TARA JAHPRANG 26:7 - Jinghpaw Common Language Bible 2009

⁷ Shaloi anhte mung anhte a ji wa ni a Karai Kasang dai Madu kaw karum la na matu hpyi jahtau saga ai. Dai rai nna anhte hkrum sha ai nni nkri, yak hkak jam jau lam hte nchyi nmu lam ni hpe mu ai hte na ya mi ai.

Jinghpaw Hanson Version Bible

⁷ shaloi anhte gaw anhte a ji wa ni a Karai Kasang Yehowa hpe shaga gaw ai rai nna, Yehowa anhte a nsen madat mara ya ai hte anhte hkrum ai bungli lit hte nni nkri hpe yu ya mi ai.

TARA JAHPRANG 26:7 ပူးပေါင်းရင်းမြစ်များ

NINGPAWT NINGHPANG 21:17

Karai Kasang mung dai ma jahtau hkrap ai nsen na wu ai rai nna, sumsing lamu na Karai Kasang a lamu kasa gaw Hagara hpe, “Hagara e, nang hpa baw ru yak tsin-yam hkrum hkra nga n ta? Hkum hkrit nga et, Karai Kasang gaw dai ma a jahtau hkrap ai nsen hpe na ya nu ai.

NINGPAWT NINGHPANG 29:32

Lea hta na-um nasin hkum tai wa nna shadang sha langai shangai wu ai. Lea gaw, “Madu nye a tsin-yam tsindam hpe mu ya nu ai. Ya chyawm gaw nye madu wa ngai hpe tsaw ra lu na nu ai,” ngu nna tsun wu ai. Shing rai shi hpe Rubin ngu nna shamying wu ai.

2 SAMUELA 16:12

Dai Madu gaw nni nkri lam hpe yu matsing nhtawm, shi matsa ai a marang e, ngai hpe shaman chyeju nkau mi jaw ya nhten,” ngu nna tsun wu ai.

SHAKAWN KUNGDAWN 119:132

Nang hpe tsaw ra nga ai ni yawng hte a ntsa e, nang galaw ai zawn, ngai hpang de kayin wa nna ngai hpe matsan dum la e.

SHAKAWN KUNGDAWN 31:8

Nye gumlau hpyen ni ngai hpe rim la na, nang ap ya nga ndai n rai; ngai sa mayu ai shara de ndut ndang hkawm sa lu na lam, nang lajang ya nga ndai.

SHAKAWN KUNGDAWN 50:15

Ru tsang hkrum ai shaloi, ngai hpe shaga e, ngai nang hpe hkye hkrang la na nngai; shing rai, nang ngai hpe shakawn na rin dai,” nga ai.

PRU MAT 2:23

Shaning tsawmra mi na jang, Egutu hkawhkam si mat sai, rai ti mung Israela amyu masha ni chyawm gaw shanhte a mayam lit kata hta naw madai nga ai hte karum la na matu hkrap sharung nga ma ai. Shanhte a jahtau hkrap ai nsen gaw Karai Kasang hpang de hkrang lung wa nna,

PRU MAT 2:25

Shi gaw Israela amyu masha ni a mayam lit hpe mu ya nna, shi shanhte hpe yu matsan dum wu ai.

PRU MAT 3:9

Nye a amyu masha ni a hkrap sharung ai nsen hpe ngai kaja wa teng teng na ni ai; Egutu masha ni shanhte hpe kade daram dip gamyet sha nga masai hpe mung ngai mu ni ai.

PRU MAT 4:31

Dai Madu mung shanhte kaw du sa nna shanhte kade mazut ai hku adip arip hkrum sha nga ma ai hpe mu mada ya nu ai lam hpe shanhte na ma ai shaloi, kam sham ai hte gum dagup nna nawku ma ai.

PRU MAT 6:5

Ya mung, Egutu masha ni mayam shatai da ai Israela amyu masha ni a madai sharung ai nsen hpe ngai na ni ai rai nna nye a ga shaka hpe dum ni ai.

YEREMIA 33:2

Ginding aga hpe hpan da nna dai hpe hkrang gyin da ai hte shi a shara hta tawn da ai dai Madu gaw ngai hpe tsun ni ai. Shi gaw dai Madu mying ai wa rai nga nna,

1 SAMUELA 9:16

“Hpawt de ndai aten daram hta e, Benyamin amyu bawsang hta na masha langai mi, nang hpang de ngai shangun dat na nngai; shaloi nye a amyu masha Israela hpe up hkang ai wa shatai nna, shi hpe namman jaw ya na rai ndai; shing rai shi gaw shanhte hpe Hpilisti masha ni a lata kaw nna hkye mawai la na ra ai. Nye a amyu masha ni hkam sha ai nni nkri hpe ngai mu se ai; shanhte hpe karum la na matu shanhte a hpyi jahtau ai nsen ni hpe mung na se ai,” ngu nna tsun wu ai.