YAKU 1:4 - Jinghpaw Common Language Bible 2009

⁴ Nanhte gaw hpa lam hta mung ra rawng ai lam n nga nna hpring tsup nga myit ga, nanhte a hkam sharang ai myit hpe jahtum du hkra ngang grin nga shangun u.

Jinghpaw Hanson Version Bible

⁴ Dai hta n-ga, nanhte hkum hkum chyip chyip rai lu nna, hpa hta mung n kadawn myit ga, shakut sharang ai myit gaw tinang a atsup nga ai bungli hpe, shangut kau lu u ga.

YAKU 1:4 ပူးပေါင်းရင်းမြစ်များ

YOBA 17:9

Hkungga lara wa na matu tsun hkrum ai ni gaw shanhte ding man nga ma ai hpe grau grau nna chye na wa ma ai.

SHAKAWN KUNGDAWN 37:7

Dai Madu a man e amu sha nga nga nna shi shabyin ya na lam hpe ala nga u; n hkru n shawp ai ni a yaw shada ai lam ni hta awng dang wa nna, ngamu ngamai wa ai ni hpe hkum yu tsang nga et.

SHAKAWN KUNGDAWN 40:1

Madu karum la na matu ngai myit galu ai hte ala nga nngai; shaloi, ngai hpe shi madat ya nna, nye a hpyi jahtau ai nsen hpe na ya ni ai.

GA SHAGAWP 4:8

Hpaji byeng-ya hpe tsaw ra nga u; nang hpe shi galu kaba shangun na ra ai; shi hpe manoi manat nga u, nang hpe shi shagrau shatsaw na ra ai.

HABAKU 2:3

Dai hpe ka tawn u, hpa majaw nga yang dai gaw teng teng byin wa na aten garai n du nga ai. Rai ti mung aten gaw alawan du nga sai, ngai nang hpe madun ai lam gaw teng wa na ra ai. Dai du wa na aten gaw lanyan ai zawn rai nga ai, rai ti mung dai hpe la nga u; dai gaw teng teng byin wa na ra ai, dai gaw na taw nga na ra ai n rai.

MAHTE 10:22

Nye a majaw masha shagu gaw nanhte hpe n dawng n wawm na mara ai. Rai ti mung, htum hkra shakut sharang ai wa gaw, hkye hkrang la ai hkrum na ra ai.

MAHTE 19:20

Dai shabrang wa gaw, “Dai yawng mayawng hte hpe ngai naw kaji ai ten kaw nna pyi hkan shatup se ai; hpa mahtang ngai naw ra nga a ta?,” ngu nna shi hpe htan wu ai.

MAHTE 5:48

Dai majaw sumsing lamu na nanhte a Kawa gaw kup tsup nga ai hte maren, nanhte mung kup tsup nga mu.

MARKU 10:21

Yesu shi hpe tsaw ra ai hte azi yu let, “Lam langai mi sha nang naw ra nga ndai: nang wa su, nang lu malu hpe dut kau nna, matsan mayan ni hpe karan jaw u. Shing rai jang sumsing lamu ntsa e nang sut gan lu na rin dai; dai hpang ngai kaw sa nna hkan nang rit,” ngu nna shi hpe san wu ai.

LUKA 18:22

Yesu gaw dai ga na jang, “Lam langai mi nang naw galaw ra nga ndai, nang lu malu dut kau nna matsan mayan ni hpe garan jaw u; shing rai jang she sumsing lamu ntsa e nang sutgan lu na rin dai, dai hpang ngai kaw hkan nang rit,” ngu nna shi hpe tsun wu ai.

LUKA 21:19

Nanhte gaw dakring dalang rai ngang ngang tsap nga mu, shaloi nanhte hkye hkrang la ai hkrum na marin dai.

LUKA 8:15

Ga sau kaja ai hta hkrat ai nli tum ni gaw, dai mungga hpe na la nhtawm, kaja ai hte madat mara ai myit masin kraw lawng hta lashum lanoi rai nna asi si ai ten du hkra hkam sharang ai ni hpe ngu ai rai nga ai.”

YAWHAN 17:23

Nang ngai hpe shangun dat nna, nang ngai hpe tsaw ra nga ai zawn, shanhte hpe mung tsaw ra nga ai lam, mungkan masha ni chye lu na matu ngai gaw shanhte hta nga nga nna, nang mung ngai hta nga nga ai hte shanhte langai sha tai wa mu ga.

