TITU 3:9 - Jinghpaw Common Language Bible 2009

⁹ Rai ti mung akyu n rawng ai angawk angak nga nna san ai ndang kalang ga san ni, galu galang ahtik labau gawn ai lam, ga li ga law re ai lam, tara hte seng nna ga law hkat ai lam ni hpe koi kau u: hpa majaw nga yang, dai lam ni gaw akyu n rawng ai hte kaman lila sha rai nga ai.

Jinghpaw Hanson Version Bible

⁹ angawk angak nga nna san ai ndang kalang ga hpe mung, ahtik labau gawn ai lam hpe mung, jep ai tara a majaw ga law ga la nga nna gasat ningjet re ai lam hpe mung, koi kau u: kaning rai nme law, dai lam ni gaw akyu n rawng ai hte kaman lila sha rai nga ai.

TITU 3:9 ပူးပေါင်းရင်းမြစ်များ

YOBA 15:3

Nang galaw ai lam hte maren hpaji rawng ai wa tsun na wu ai n rai; dai zawn lachyum n pru ai ga ni hte shi nan ninghkap na wu ai n rai.

1 KORINHTU 13:2

Ngai myihtoi chye htoi ai hte sung ai lam yawng mayawng, chye chyang ai hpaji amyu myu hkum nga ai hte bum hpe jasit kau lu hkra re ai makam masham rawng ti mung, tsaw ra myit n rawng yang gaw, ngai hpa n rai nga nngai.

1 KORINHTU 8:1

Ya nanhte laika hte san dat ai sumla ni hpe nawng jau ai lusha ni hte seng nna ngai tsun htai dan na nngai. “Anhte yawng hte wa machye machyang rawng ai ni hkrai rai ga ai,” nga nna shanhte tsun ai gaw teng nga ai. Rai ti mung, dai baw machye machyang gaw masha hpe gumrawng gumtawng shangun nga ai.

1 TIMOHTI 4:7

Rai ti mung, Karai Kasang hte n seng ai tsun na matu akyu n nga ai maumwi ga ni hpe koi kau nna, tinang a asak hkrung lam hpe tara hkungga ai lam hta shakung jahpan nga u.

2 TIMOHTI 2:14

Masha ni hpe ndai lam shadum shahprang nga u; ga hte ndang kalang nga nna gasat ningjet n nga na matu Karai Kasang a man e shanhte hpe ja ja sadi jaw da u. Shing rai ndang kalang hkat ai lam gaw, hpa akyu n shabyin ai hta n ga, madat la ai masha ni hpe jahten shabya ai lam sha byin shangun nga ai.

2 TIMOHTI 2:16

Karai Kasang hte tsan gang mat wa shangun ai awu asin hte, angawk angak nga nna tsun baw law ai ga ni hpe koi gam u.

2 TIMOHTI 2:23

Rai ti mung angawk angak hte tuk shamak re ai ndang kalang ga ni hpe koi kau u. Shing re ai ni a jahtum ai gaw ga li ga law lam ni rai nga ai hpe nang chye nga ndai.

TITU 1:14

Yuda ni a matsun maroi maumwi ni hpe manoi manat ai lam n galaw nga na hte dai teng man ai lam hpe n hkap la ai masha ni kaw na pru ai hkang da ai ga ni hpe kam hpa manoi ai ni naw n rai nga na matu mung, shanhte hpe nang aja awa daru sharin lu na rai ndai.

YAKU 4:1

Nanhte hta e gasat gala ai lam ni hte ga li ga law re ai lam ni kanang na du sa wa sata? Dai ni gaw nanhte kata hta tut nawng gasat gala nga ai pyaw daw kadaw ai lam a majaw nanhte a ra kasit nga ai lam ni kaw nna pru wa ai r ai nga ai.