TARA JAHPRANG 4:20 - Jinghpaw Common Language Bible 2009

²⁰ Rai ti mung nanhte gaw dai ni rai nga ai hte maren, shi a amyu masha jet tai nga myit ga nga, Egutu mung a grung nga ai wan htung kaw na mawai da ai amyu masha ni rai nga myit dai.

Jinghpaw Hanson Version Bible

²⁰ Nanhte hta, dai ni rai nga ai hte maren, Yehowa a matu Sali wunli amyu tai myit ga nga, Egutu mung a hpri wan mang na shi nanhte hpe gare la manit dai.

TARA JAHPRANG 4:20 ပူးပေါင်းရင်းမြစ်များ

1 HKAWHKAM 8:51

Shanhte gaw Egutu mung grung nga ai wan htung kaw na nang woi shapraw wa ai na a amyu masha majing ni rai nga ai.

SHAKAWN KUNGDAWN 135:4

Shi gaw Yaku hpe shi a matu, Israela amyu masha ni hpe shi madu na matu, lata la nu ai.

SHAKAWN KUNGDAWN 28:9

Madu e, na a amyu masha ni hpe hkye hkrang la u, na a amyu masha ni hpe shaman ya u. Shanhte hpe yu ai sagu rem wa tai nga nna, shanhte hpe htani htana lanu lahku nga u law.

SHAKAWN KUNGDAWN 33:12

Dai Madu hpe shanhte a Karai Kasang shatai ai amyu baw gaw a nga ai; shi e lata la hkrum ai amyu masha ni gaw a lu nga ai!

PRU MAT 1:13

mazut ai mayam bungli de shanhte hpe nhtum nni di shangun let shanhte a asak hkrun lam ni hpe myit htum myit chyum shangun da ma ai. Dai ni gaw shanhte hpe shanhte a nta gaw gap masing ni hte shanhte a hkauna ni hta bungli galaw shangun ma ai; Shanhte gaw matsan n chye dum nga ma ai.

PRU MAT 34:9

Shi gaw, “Madu e, nang ngai hpe teng teng awng sharawng ndai rai yang, anhte hte rau sa wa na matu ngai nang hpe lajin nngai. Ndai amyu masha ni du ja nga ma ti mung, anhte a n hkru n hkra ai hte shut hpyit ai yubak mara hpe dat kau ya nna, na a amyu masha majing ni zawn anhte hpe hkap la mi law,” ngu nna tsun wu ai.

PRU MAT 6:7

Ngai gaw nanhte hpe nye a amyu masha majing hku shatai la nna, nanhte a Karai Kasang tai na nngai. Ngai gaw Egutu mung mayam prat kaw na nanhte hpe shalawt dat ai nanhte a Karai Kasang dai Madu rai nga ai hpe nanhte chye lu na marin dai.

ESAIA 30:6

Ndai gaw dingda nam mali e nga ai dusat ni hte seng ai Karai Kasang a mungga rai nga ai: “Dat kasa ni gaw hkanghkyi ni, atuk rawng ai lapu ni hte pyen ai baren ni nga nga ai dai hkrit tsang ra ai mungdan hku ga lai mat wa ma ai. Shanhte gaw shanhte a lawze ni hte gawla-uk ni hta manu dan ai kumhpa ni mara nna, shanhte hpe loi mi pyi n karum ya lu ai amyu baw ni a matu htaw sa ma ai.

ESAIA 48:10

Wan htung hta gumhpraw jen yu ai zawn, ngai gaw nang hpe nni nkri ngu ai wan hta chyam dinglik yu ni ai. Rai ti mung, nang gaw hpa akyu mi n rawng nga ndai hpe ngai mu ni ai.

YEREMIA 11:4

Ndai gaw shanhte a matu agrung nga ai wan htung zawn rai nga ai Egutu mung kaw nna shanhte hpe ngai shapraw wa ai shaloi, shanhte a kaji kawa ni hte ngai galaw tawn ai ga shaka rai nga ai. Ngai gaw shanhte hpe nye a ga madat nna ngai hkang da sai lam magup hpe hkan galaw na matu tsun da ni ai. Shanhte nye a ga madat mara ai rai yang, shanhte gaw nye a amyu masha ni tai nna, ngai gaw shanhte a Karai Kasang tai na lam mung, ngai shanhte hpe tsun ni ai.

