TARA JAHPRANG 7:13 - Jinghpaw Common Language Bible 2009

¹³ Shi nanhte hpe tsaw ra nna shaman ya ai majaw nanhte hta law htam wa nna kashu kasha law law mayat maya wa na marin dai; nanhte hta nai mam nsi naisi, sabyi ntsin hte tsanlun sau ni lu la myit ga, nanhte a yi sun hkauna ni hpe shi shaman ya na ra ai; nanhte a sagu, dumsu yam nga hpung ni law htam wa lu mu ga, nanhte hpe shi shaman ya nna jaw ya na ra ai. Shi nanhte hpe jaw na ngu nna nanhte a kaji kawa ni hpe ga sadi tawn da sai mungdan hta ndai shaman chyeju ni yawng nanhte hpe jaw ya na marin dai.

Jinghpaw Hanson Version Bible

¹³ shing rai shi nang hpe tsawra ai hte shaman ya nna shalaw jahtam na rin dai; nang hpe jaw na nga na nji nwa ni hpe dagam da ai mung hta, nang shaprat ai kashu kasha ni hpe mung, na a lamu ga na nsi naisi ngu na, na a nai mam, tsabyi jahku, sau namman hte, na a sagu dumsu yamnga re ai sut hta mung shaman ya na rai ai.

TARA JAHPRANG 7:13 ပူးပေါင်းရင်းမြစ်များ

NEHEMIA 9:32

“O Karai Kasang, anhte a Karai Kasang, Nang gaw kade sha galu kaba nga a hka! Kade sha hkrit mai nga a hka! Kade sha daru magam n-gun rawng nga a hka! Nang gaw ga shaka hte seng ai ga sadi ni hpe sadi sahka hte shatup ndai. Asuri hkawhkam ni anhte hpe dip gamyet sha ai aten kaw nna, ya du hkra pyi, anhte nni nkri kade daram hkam sha kau nga saga hka! Anhte a hkawhkam ni, anhte a ningbaw ni, anhte a hkinjawng ni hte myihtoi ni, anhte a kaji kawa ni hte anhte a amyu masha ni yawng nni nkri hkam sha kau nga saga hka! Anhte nni nkri kade daram hkam sha kau saga ai hpe adum nga u law!

YOBA 1:10

Nang gaw shi hpe mung, shi a dinghku hpe mung, shi madu da ai arung arai shagu hte hpe tut nawng makawp maga ya nga ndai. Shi galaw ai amu shagu hpe nang shaman ya nna, mungdan ting hpring wa lu hkra yam nga law law nang shi hpe jaw ya nit dai.

YOBA 42:12

Dai Madu gaw shawng na lang shi shaman ya ai hta grau nna law hkra pyi Yoba a asak hkrun lam a hpang jahtum daw hta shaman ya nga ai. Yoba gaw sagu mun mi hkying mali, gawla-uk hkying kru, dumsu hkying mali hte lawze hkying mi madu da nga ai.

SHAKAWN KUNGDAWN 1:3

Shanhte gaw hka kau e tu nna, shi a aten hta asi si nhtawm alap mung n hkraw mat ai hpun ni hte bung nga ai. Shanhte galaw ai lam shagu awng dang nga ai.

SHAKAWN KUNGDAWN 107:38

Shi a amyu masha ni hpe shi shaman ya nna, shanhte hta kashu kasha law law mayat maya nga ma ai; shanhte a yam nga ni n yawm mat u ga, shi bau sin ya nga ai.

SHAKAWN KUNGDAWN 11:7

Dai Madu gaw ding hpring nga ai rai nna mai kaja ai magam amu ni hpe tsaw ra nga ai; dai hpe hkan galaw ai ni gaw shi a man e shanu nga lu na mara ai.

SHAKAWN KUNGDAWN 127:3

Kashu kasha ni gaw dai Madu kaw na kumhpa ni rai nga ai; shanhte gaw jet ai shaman chyeju majing ni rai ma ai.

SHAKAWN KUNGDAWN 146:8

Myi n mu ai ni hpe myi shamu ya nna, kataw ai ni hpe shi sharawt la nga ai; shi a ding hpring ai masha ni hpe shi tsaw ra nga ai.

PRU MAT 23:25

Dai Madu nanhte a Karai Kasang rai nga ai Ngai hpe nawku myit dai rai yang chyawm gaw ngai nanhte hpe malu masha hte lu na ntsin shaman ya nhtawm nanhte a machyi makaw ana ahkya mahkra hte hpe yeng seng kau na we ai.

