TITU 2:14 - Jinghpaw Common Language Bible 2009

¹⁴ Anhte hpe tara tawt lai ai n hkru n kaja ai mara yawng mayawng hta na hkye hkrang shaw la na matu mung, anhte gaw myit masin san seng nna shi hte chyu sha seng ai amyu tai let, kaja reng ai magam bungli galaw na myit katu sharawng ai amyu tai na matu mung, Hkristu gaw anhte a matu mara shi hkum dai hpe ap ya kau nu ai.

Jinghpaw Hanson Version Bible

¹⁴ dai Hkristu Yesu gaw, tara tawt lai ai mara yawng hta na anhte hpe hkrang shaw la nna, shi hkum nan a matu, san da ai hte kaja reng ai magam bungli shagu hkan shachyut ai amyu hpe jasan jaseng lu hkra, anhte a matu mara shi hkum dai hpe, ap ya kau nu ai.

TITU 2:14 ပူးပေါင်းရင်းမြစ်များ

NINGPAWT NINGHPANG 48:16

Machyi shoichyum ai yawng hta na ngai hpe hkye mawai la sai lamu kasa gaw shan hpe shaman ya u ga law! Nye a mying hte mung, nye a kaji Abraham hte nye wa Isak yan a amying hte mung, ndai ma yan matut nna hkrung nga mu ga law! Shan hta kashu kasha law law mayat maya wa nna amyu matu law law gumja gumhpra rai wa manu ga law!”

SHAKAWN KUNGDAWN 130:8

Shi gaw shi a Israela amyu masha ni hpe, shanhte a yubak yawng kaw nna hkye hkrang la na ra ai.

SHAKAWN KUNGDAWN 135:4

Shi gaw Yaku hpe shi a matu, Israela amyu masha ni hpe shi madu na matu, lata la nu ai.

PRU MAT 15:16

Hkrit kajawng ai hte hkrit gari ai gaw shanhte a ntsa e du sai. O Madu e, shanhte gaw na a n-gun hpe mu ma ai shaloi, na a amyu masha ni lai mat wa nna, amyu masha ni hpe mayam prat kaw na nang shalawt kau dat ai aten du hkra, hkrit ai hte atsin sha nga nga ma ai.

EZEKELA 36:25

Ngai gaw nanhte a ntsa e, san seng ai ntsin lapri bun nna, nanhte a hpara sumla ni yawng hta na mung, nanhte hpe awu asin di kau shangun ai arai shagu hta na mung, nanhte hpe jasan jaseng la na nngai.

EZEKELA 37:23

Shanhte gaw matsat shabat re ai hpara sumla ni hte shanhte hkum hpe galoi mung awu asin di na n rai. Shanhte tawt lai ai yubak ni gaw shanhte hkum hpe jahten shabyak na n rai. Shanhte tawt lai ai yubak lam yawng kaw na mung, ngai hpe gumle gumlau galaw nga ai kaw na mung, shanhte hpe shalawt dat na nngai. Ngai shanhte hpe jasan jaseng na nngai; shanhte gaw nye a amyu masha ni tai nna ngai mung shanhte a Karai Kasang tai na nngai.

JAW JAU 25:41

Dai shaning du jang shi a kashu kasha ni hte rau nang kaw na pru wa nhtawm shi hte shi a kaji kawa ni nga ai dum nta buga de bai nhtang wa lu na rai nga ai.

MALAHKI 3:3

Shi gaw gumhpraw janghkam wa zawn jeyang na matu du sa na ra ai. Dai Madu a kasa gaw ja gumhpraw jasan jaseng ai janghkam wa zawn jasan jaseng na ra ai, shing rai shanhte gaw dai Madu hpang de jaw ai shagu hkungga ni la sa na mara ai.

BU HKAWM 25:13

Shi hte shi a lakung lama ni chyawm gaw htani htana hkinjawng ni tai nga manu ai. Shi gaw ngai hta lai nna shingjawng kashun ai kaning re ai hpara hpe mung n yu sharawng ai hte amyu masha ni a shut hpyit ai mara ni a matu htingrai htingrat ya nu ai.

MAHTE 1:21

Shi gaw shadang sha shangai na ra ai rai nna, nang shi a mying hpe, Yesu ngu nna shamying lu na rai nga ai; hpa majaw nga yang, shi a amyu hpe tinang a yubak mara kaw na hkye hkrang la na shi rai nga ai,” ngu wu ai.

MAHTE 20:28

Hpa majaw nga yang, dai Masha Kasha wa pyi, masha kaga wa hpe yam sha na nga nna du sa ai n rai; masha kaga hpe galaw daw na matu mara, shi a asak hpe gawng malai jahpu shatai na nga nna du sa ai,” ngu mu ai.

