TARA JAHPRANG 28:1 - Jinghpaw Common Language Bible 2009

¹ “Dai ni, ngai nanhte hpe jaw ai shi a hkang da ai ga ni yawng hpe sadi sahka let shadik shatup nhtawm dai Madu nanhte a Karai Kasang a ga hpe madat mara hkan sa myit yang gaw, ndai ginding aga ntsa na masha amyu gale yawng hta nanhte hpe shagrau sha-a na marin dai.

Jinghpaw Hanson Version Bible

¹ “Dai ni ngai nang hpe hkang da mada ga yawng hpe hkan nang lu hkra, na a Karai Kasang Yehowa a ga hpe nang azin ayang madat n yang gaw, na a Karai Kasang Yehowa, masha amyu nlang hte hta nang hpe shagrau na rin dai:

TARA JAHPRANG 28:1 ပူးပေါင်းရင်းမြစ်များ

1 HKAWHKAM LABAU 14:2

Dai Madu gaw shi hpe Israela hkawhkam aya shagrin ya nu ai hpe mung, shi a amyu masha ni a matu shi a mungdan hpe ngamu ngamai shangun nu ai hpe mung Dawi dum chye wa nga ai.

SHAKAWN KUNGDAWN 106:3

Shi a hkang da ai ga ni hpe madat mara hkan nang nga nna, ding man ai amu hpe tut nawng e, galaw nga ai ni gaw a nga ai.

SHAKAWN KUNGDAWN 111:10

Madu hpe shagrau sha-a ai gaw hpaji rawng wa na lam rai nga ai; shi a hkang da ai ga matsun ni hpe madat mara hkan sa nga ai ni yawng hte hpe teng man ai tara dara lam jaw ya nga ai. Shi gaw htani htana shakawn kungdawn ai lam hkam la na ra ai.

SHAKAWN KUNGDAWN 119:128

Dai majaw na a ga matsun yawng hte hpe ngai hkan nang nga nngai; shut hpyit ai lam yawng hte hpe ngai n dawng nga nngai.

SHAKAWN KUNGDAWN 119:6

Na a hkang da ai tara ni yawng hpe ngai madat mara lu ai rai yang ngai kaya kahpa hkrum na nngai n rai.

SHAKAWN KUNGDAWN 148:14

Shi gaw shi a amyu baw ni hpe n-gun shaja ya nga ai majaw, shi a amyu masha ni yawng shi hpe shakawn nga ma ai- shi hpe grai tsaw ra ai Israela amyu masha ni mung shi hpe shakawn nga ma ai. Dai Madu hpe shakawn mu!

SHAKAWN KUNGDAWN 91:14

Karai Kasang gaw, “Ngai hpe tsaw ra ai ni hpe, ngai hkye la na ring ngai; ngai hpe Madu zawn yin la ai ni hpe ngai makawp maga na ring ngai.

PRU MAT 15:26

Shi gaw, “Nye a hkang da ai ga ni hpe shadik shatup nna, ding man ai hku galaw ai hte nye a ga matsun hpe tsep kawp madat mara hkan sa myit dai rai yang chyawm gaw Egutu masha ni hta ngai shakap ai ana ahkya hpa hte mung, nanhte hpe ngai ari jaw na made ai n rai. Ngai gaw nanhte hpe shamai ya ai dai Madu rai nga nngai,” ngu nna tsun wu ai.

PRU MAT 23:22

Rai ti mung, shi a ga madat mara nna, ngai hkang da ai lam shagu hpe hkan galaw nga yang chyawm gaw na a gumlau hpyen ni yawng hpe ngai gasat kau ya na nngai.

PRU MAT 23:25

Dai Madu nanhte a Karai Kasang rai nga ai Ngai hpe nawku myit dai rai yang chyawm gaw ngai nanhte hpe malu masha hte lu na ntsin shaman ya nhtawm nanhte a machyi makaw ana ahkya mahkra hte hpe yeng seng kau na we ai.

ESAIA 1:19

Nanhte gaw nye a ga hpe sha madat mara nga myit dai rai yang, dai lamu ga na pru ai nsi naisi kaja ni hpe nanhte sha lu na marin dai.

ESAIA 3:10

Ding hpring ai wa gaw a lu na ra ai, arai shagu shanhte a matu mai kaja na ra ai. Shanhte gaw shanhte galaw ai amu a majaw kabu gara na mara ai.

YEREMIA 11:4

Ndai gaw shanhte a matu agrung nga ai wan htung zawn rai nga ai Egutu mung kaw nna shanhte hpe ngai shapraw wa ai shaloi, shanhte a kaji kawa ni hte ngai galaw tawn ai ga shaka rai nga ai. Ngai gaw shanhte hpe nye a ga madat nna ngai hkang da sai lam magup hpe hkan galaw na matu tsun da ni ai. Shanhte nye a ga madat mara ai rai yang, shanhte gaw nye a amyu masha ni tai nna, ngai gaw shanhte a Karai Kasang tai na lam mung, ngai shanhte hpe tsun ni ai.

