ai wa rai yang gaw, sharin shaga ai ga ndai, Karai Kasang kaw na re ai, shing n rai, nye a myit hte tsun nga ai ga re ai, chye ginhka lu na wu ai.

YAWHAN 7:17 ပူးပေါင်းရင်းမြစ်များ

YAWHAN 8:43

Ngai tsun ai lam hpe nanhte hpa rai n chye na myit ta? Dai gaw nanhte nye a mungga n madat la lu ai majaw rai nga myit dai.

YAWHAN 8:47

Karai Kasang a kashu kasha re ai wa gaw Karai Kasang a ga madat nga ai, nanhte gaw Karai Kasang a kashu kasha ni n re ai majaw, n madat myit dai,” ngu wu ai.

KASA 17:11

Dai mare masha ni gaw Htesaloni masha ni hta grau myit su, myit dam lada ma ai rai nna Pawlu hkaw tsun ai mungga hpe grai shareng hkungga nna myit lawm ai hte madat la ma ai. Shanhte gaw Pawlu yan Sila hkaw tsun dan ai ga hte maren teng n teng chye lu hkra, Chyum Laika hpe shani shagu asawk hti yu nga ma ai.

Daniela 12:10

Masha law law mung san seng wa na mara ai. N hkru ai ni chye na hkawn hkrang na ma ai n rai, rai ti mung n hkru ai hku sha hkan na mara ai; hpaji rawng ai ni chyu sha chye na hkawn hkrang wa na mara ai.

LUKA 8:15

Ga sau kaja ai hta hkrat ai nli tum ni gaw, dai mungga hpe na la nhtawm, kaja ai hte madat mara ai myit masin kraw lawng hta lashum lanoi rai nna asi si ai ten du hkra hkam sharang ai ni hpe ngu ai rai nga ai.”

SHAKAWN KUNGDAWN 25:12

Madu hpe madat mara ai ni gaw shanhte hkan sa ra ai lam ni hpe shi kaw nna sharin la na mara ai.

MIHKA 4:2

shanhte a amyu masha ni gaw, “Anhte gaw dai Madu a kawng, Israela a Karai Kasang a Nawku Htingnu de lung wa saga. Shi gaw anhte hpe galaw shangun mayu ai lam sharin ya na ra ai; anhte gaw shi lata da sai lam hta hkawm sa na rai ga ai. Hpa majaw nga yang, dai Madu a sharin shaga ai ga gaw Yerusalem kaw nna rai nga ai; shi a amyu masha ni hpe shi tsun ai ga gaw Ziun kaw na rai nga ai,” ngu nna tsun na mara ai.

ESAIA 35:8

Dai shara e ningmaw lam kaba langai nga na ra ai, dai hpe, “Chyoi Pra ai Lam Nmaw,” ngu shamying na mara ai. Yubak kap ai ni kadai mung dai lam de galoi mung hkawm sa lu na n rai; dai lam hkan ai ni hta angawk ai ni pyi dai lam yit na ma ai n rai.

MALAHKI 4:2

Rai ti mung nye a ga madat ai nanhte a matu hkye hkrang la lu ai nye a daru magam n-gun gaw nanhte a ntsa e ajan zawn rawt wa nna, jan a shingkang ni zawn shamai shatsai ai lam du pru wa na ra ai. Nanhte gaw shalawt dat ai hkrum nna, ulawng kaw na pru wa ai dumsu kasha ni zawn kabu gara na rai myit dai.

SHAKAWN KUNGDAWN 25:14

Dai Madu gaw shi a ga madat mara nga ai ni a jinghku rai nga nna shi a ga shaka shanhte hte shagrin da nga ai.

SHAKAWN KUNGDAWN 119:10

Nye a myit masin mahkra hte, ngai nang hpe daw jau na matu shakut na nngai; na a hkang da ai tara ni hpe lale kau ai kaw nna ngai hpe makawp da e.

MAHTE 6:22

“Myi gaw hkum a matu pyengdin langai mi zawn rai nga ai; na a myi asan sha rai nga yang gaw, na a hkum ting htoi san nga na ra ai.

HOSEA 6:3

Anhte dai Madu hpe chye hkra shakut ga. Shi gaw jahpawt manap na nhtoi e teng teng pru wa ai zawn mung, lanam shang marang teng teng jahtu ya ai zawn mung anhte hpang de du sa wa na ra ai.”

GA SHAGAWP 3:32

Kaning rai nme law, dai Madu gaw n hkru n shawp ai amu galaw ai ni hpe n dawng nga ai; rai ti mung, ding man ai masha ni hpe chyawm gaw shi kam nga ai.

GA SHAGAWP 28:5

N hkru n shawp ai masha ni gaw teng man ai tara hpe n chye nga ma ti mung, Madu hpe nawku daw jau ai ni gaw dai hpe atsawm sha chye na nga ma ai.

YAWHAN 3:21

Rai ti mung teng man ai lam hkan galaw ai kadai mung, tinang galaw ai amu gaw Karai Kasang a myit ra ai lam hte maren madat mara ai lam rai nga ai hpe dan leng shangun u ga, dai nhtoi de sit wa ai, ngu nna shi hpe htan wu ai.

YAWHAN 8:44

Nanhte gaw, nanhte a kawa ngu ai gumlau nat a kashu kasha ni rai nga myit dai rai nna, nanhte a kawa a kayut ai hku hkan mayu myit dai. Shi gaw shawng npawt kaw nna, masha sat ai wa rai nga ai rai nna, tengman ai maga de galoi mung n nga ai, hpa majaw nga yang shi hta teng man ai lam n rawng nga ai. Shi gaw masu magaw ai wa langai mi rai nna masu magaw lam yawng a kawa mung rai nga ai majaw, shi a masu ai ga tsun yang, dai gaw shi a shingra myit hte maren tsun ai lam rai nga lu ai.