1 KORINHTU 2:6

Rai ti mung ngai gaw, Wenyi makam masham lam hta myit su kunghpan sai ni hpe hpaji byeng-ya hte kapyawn nna tsun dan nngai. Rai ti mung dai gaw ndai mungkan ga hte seng ai hpaji byeng-ya n rai; mungkan ga na du ni a hpaji byeng-ya atsam mung n rai; mungkan du ni a n-gun atsam gaw sum mat wa magang nga ai.

GALATI 6:9

Dai rai nna kaja ai amu galaw na anhte n hki n sang nga ga; hpa majaw nga yang, anhte myit n yaw, myit n daw ga yang gaw, aten ladaw du jang anhte dan la na raga ai.

KOLOSE 4:12

Nanhte kaw na rai nga ai Hkristu a mayam wa Epahpra gaw nanhte hpe shakram dat ai. Shi gaw nanhte a matu myit rawt sharawng awng ai hte akyu hpyi nga ai. Nanhte gaw Karai Kasang a myit ra ai lam hta tup hkrak madat mara hkan sa nna myit su kunghpan ai hte kam sham ai lam hta atsawm sha myit hkawn ai Hkristan tai nga let, dinggrin lahpran tsap nga lu myit ga, shi gaw Karai Kasang kaw hpyi nem ya nga ai.

1 HTESALONI 5:23

Anhte hpe ngwi pyaw sim sa ai lam jaw ya ai Karai Kasang gaw, nanhte hpe lam shagu hta shachyoi shapra nna, anhte a Madu Yesu Hkristu bai du sa ai shaloi e, nanhte a Wenyi, myit masin hte hkum hkrang ting gaw, mara n kap hkra bau maka nga u ga.

2 TIMOHTI 3:17

Dai rai nna Karai Kasang a magam gun hpai ai wa gaw mai kaja ai magam bungli shagu hpe galaw na matu atsam hpring nna lang ra ai hking rai ni hte hkrak shajin da sai wa rai nga ai.

HEBRE 13:21

Nanhte gaw shi a myit ra ai lam hkan galaw lu na matu nanhte hta ra kadawn nga ai mai kaja ai lam shagu hpe ngwi pyaw ai Karai Kasang gaw nanhte hpe jaw ya myit ga; Madu gaw shi a myit ra ai hku hte maren, Hkristu a marang e anhte hpe jahkum shatsup ya mi ai. Yesu Hkristu a marang e, shi a sharawng awng ai lam hpe anhte shabyin shatai u ga, Hkristu hta htani htana prat dingsa hpung shingkang anga nga u ga law. Amen.

YAKU 1:5

Rai ti mung, nanhte hta na langai ngai hpaji ra kadawn nga a yang gaw, shi Karai Kasang kaw akyu hpyi nga u ga, Karai Kasang gaw shi hpe dai lam jaw ya na ru ai; hpa majaw nga yang, shi gaw yawng mayawng hpe n daw n hta chyeju hku nna jaw ya ai wa rai nga ai.

YAKU 3:2

Anhte nga manga hte gaw ya sha ya sha shut chye ga ai. Rai ti mung masha langai mi gaw, shi tsun shaga ai hta galoi mung n shut ai rai yang gaw, dai wa gaw hkum tsup ai wa rai nna shi a hkum hkrang ting hpe hkang lu ai wa rai nga ai.

1 PETRU 5:10

Rai ti mung nanhte jahkring sha mi nni nkri hkam ngut ai hpang, chyeju yawng mayawng a Madu rai nga ai Karai Kasang gaw nanhte hpe Hkristu hta langai sha tai shangun nna htani htana hpung shingkang hta shang sha lu mu ga, nanhte hpe shaga la ai Madu shi nan nanhte hpe ra n rawng hkra jahkum shatsup ai lam shangang shakang ai lam, n-gun lagaw sharawng ai lam ni jaw nna ngang kang ai npawt hkridun hta tsap nga lu ai ahkang jaw na marin dai.

2 PETRU 1:9

Rai ti mung dai atsam ni hpe n lu la ai ni kadai mung tsan tsan n mu mada ai, myi n mu ai wa rai nna shi a lai wa sai yubak mara ni kaw nna jasan jaseng la hkrum sai lam hpe nan malap mali di kau nu ai.