YEREMIA 12:16

Shanhte gaw Bala hpara a mying gang nna dagam na matu nye a amyu masha ni hpe lang mi sharin ya mu ai hte maren, shanhte a myit masin mahkra hte nye a amyu masha ni a nawku htung hpe hkap la nna, ‘Dai Madu hkrung nga ai,’ nga nna dagam ai rai yang, shanhte gaw nye a amyu masha ni tai wa lu nhtawm ngamu ngamai wa na mara ai.

YEREMIA 17:24

Shanhte gaw nye a hkang da ai ga ni yawng hpe hkan sa madat mara lu na lam ndai amyu masha ni hpe tsun u. Shanhte gaw Bansa Nhtoi hta dai mare a chyinghka lam hku lit hpa mung n hpai lai lu na ma ai. Shanhte gaw chyoi pra ai shani zawn dai Bansa Nhtoi hpe hkan sa lu nna amu bungli hpa mung galaw lu na ma ai n rai.

LUKA 1:6

Dai yan gaw Karai Kasang a man e ding hpring ai yan rai nga ma ai. Shan gaw Madu a jep ai tara nga manga hte hkang da mada yawng hpe htep lahti hkan nang ma ai.

LUKA 11:28

Rai ti mung, Yesu gaw, “Karai Kasang a mungga madat la nna, hkan nang ai ni mahtang gade wa a lu nga ma hka!,” ngu nna htan wu ai.

LUKA 9:48

“Ndai ma hpe nye a mying a majaw hkap la ai wa kadai mung, ngai e shangun dat ai wa hpe hkap la ai rai nga ai, dai rai nna, nanhte mahkra hta grau kaji ai wa gaw, grau kaba ai wa rai nga ai,” ngu mu ai.

YAWHAN 15:14

Nanhte hpe ngai hkang da ai ga hkan shatup myit yang gaw nanhte nye a jinghku ni rai nga myit dai.

ROMA 2:7

Masha nkau mi gaw kaja ai amu galaw nga let, hpung shingkang hpe mung, arawng sadang hpe mung, n si n mat ai asak hkrung lam hpe mung tam nga ma ai; Dai ni hpe Karai Kasang htani htana asak jaw na ra ai.

GALATI 3:10

Dai jep ai tara hkan sa shadik ai lam hpe kam hpa nga ai ni kadai rai ti mung dagam dala a npu e rai nga ma ai. Hpa majaw nga yang, Chyum Laika gaw, “Dai tara hta ka da mada hte maren n hkan shatup nga ai wa kadai rai ti mung, dagam dala hkrum na mara ai,” nga nna ka da nga ai.

TARA JAHPRANG 11:13

“Dai rai nna dai ni ngai nanhte hpe jaw ya sai hkang da ai ga ni hpe madat mara hkan sa let dai Madu nanhte a Karai Kasang hpe tsaw ra nna myit masin mahkra hte shi hpe daw jau nga mu.

TARA JAHPRANG 11:27

dai ni ngai nanhte hpe jaw ya nga ai, dai Madu nanhte a Karai Kasang a hkang da ai ga hpe nanhte madat mara myit yang gaw shaman chyeju lam rai nga ai;

TARA JAHPRANG 15:5

“Dai ni ngai nanhte hpe hkang da ai lam magup hpe azin ayang hkan sa nna shi a ga madat mara myit dai rai yang, amyu masha ni hta na langai mi mung matsan mayan hkrum na ra ai n rai.

TARA JAHPRANG 26:18

Shi gaw nanhte hpe ga sadi tawn da nu ai hte maren, chyoi pra ai amyu masha shatai la na matu mung, shi nanhte hpe hkang da nga ai tara ni yawng hpe hkan sa shatup na matu mung, dai Madu nanhte hpe dai ni hkap la nga manit dai.

TARA JAHPRANG 26:19

Shi hpan da sai masha amyu baw danghta hta shi a mying ningsang hpe shakawn kungdawn let galu kaba kajai gumhkawng shangun na marin dai. Shi tawn da ai ga sadi hte maren nanhte gaw shi a chyoi pra ai amyu masha majing tai na marin dai.”

TARA JAHPRANG 28:13

Dai ni, ngai nanhte hpe jaw ai shi a hkang da ai ga ni yawng hta sadi sahka let madat mara hkan sa myit dai rai yang, dai Madu nanhte a Karai Kasang gaw amyu baw ni hta ningbaw tai shangun na marin dai; hpang hkan ai wa shatai na n rai; nanhte gaw tut nawng ngamu ngamai nna galoi mung hkrat sum na myit dai n rai.