Daniela 3:26

Dai rai nna Nebuhkadneza gaw grung nga ai wan htung chyinghka lam de sa wa nhtawm, “Shadrak! Meshak! Abednego! Tsaw Htum ai Karai Kasang a shangun ma ni e, pru wa marit!,” ngu nna jahtau tsun wu ai. Shanhte mung kalang lata pru wa ma ai.

EHPESU 1:11

Yawng mayawng hte chyawm gaw, Karai Kasang a yaw shada da ai lam hte myit daw dan da sai hku hte maren byin wa sai; bai nna shi a shawng npawt kaw nna daw dan sai lam hta npawt shatai nhtawm Hkristu hta langai sha rai nga ga ai a marang e shi a shatawng shada ai hku nna anhte hpe shi a amyu masha ni tai na matu lata san da mani ai.

EHPESU 1:18

Madu gaw nanhte hpe hpa baw myit mada ai lam hta shaga la sai hpe mung Madu a amyu masha ni hpe ndat da ai mauhpa chyeju sali wunli ni gaw, kade wa n taw n tsang rai nga ai hpe mung,

TARA JAHPRANG 14:2

Ga ntsa hta nga nga ai masha amyu ni yawng hta na shi a amyu masha ni tai nga na matu shi nanhte hpe lata la nu ai majaw dai Madu nanhte a Karai Kasang gaw nanhte hpe madu da nga ai.

TARA JAHPRANG 26:18

Shi gaw nanhte hpe ga sadi tawn da nu ai hte maren, chyoi pra ai amyu masha shatai la na matu mung, shi nanhte hpe hkang da nga ai tara ni yawng hpe hkan sa shatup na matu mung, dai Madu nanhte hpe dai ni hkap la nga manit dai.

TARA JAHPRANG 32:9

rai ti mung shi chyawm gaw Yaku amyu matu mara ni hpe shi a matu lata la nu ai.

TARA JAHPRANG 7:6

Dai Madu nanhte a Karai Kasang gaw nanhte hpe madu da nga myit dai majaw dai amu galaw mu. Shi hte seng ai laksan amyu masha majing shatai na nga, ginding aga ntsa ting na masha amyu yawng hta na nanhte hpe lata la manit dai.

TARA JAHPRANG 9:26

Ngai mung, ‘Tsaw Htum ai Madu e, na a galu kaba ai daru magam n-gun atsam hte Egutu mung kaw na hkrang shaw wa ai na a amyu masha ni hpe hkum shamyit kau et.

TARA JAHPRANG 9:29

Kaja wa tsun ga nga yang, na a galu kaba ai daru magam n-gun atsam hte Egutu mung kaw na nang woi shapraw wa nhtawm na a amyu masha ni majing tai na matu nang lata san da ai amyu masha ni she rai nga ma ai,’ ngu nna hpyi nem wu ai.

TITU 2:14

Anhte hpe tara tawt lai ai n hkru n kaja ai mara yawng mayawng hta na hkye hkrang shaw la na matu mung, anhte gaw myit masin san seng nna shi hte chyu sha seng ai amyu tai let, kaja reng ai magam bungli galaw na myit katu sharawng ai amyu tai na matu mung, Hkristu gaw anhte a matu mara shi hkum dai hpe ap ya kau nu ai.

1 PETRU 2:9

Rai ti mung nanhte gaw lata la ai amyu, Hkawhkam a hkinjawng ni, chyoi pra ai amyu masha ni hte Karai Kasang shi nan madu nga ai ni rai nga myit dai; shing rai lata la ai lam gaw, nanhte hpe nsin kata kaw nna shi a mauhpa nhtoi de shaga bang wa ai wa a hpung shingkang rawng ai magam amu ni hpe shana shabra shabrawng dat ya na matu rai nga ai.