YAWHAN 10:16 - Jinghpaw Common Language Bible 2009

¹⁶ Ndai wulawng hte n seng ai kaga sagu ni mung ngai naw lu nngai, dai sagu ni hpe mung ngai naw woi jashawn la lu na rai nna dai ni mung nye a nsen madat na mara ai. Shaloi sagu hpung langai sha, sagu rem wa langai sha, rai na ra ai.

Jinghpaw Hanson Version Bible

¹⁶ Ndai ulawng hte n seng ai sagu kaga mung ngai naw lu nngai: dai sagu ni hpe mung ngai woi wa lu na rai nna, dai ni mung nye a nsen madat na mara ai; shaloi sagu hpung langai sha, sagu rem wa langai sha, rai na ra ai.

YAWHAN 10:16 ပူးပေါင်းရင်းမြစ်များ

NINGPAWT NINGHPANG 49:10

Yuda gaw hkawhkam sumdoi lang lu na ra ai, Shi a amyu matu ni tut nawng a up nga na mara ai. Amyu baw ni shi hpe shagrau kumhpa jaw ai hte Shi a man e madat mara let gum dagup na mara ai.

SHAKAWN KUNGDAWN 86:9

Nang hpan tawn da ai masha amyu baw ni yawng hte gaw nang kaw sa nna dingnyawm wa na mara ai; shanhte gaw na a galu kaba ai lam hpe shakawn na mara ai.

HPAJI NINGLI 12:11

Hpaji rawng ai ni a ga ni gaw sagu ni hpe lam woi na matu sagu rem ni lang ai majawn hte bung nga ai rai nna ka mahkawng da ai ga shagawp ni gaw dit jung da ai hpri masen zawn grin nga ai. Dai ni gaw anhte yawng a sagu Rem ai Wa, Karai Kasang a lata hku jaw ya ai ni rai nga ai.

ESAIA 11:10

Dawi a hkawhkam aru asai kaw nna hkawhkam nnan gaw masha amyu baw ni a matu masat kumla tai na ra ai nhtoi gaw du wa nga ai. Shanhte gaw shi a hkawhkam htingnu mare hta zup hpawng nna shi hpe shagrau sha-a na mara ai.

ESAIA 43:6

Shanhte hpe wa shangun na matu dingdung maga de ngai tsun na nngai; shanhte hpe n shingdang lu na matu dingda maga de tsun na nngai. Nye a amyu masha ni tsan ai mung ni kaw na nhtang wa mu ga, mungkan jut shara shagu kaw na nhtang wa mu ga.

ESAIA 49:6

Dai Madu gaw ngai hpe, “Nye a shangun ma wa e, ngai gaw na a matu bungli grau kaba ai langai lu nngai. Naw ngam nga ai Israela amyu masha ni hpe galu kaba lam jaw ya na matu sha n rai nga ai; rai ti mung ngai gaw nang hpe masha amyu ni a matu nhtoi shatai na we ai, shaloi mungkan yawng gaw hkye hkrang la hkrum na ma ai,” ngu nna tsun ai.

ESAIA 52:10

Dai Madu gaw shi a chyoi pra ai daru magam n-gun lang wa na ra ai; shi gaw shi a amyu masha ni hpe hkye la na ra ai, mungkan ga ting dai amu hpe mu na mara ai.

ESAIA 56:8

Bawng dung hkrum ai kaw na Israela dum nta de woi wa ai Tsaw Htum ai dai Madu gaw shi a amyu masha ni hte matut mahkai wa na matu kaga masha ni hpe naw woi wa na ra ai, ngu ga sadi tawn da nga sai.

EZEKELA 34:12

Sagu rem wa gaw bra hkawm nga ai shi a sagu ni hpe bai shinggyin da nna lanu lahku ai hte maren, lamu sin mak mat nna tsin-yam hkrum ai shani e, shanhte bra hkawm mat wa ai shara shagu hkan na shanhte hpe bai woi wa na nngai.

EZEKELA 34:23

Shanhte hpe rem ai sagu rem wa langai tai wa na matu, nye a shangun ma Dawi hte bung ai hkawhkam langai ngai shanhte hpe jaw na nngai, shing rai shi gaw shanhte hpe rem ai sagu rem wa tai nna lanu lahku na ra ai.

