TITU 3:8 - Jinghpaw Common Language Bible 2009

⁸ Ndai ga gaw kangka re ai ga rai nga ai. Karai Kasang hpe kam sham ai ni gaw masha shagu a matu kaja ai hte akyu rawng ai mai kaja ai amu hpe myit lawm let aten jaw nna galaw nga mu ga lahta de tsun lai wa sai lam ni hpe laksan madung dat ahkyak shatai nna nang tsun shadum shahprang nga na hpe ngai ra nga nngai.

Jinghpaw Hanson Version Bible

⁸ Ndai ga gaw kangka re ai ga rai nga ai rai nna, Karai Kasang hpe kamsham ai ni gaw, kaja reng ai magam bungli a shachyen nga na myit dum nga mu ga, ndai lam ni hpe nang grai ngu tsun shangang ya na, ngai ra nga nngai. Dai lam ni gaw masha a matu mai kaja nga ai rai nna akyu rawng nga ai:

TITU 3:8 ပူးပေါင်းရင်းမြစ်များ

SHAKAWN KUNGDAWN 78:22

Hpa majaw nga yang, shanhte shi hpe n kam nga ma ai hte shi hkye hkrang la lu nga ai lam hpe shanhte n kam nga ma ai majaw rai nga ai.

GA SHAGAWP 21:28

Masu magaw ai wa a sakse ga hpe kadai n kam nga ai. Lam shagu hpe hkrang hkrang myit shapraw ai wa a ga hpe chyawm gaw hkap la lu nga ai.

MAHTE 20:4

‘Nanhte mung dai sun de sa wa masu, ging ram ai hte maren ngai nanhte hpe jaw na made ai,’ ngu nna shanhte hpe tsun mu ai.

YAWHAN 12:44

Yesu gaw, “Ngai hpe kam sham ai wa gaw, ngai hpe sha kam sham ai n rai, ngai hpe shangun dat ai wa hpe mung kam sham nga ai,” nga nna nsen kaba hte tsun mu ai.

YAWHAN 5:24

Ngai nanhte hpe teng teng tsun made ga, nye a ga madat mara nna ngai hpe shangun dat ai wa hpe kam sham ai wa kadai mung, htani htana asak lu la wu ai. Shi gaw tara daw dan ai n hkrum ai sha, si ai kaw na asak hkrung ai de kawt lai wa ai wa rai nga ai.

KASA 12:15

Shanhte gaw, “Nang mana nit dai!,” ngu mu ai. Rai ti mung, dai numsha gaw shi tsun ai lam teng ai, nga nna atsun nga ai; dai majaw shanhte gaw, “Shi a lamu kasa rai nga lu ai,” nga ma ai.

ROMA 4:5

Rai ti mung masha gaw tinang a tara shadik ai magam bungli ni hpe n kam hpa a yang gaw, Karai Kasang dai wa hpe shi a makam masham a marang e mara n lu ai wa re ngu nna daw dan ya na wu ai. Dai gaw shi a makam masham a marang e ding hpring ai ngu nna Karai Kasang a man e sawn ya ai lam rai nga ai.

2 KORINHTU 4:13

Chyum Laika hta, “Ngai kam sham nngai majaw ngai hkaw tsun nngai,” nga nna tsun da nga ai hte maren, anhte mung kam sham ai majaw hkaw tsun ga ai.

EHPESU 4:28

Lagu ga ai wa gaw, lagu lagut amu tawn kau nna bai hkum lagu u ga, ra kadawn nga ai ni hpe karum la lu hkra tinang a matu teng man ai kan bau ai asak hkrung lam lu la hkra amu galaw hpang u ga.

1 TIMOHTI 1:15

Yubak kap ai ni hpe hkye hkrang la na matu Hkristu Yesu gaw mungkan ga de du sa ai nga ai ga gaw, tup hkrak hkap la nna kam sham ging ai teng man kangka re ai ga nan rai nga ai. Dai yubak kap ai ni hta ngai mahtang kaba htum ai wa rai nga nngai.