GA SHAGAWP 10:22

Dai Madu a shaman chyeju gaw nang hpe ngamu ngamai shangun nna, bungli shaja ai gaw na sut gan hpe yawn hkyen lam jat ya nga ai n rai.

GA SHAGAWP 15:9

N hkru ai masha ni a lam hpe dai Madu matsat nga ai; jaw ai amu galaw ai ni hpe shi tsaw ra nga ai.

JAW JAU 26:9

Ngai gaw nanhte hpe shaman ya nna kashu kasha law law mayat maya shangun na made ai. Nanhte hte ngai tawn da se ai nye a maga de na ga shaka hpe ngai shagrin da na we ai.

MAHTE 6:33

Shing rai na malai nanhte gaw, shi a mungdan hte shi a ding hpring ai lam hpe shawng tam nga mu; shaloi dai kaga ra ai nlang hte hpe shi nanhte hpe kahtap jaw na marin dai.

YAWHAN 14:21

“Nye a hkang da ai ga ni hpe hkap la nna madat mara hkan sa ai wa gaw ngai hpe tsaw ra ai wa rai nga ai. Ngai e tsaw ra ai wa hpe nye Wa mung tsaw ra na wu ai. Ngai mung dai wa hpe tsaw ra ai hte, ngai hkum nan dai wa hpe shadan dan na we ai,” ngu nna shi hpe tsun wu ai.

YAWHAN 15:10

Ngai gaw nye Wa a hkang da ai ga ni hpe madat mara hkan shatup nna, shi a tsaw ra ai hta maju jung nga nngai zawn, nanhte mung nye a hkang da ai ga ni hpe madat mara hkan shatup myit yang gaw, nye a tsaw ra ai hta maju jung na myit dai.

YAWHAN 16:27

Hpa majaw nga yang, Wa shi nan nanhte hpe tsaw ra nga ai. Nanhte ngai hpe tsaw ra nna, ngai gaw Wa kaw na du sa ai hpe kam sham myit dai majaw, Wa gaw nanhte hpe tsaw ra nga ai.

TARA JAHPRANG 1:8

Dai yawng gaw nanhte a kaji kawa Abraham, Isak, Yaku hte shanhte a amyu matu mara ni hpe Ngai Madu nan jaw na ngu nna ga sadi tawn da ai lamu ga rai nga li ai. Dai rai nna pru sa nhtawm dai mung hpe madu la masu,’” ngu nna anhte hpe tsun mi ai.

TARA JAHPRANG 13:17

Shing rai yang jahten sharun kau na matu daw dan da sai mare na arai hpa hpe mung nanhte a matu hkum mazing la nga myit. Shaloi dai Madu gaw masin kawp nna matsan dum ai myit nanhte hpe madun dan na ra ai. Dai ni ngai nanhte hpe jaw made ai shi a hkang da ai ga ni yawng hpe madat mara hkan sa nna shi hpyi ai hte maren galaw ai rai yang, shi gaw nanhte a nji nwa ni hpe ga sadi tawn da nu ai hte maren nanhte hpe matsan dum nna law htam ai amyu masha shatai na rai wu ai.

TARA JAHPRANG 28:1

“Dai ni, ngai nanhte hpe jaw ai shi a hkang da ai ga ni yawng hpe sadi sahka let shadik shatup nhtawm dai Madu nanhte a Karai Kasang a ga hpe madat mara hkan sa myit yang gaw, ndai ginding aga ntsa na masha amyu gale yawng hta nanhte hpe shagrau sha-a na marin dai.

TARA JAHPRANG 28:11

Nanhte hpe jaw na ngu nna nanhte a nji nwa ni hpe ga sadi tawn da ai mungdan hta, kashu kasha law law, dumsu law law hte nai mam nsi naisi hkum sumhpa, dai Madu nanhte hpe n taw n tsang shakat ya na marin dai.

TARA JAHPRANG 30:5

Shing rai nanhte a nji nwa ni lang mi nga lai wa yu sai mungdan hpe bai madu la lu nna shanhte hta grau ngamu ngamai shangun ai hte law htam shangun na marin dai.

TARA JAHPRANG 7:7

“Nanhte gaw kaga masha amyu ni hta grau law nga myit dai majaw dai Madu nanhte hpe tsaw ra nna lata la myit dai n rai; nanhte gaw ginding aga ntsa e kaji htum ai amyu baw ni she rai nga myit dai.