EZEKELA 34:6

Dai rai nna, nye a sagu ni gaw tsaw ai kawng ni hte bum ntsa hkan e dam hkawm nga ma ai. Dai ni gaw ga ntsa ting hta bra hkawm nga nna shanhte hpe hkan yu, tam sawk shakut ai wa langai mi mung n nga nga ai.

EZEKELA 37:22

Ngai gaw Israela a bum ni a ntsa e, shanhte hpe amyu baw langai sha shatai na nngai. Shanhte hpe up hkang na hkawhkam langai sha rai nna shanhte gaw htawm hpang e amyu baw lahkawng galoi mung tai na n rai, mungdan lahkawng gaw galoi mung ga garan mat na n rai.

EZEKELA 37:24

Nye a shangun ma Dawi hte bung ai hkawhkam langai mi mung shanhte a hkawhkam tai na ra ai. Shanhte yawng gaw up hkang ai du langai a npu hta taw nga nna nye a tara ni hpe kangka ai hte hkan sa madat mara na mara ai.

HOSEA 1:10

Israela amyu masha ni mung n dang hti, n dang shadawn lu hkra re ai panglai zaibru zawn tai wa na mara ai. Ya chyawm gaw Karai Kasang shanhte hpe, “Nanhte gaw nye a amyu masha ni n rai nga myit dai,” ngu nna tsun ai. Rai ti mung, dai nhtoi du du wa ai shaloi shi gaw shanhte hpe, “Nanhte gaw ahkrung nga ai Karai Kasang a kashu kasha ni rai nga myit dai!,” ngu nna tsun na ra ai.

ZEHKARIA 2:11

Dai aten e, masha amyu baw law law ni dai Madu hpang de sa wa nna, shi a amyu masha ni tai wa na mara ai. Shi gaw nanhte a ka-ang hta shanu nga nna, nanhte hpang de ngai hpe shi shangun dat ai hpe nanhte chye lu na marin dai.

MAHTE 17:5

Petru ga naw shaga nga yang, htoi tu ai sumwi gaw shanhte a ntsa e ka-up mu ai hte dai sumwi hta na nsen ngoi pru nna, “Ndai wa gaw ngai sharawng awng ai, ngai tsaw ra ai ngai sha rai nga ai; shi a ga madat mara mu,” nga ai.

LUKA 15:8

“Bai numsha langai mi, gumhpraw dengga shi lu ai hta na dengga mi mat mat ai rai yang, shi kaning rai galaw na rai ta? Shi, pyengdin shatu nhtawm, shi a nta hpe ye seng nna n mu yang mu hkra atsawm sha shara shagu tam yu wu ai.

YAWHAN 10:11

Ngai gaw sagu rem wa kaja rai nngai. Sagu rem wa kaja gaw sagu ni a matu tinang a asak nawng kau ya lu ai.

YAWHAN 10:2

Chyinghka lam hku shang ai wa chyawm gaw, sagu ni hpe rem ai wa rai nga ai.

YAWHAN 10:27

Nye a sagu ni gaw, nye a nsen madat ma ai rai nna, ngai shanhte hpe chye nngai, shanhte mung nye a hpang hkan nang ma ai.

YAWHAN 10:3

Chyinghka sin ai wa mung, dai wa hpe gaw hpaw ya nga ai, sagu ni mung shi a nsen madat ma ai rai nna, shi gaw tinang a sagu ni hpe mying hte shaga nna shinggan de woi shapraw praw di wu ai.

YAWHAN 10:4

Sagu ni hpe shapraw nhtawm sagu ni a shawng e sa wa ai rai nna, sagu ni mung shi a nsen hpe chye chyap ma ai majaw shi kaw hkan nang ma ai.

YAWHAN 10:5

Tsasam wa a hpang kaw shanhte hkan nang ma ai n rai. Tsasam wa a nsen hpe n chye n chyap ma ai rai nna, shi kaw na she hprawng mat wa ma ai,” ngu nna shanhte hpe tsun mu ai.