1 TIMOHTI 2:8

Hpung a nawku daw jau ai hpawng shagu hta lasha ni hpe akyu hpyi shangun mayu nngai. Karai Kasang kaw ap nawng machyai da hkrum sai lasha ni gaw masin pawt ai lam, ndang kalang re ai lam n lawm ai sha chyoi pra ai lata sharawt nna akyu hpyi mu ga.

1 TIMOHTI 5:10

Dai hta n ga, shi gaw arawn alai kaja ai lam hta mung gumhkawng ai jan, kashu kasha ni hpe atsawm sha woi lanu lahku shakung jahpan ai jan, tsasam manam ni hpe shi a nta kaw hkap la nna galaw daw ai jan, Hkristan hpu nau ni hte seng nna galaw ra ai lit ni hpe myit nem ai hte galaw gun hpai ai jan, ru yak jam jau hkrum nga ai ni hpe karum ai jan, mai kaja ai magam bungli hpe ap nawng gun hpai ai jan rai ra ai.

2 TIMOHTI 1:12

Dai lam a majaw ndai nni nkri ru yak jam jau ni hpe ngai hkam jan nngai, Rai ti mung nye a kam hpa ai myit gaw ngai hta naw hpring chyat nga ai. Hpa majaw nga yang, ngai kadai wa hpe kam manoi nga nngai gaw ngai chye nga ai hte ngai hpe kam nna nye a lata hta ap tawn da sai dai Kabu Gara Shiga hpe tara jeyang ai Shani Nhtoi du hkra makawp maga mahkyu da ya lu ai n-gun atsam shi hta rawng nga ai ngu nna ngai myit mu myit hkut nga nngai.

TITU 1:9

Shi gaw Hpung a sharin shaga ai lam hte myit hkrum nna kam hpa mai ai dai mungga hpe ngang ngang kang kang manoi manat ai wa, rai lu na rai nga ai. Shing rai yang she shi gaw dai teng man ai sharin shaga ai lam hte masha ni hpe n-gun jaw myit gang la lu na hte, dai mungga hte n htan shai ninghkap ai ni a shut ai lam hpe madi madun lu na rai nga ai.

TITU 2:14

Anhte hpe tara tawt lai ai n hkru n kaja ai mara yawng mayawng hta na hkye hkrang shaw la na matu mung, anhte gaw myit masin san seng nna shi hte chyu sha seng ai amyu tai let, kaja reng ai magam bungli galaw na myit katu sharawng ai amyu tai na matu mung, Hkristu gaw anhte a matu mara shi hkum dai hpe ap ya kau nu ai.

TITU 2:7

Lam shagu hpe galaw gun hpai ai lam hta, nang hkum nan kaja ai kasi ningli tai nga u. Myit malang ai hte grai laja lana ahkyak shatai ai hku shadum sharin u.

TITU 3:1

Mungdan up hkang ai ni hte ahkaw ahkang lu ai ni a npu e taw nga nna madat mara nga na matu mung, mai kaja ai magam bungli nga manga hpe galaw na jin jin rai nga na matu mung, na a hpung masha ni hpe shadum nga u.

TITU 3:14

Sha na, bu hpun na, nga na lam a matu kaja wa ra kadawn nga ai hpe jaw lu hkra, anhte a masha ni kaja ai kan bau bungli galaw ai hta shanhte a aten hpe jai lang chye mu ga hte, shanhte gaw akyu n rawng ai baw asak n hkrung mu ga sharin ya u.

HPILEMON 1:11

Shi gaw shawng de na a matu akyu n rawng ti mung, ya gaw na a matu mung, nye a matu mung akyu rawng nga ai.

HEBRE 10:24

Anhte gaw anhte shada da karum shingtau hkat na matu, shada da tsaw ra myit madun hkat let, mai kaja ai lam galaw na matu shada da myit tau myit htang hkat nga ga.

1 PETRU 1:21

Madu Yesu hpe si ai kaw na bai hkrung sharawt la nna hpung shingkang ap ya hkrum ai wa a marang e, nanhte Karai Kasang hpe kam sham nga manit dai; shing rai nanhte a makam masham hte myit mada ai lam gaw, Karai Kasang hta jung noi nga ai.