MAHTE 3:12

Shi a lata hta mam yit jasan na matu hkuwawn shi lang da nga ai. Shi a mam chyarang hpe shi yit jasan nhtawm, shi a mam gu hpe gaw mam dum hta shinggyin bang da nna, mam nsan hpe gaw galoi mung n krip ai wan hta nat kau na ru ai, ngu mu ai.

YAWHAN 10:15

nye a sagu ni hpe ngai chye nngai, nye a sagu ni mung ngai hpe chye ma ai; sagu ni a matu mung, nye a asak ngai nawng ya kau nngai.

YAWHAN 6:51

Ngai gaw sumsing lamu de nna yu wa ai, hkrung ai muk rai nga nngai, muk ndai hpe sha ai wa kadai mung, htani htana ahkrung nga na ra ai. Ngai jaw na muk gaw mungkan ga na masha ni asak hkrung nga lu na matu ngai jaw ai nye a ashan rai nga li ai,” ngu nna shanhte hpe htan mu ai.

KASA 15:14

Karai Kasang gaw shawng nna maigan amyu ni hta na nkau mi hpe shi hte seng ai amyu masha shatai na matu lata shaw la nna shanhte hpe lanu lahku ai lam madun dan manu ai lam Simun tsun shaleng dan sai.

KASA 15:9

Madu gaw shanhte hte anhte a lapran e hpa jashai ginhka ai lam n galaw ai sha, shanhte kam sham ai a marang e, shanhte a yubak mara ni hpe raw dat kau ya mu ai,

KASA 20:28

Dai majaw nanhte gaw nanhte a hkum nan hpe mung, nanhte a lata hta Chyoi Pra ai Wenyi ap ya da sai sagu hpung ting hpe mung, sadi sahka hte yu lahku nga mu, Karai Kasang gaw shi a hpung tai nga na matu shi a Kasha a si hkam ai hte mari la ai hpung hpe sagu rem ni zawn bau rem nga mu.

KASA 9:36

Ya, Yopa mare hta Tabihta mying ai kam sham ai; numsha langai mi nga ai. (Shi a mying hpe Grik ga hku Dorka ngu ai rai nna de a lachyum “Chyahkyi” ngu ai re.) Shi gaw shi a aten hpe kaja ai amu bungli galaw nna matsan mayan ni hpe karum madi shadaw alu jaw ai lam hta jai lang nga ai.

GALATI 1:4

Ndai ya na n hkru n kaja ai prat kaw na mawai la u ga, anhte a Kawa Karai Kasang myit ra ai hte maren madat mara let anhte a yubak mara a matu mara Hkristu gaw shi hkum hpe nan ap ya kau nu ai.

GALATI 2:20

Dai rai nna ngai hkum nan naw hkrung nga nngai n rai; Hkristu she ngai hta e asak hkrung nga ai. Ndai ya e ngai hkrung nga ai asak gaw, ngai hpe tsaw ra nna nye a matu mara shi a asak nawng kau ai Karai Kasang a Kasha hpe kam sham ai a marang e hkrung nga ai asak rai nga ai.

GALATI 3:13

“Hpun hta e jen da hkrum ai wa kadai rai ti mung Karai Kasang a dagam dala hkrum ai wa rai nga ai,” nga nna Chyum laika hta tsun da nga ai hte maren, Hkristu gaw anhte a matu mara dagam dala hkrum ai wa tai wa ai a jaw e jep ai Tara a dagam dala hkrum ai kaw na anhte hpe hkrang shaw la mi ai.

EHPESU 1:11

Yawng mayawng hte chyawm gaw, Karai Kasang a yaw shada da ai lam hte myit daw dan da sai hku hte maren byin wa sai; bai nna shi a shawng npawt kaw nna daw dan sai lam hta npawt shatai nhtawm Hkristu hta langai sha rai nga ga ai a marang e shi a shatawng shada ai hku nna anhte hpe shi a amyu masha ni tai na matu lata san da mani ai.

EHPESU 2:10

Hpa majaw nga yang, anhte gaw Karai Kasang e tau hkrau lajang da sai mai kaja ai magam bungli ni hpe galaw na matu, Hkristu Yesu hte langai sha rai nga ai a marang e, Karai Kasang gaw anhte hpe hpan da mani ai.

EHPESU 5:2

Hkristu gaw anhte hpe tsaw ra ai hte anhte a matu shi a hkum hpe Karai Kasang sharawng awng ai manam pyaw ai shagu hkungga shatai nna nawng kau nu ai zawn, nanhte mung tsaw ra myit e hkang ai kata hta ahkawm nga mu.