YAWHAN 11:52

Shing rai si hkam ai lam gaw dai amyu a matu sha n rai, shara shagu hkan bra nga ai Karai Kasang a amyu masha ni hpe langai sha di nna, shinggyin jahpawng da na matu si hkam lu na re ai, ngu nna mung myihtoi ga hte tsun ai, rai nga ai.

YAWHAN 17:20

“Ndai ni a matu sha ngai hpyi nngai n rai, shanhte hkaw tsun dan ai mungga a majaw ngai hpe kam sham wa ai ni a matu mung, ngai hpyi nga nngai.

YAWHAN 6:37

Nye Wa ngai hpe ap ya ai yawng mayawng hte gaw ngai hpang de du na mara ai, Ngai hpang de du sa ai wa hpe mung, kaja wa ngai n kanawng kau na nngai.

KASA 15:14

Karai Kasang gaw shawng nna maigan amyu ni hta na nkau mi hpe shi hte seng ai amyu masha shatai na matu lata shaw la nna shanhte hpe lanu lahku ai lam madun dan manu ai lam Simun tsun shaleng dan sai.

KASA 18:10

Hpa majaw nga yang, ngai nang hte rau rai nga nngai, nang hpe kadai mung hkra lu na n rai, ndai mare hta nye a masha ni law law nga ma ai,” ngu nna tsun wu ai.

KASA 22:14

Bai shi gaw, ‘Anhte a ji wa ni a Karai Kasang gaw, nang hpe shi myit ra ai lam chye shangun na matu mung, shi a ding hpring ai Madu hpe mu lu na matu hte shi a nsen hte nan shaga ai hpe na lu n ga, nang hpe lata san nit dai.

ROMA 11:25

Hpu nau ni e, nanhte gaw tinang dai chye chyang la ni ai ngu nna n myit la na matu Karai Kasang a sung htum ai hte makoi magap da ai teng man ai lam langai mi nanhte hpe chye na shangun mayu nngai. Dai gaw Israela amyu masha ni tut nawng myit shaja kau nna nga na ma ai n rai, rai ti mung dai gaw hkye hkrang la hkrum nna Karai Kasang kaw du wa na kaga amyu masha ni a jahpan wa hkum ai ten du hkra sha rai na rai nga ai.

2 HTESALONI 2:13

Madu a tsaw ra ai hpu nau ni e, nanhte a majaw anhte gaw Karai Kasang a chyeju hpe tut nawng e shakawn kungdawn lu na ra ga ai. Hpa majaw nga yang, Karai Kasang gaw, nanhte hpe chyoi pra ai masha shatai ai Wenyi a n-gun atsam hte mung, teng man ai hpe kam sham ai nanhte a makam masham hte mung, shawng na hkye hkrang la hkrum ai ni hku nna nanhte hpe lata la sai.

HEBRE 13:20

Shi a asak hpe nawng ya kau nna si hkam ai hte htani htana ga shaka hpe dazik dawk da sai majaw sagu ni a Sagu Rem Wa Kaba ngu ai anhte a Madu Yesu hpe Karai Kasang gaw si ai kaw na bai jahkrung sharawt la nu ai.

1 PETRU 2:10

Nanhte gaw shawng de kalang mi Karai Kasang a amyu masha ni n rai myit dai; rai ti mung ya gaw, shi a masha ni rai wa manit dai. Shawng de kalang mi nanhte gaw Karai Kasang a matsam dum lama ai hpe n hkap la lu myit dai; ya chyawm gaw hkap la lu manit dai.

1 PETRU 2:25

Nanhte gaw lam dam mat ai sagu ni zawn rai nga myit dai; ya chyawm gaw sagu rem wa hte nanhte a myit masin ni hpe up madu da ya ai wa a hpang e hkan nang na matu shi hpang de bai woi du wa manit dai.

1 PETRU 5:4

Dai Sagu Rem Agyi Kaba Wa dan pru ai shaloi nanhte gaw htoi kabrim ai nsam galoi mung n mat chye ai arawng sadang hte hpring ai janmau lu la na marin dai.

SHINGRAN 3:20

Yu u! Ngai gaw chyinghka akawk let tsap nga nngai: nye a nsen na nna chyinghka hpaw ya ai wa kadai kaw rai ti mung, ngai shang nna shi hte rau lu rau sha na nngai, shi mung ngai hte rau lu rau sha lu na ra ai.