TARA JAHPRANG 14:2

Ga ntsa hta nga nga ai masha amyu ni yawng hta na shi a amyu masha ni tai nga na matu shi nanhte hpe lata la nu ai majaw dai Madu nanhte a Karai Kasang gaw nanhte hpe madu da nga ai.

TARA JAHPRANG 26:18

Shi gaw nanhte hpe ga sadi tawn da nu ai hte maren, chyoi pra ai amyu masha shatai la na matu mung, shi nanhte hpe hkang da nga ai tara ni yawng hpe hkan sa shatup na matu mung, dai Madu nanhte hpe dai ni hkap la nga manit dai.

TARA JAHPRANG 4:20

Rai ti mung nanhte gaw dai ni rai nga ai hte maren, shi a amyu masha jet tai nga myit ga nga, Egutu mung a grung nga ai wan htung kaw na mawai da ai amyu masha ni rai nga myit dai.

TARA JAHPRANG 7:6

Dai Madu nanhte a Karai Kasang gaw nanhte hpe madu da nga myit dai majaw dai amu galaw mu. Shi hte seng ai laksan amyu masha majing shatai na nga, ginding aga ntsa ting na masha amyu yawng hta na nanhte hpe lata la manit dai.

1 TIMOHTI 1:15

Yubak kap ai ni hpe hkye hkrang la na matu Hkristu Yesu gaw mungkan ga de du sa ai nga ai ga gaw, tup hkrak hkap la nna kam sham ging ai teng man kangka re ai ga nan rai nga ai. Dai yubak kap ai ni hta ngai mahtang kaba htum ai wa rai nga nngai.

1 TIMOHTI 2:10

nawku htung tara atsawm sha hkan shadik ai numsha ni a matu galaw ang ai lam hte maren mai kaja ai arawn alai hte tinang a hkum hpe mawn nga mu ga,

1 TIMOHTI 2:6

Shi gaw masha amyu yawng hpe hkye hkrang la na matu shi hkum nan lala hpe ap kau nu ai; Dai gaw anhte aten ladaw du jang Karai Kasang gaw masha hpe hkye hkrang la mayu ai sakse madun ai lam rai nga ai.

1 TIMOHTI 6:18

Mai kaja ai galaw na matu mung, mai kaja ai bungli ni hta sut su na matu mung, masha kaga ni hpe karan kachyan jaw jahproi ai lam hta mung, n daw n hta jaw ya na matu jin jin rai nga mu ga shanhte hpe sharin shaga nga u.

TITU 2:7

Lam shagu hpe galaw gun hpai ai lam hta, nang hkum nan kaja ai kasi ningli tai nga u. Myit malang ai hte grai laja lana ahkyak shatai ai hku shadum sharin u.

TITU 3:8

Ndai ga gaw kangka re ai ga rai nga ai. Karai Kasang hpe kam sham ai ni gaw masha shagu a matu kaja ai hte akyu rawng ai mai kaja ai amu hpe myit lawm let aten jaw nna galaw nga mu ga lahta de tsun lai wa sai lam ni hpe laksan madung dat ahkyak shatai nna nang tsun shadum shahprang nga na hpe ngai ra nga nngai.

HEBRE 1:3

Shi gaw Karai Kasang a hpung shingkang ningja shapraw nna, Karai Kasang shi nan a gawng shingyan hkrang sumla hpe dagraw ai hte mungkan jan shata shagan nga yawng danghta hpe shi a hpung shingkang rawng ai mungga atsam hte bau sin da nga ai. Shi gaw shinggyim masha ni a yubak mara ni hpe raw dat jasan jaseng ai lam galaw ngut ai hpang, sumsing lamu e daru magam n-gun atsam rawng ai Karai Kasang a hkra maga de dung nga ai.

HEBRE 10:24

Anhte gaw anhte shada da karum shingtau hkat na matu, shada da tsaw ra myit madun hkat let, mai kaja ai lam galaw na matu shada da myit tau myit htang hkat nga ga.

HEBRE 9:14

Hkristu a sai gaw dai hta grau nna shachyoi shapra ya lu ai n rai ni? Hkristu gaw dai htani htana Wenyi hte tinang a hkum hpe ra n rawng ai hkungga hku nna Karai Kasang kaw nawng ya kau sai. Hkrung nga ai Karai Kasang hpe anhte nawku daw jau lu hkra Hkristu a asai gaw anhte a myit masin hpe akyu n rawng ai nawku htung lai chyasi ni hta hkan nang ai kaw na shachyoi shapra la na ra ai.

YAKU 4:8

Karai Kasang hpang de sit sa wa mu; shaloi shi nanhte hpang de sit wa na ra ai. Yubak lu ai ni e, nanhte a lata ni hpe jasan jaseng da mu. Sawt ai ni e, nanhte a myit masin kraw lawang ni hpe jasan jaseng da mu.

1 PETRU 1:18

Nanhte a kaji kawa ni kaw na hkan dagraw la ai manu n rawng ai asak hkrung lam a arawn asam hta na nanhte hpe hpa baw hte galai hkrang la sai lam nanhte chye nga myit dai. Dai gaw jahten sharun kau lu ai ja gumhpraw zawn re ai arai lama ma hte n rai,

1 PETRU 1:22

Ya nanhte gaw dai teng man ai lam hpe madat mara nga let nanhte a hkum ni hpe jasan jaseng kau nhtawm, nanhte a kam sham ai manaw manang ni hpe kaja wa tsaw ra nga myit dai. Dai rai nna nanhte shada da myit masin mahkra hte tsaw ra nga mu.

1 PETRU 2:12

Tara maigan de na ni nanhte hpe n hkru n kaja ai lam galaw ai ni re ngu nna shadu myit yang, nanhte a kaja ai amu mu lu nna dai Madu bai du sa ai Nhtoi hta Karai Kasang hpe shakawn shagrau mu ga, nanhte gaw shanhte a man e nanhte a arawn alai lam hta tsawm htap kup tsup nga myit ga law.

1 PETRU 2:9

Rai ti mung nanhte gaw lata la ai amyu, Hkawhkam a hkinjawng ni, chyoi pra ai amyu masha ni hte Karai Kasang shi nan madu nga ai ni rai nga myit dai; shing rai lata la ai lam gaw, nanhte hpe nsin kata kaw nna shi a mauhpa nhtoi de shaga bang wa ai wa a hpung shingkang rawng ai magam amu ni hpe shana shabra shabrawng dat ya na matu rai nga ai.

1 PETRU 3:18

Hpa majaw nga yang, Hkristu gaw anhte a yubak mara ni a majaw kalang mi hte yawng a matu ngut hkra si hkam sai. Shi gaw kaja ai masha langai mi rai nga da nna yubak lu ai ni a malai si hkam nu ai. Shing rai galaw ai lam gaw nanhte hpe Karai Kasang hpang de woi wa na matu rai nga ai. Shi gaw hkum shan hku nna sat kau ai hkrum timung, wenyi hta Karai Kasang jahkrung la sai.

1 YAWHAN 1:7

Rai ti mung shi gaw nhtoi hta nga nga ai zawn, anhte mung Nhtoi hta asak hkrung hkawm sa nga ga yang gaw, anhte langai hte langai shada da kanawn mazum ai ni rai nga ga ai hte shi Kasha Yesu a asai gaw anhte hta na yubak nlang hte hpe jasan jaseng kau ya mi ai.

1 YAWHAN 1:9

Rai ti mung anhte a yubak mara ni hpe Karai Kasang kaw madun yin la nna hpyi nem ga yang gaw, shi gaw shi a ga sadi hta grin nga nna dai teng man ai amu galaw ai wa rai nga ai majaw, anhte a yubak mara hpe raw dat kau ya na hte, shut hpyit tawt lai ai lam yawng mayawng hta na jasan jaseng la na mi ai.

1 YAWHAN 3:2

Tsaw ra ai ni e, anhte ya e Karai Kasang a kashu kasha ni rai nga ga ai, rai tim hpang de anhte hpa mi tai na dan leng hkra garai n chye lu ga ai: rai ti mung Hkristu dan pru ai shaloi anhte shi hte bung na ga ai, hpa majaw nga yang shi nan teng teng rai nga ai hpe anhte mu lu na gaw ai.

SHINGRAN 1:5

Kangka re ai sakse wa, si mat ai ni hta na shawng numshawn hkrung rawt wa ai wa, dinghta ga na hkawhkam ni hpe up ai Madu Yesu Hkristu kaw nna mung, chyeju hte ngwi pyaw ai gaw nanhte hta anga nga malit ga law. Anhte hpe tsaw ra nna, shi hkum nan hpe hkungga nawng si hkam ai hte anhte a yubak kaw na raw dat mi ai hte,

SHINGRAN 5:9

Shanhte gaw, “Nang gaw dai laika shabawn hpe la na hte, dazik ni hpe gaw kau na ging dan nga ndai. Hpa majaw nga yang, nang sat kau hkrum nit dai rai nna, na a nawng jau si hkam ai hte, amyu bawsang shagu hta na mung, ga amyu shagu hta na mung, Karai Kasang a matu masha ni hpe nang mari la nit dai rai nga ai, nga nna mahkawn ningnan mahkawn ma ai.