TARA JAHPRANG 13:4 - Jinghpaw Common Language Bible 2009

⁴ Dai Madu a hpang hkan nang let shi hpe shagrau sha-a mu; shi a hkang da ai ga hpe madat mara hkan sa nhtawm dai ni hpe shadik shatup nga mu; shi hpe nawku ai hte shi hta sadi dung nga mu.

Jinghpaw Hanson Version Bible

⁴ dai myihtoi wa, dai yup mang mu ai wa a ga nang madat lu na n rai: kaning rai nme law, nanhte hta nanhte a Karai Kasang Yehowa hpe kraw lawang mahkra hte myit masin mahkra hte tsawra ai myit rawng ai n rawng ai, nanhte a Karai Kasang Yehowa chyam yu ai rai nga ai.

TARA JAHPRANG 13:4 ပူးပေါင်းရင်းမြစ်များ

2 HKAWHKAM 23:3

Shi gaw shadaw makau e tsap let, dai Madu a ga hpe madat mara nna shi a tara ni yawng hte hkang da ai ga ni hpe myit masin mahkra hte shadik shatup let dai laika hta ka da ai hte maren dai Madu hte ga shaka shagrin da nhtawm dai hpe hkan galaw na ga shaka tawn da wu ai. Amyu masha ni yawng mung dai ga shaka hpe hkan sa na matu ga sadi tawn da nga masai.

2 HKAWHKAM LABAU 34:31

Shi gaw hkawhkam shadaw makau e tsap nga let shi a myit masin, wenyi mahkra hte shi a ga hpe madat mara nna tara hte hkang da ai ga ni yawng hpe shadik shatup let, laika hta ka da sai ga shaka hte maren hkan galaw lu hkra nga, dai Madu hte ga shaka shagrin da nu ai.

YEREMIA 7:23

Rai ti mung, nye a ga madat na matu shanhte hpe ngai hkang da ni ai, ngai gaw shanhte a Karai Kasang tai nna, shanhte gaw nye a amyu masha ni tai na mara ai. Ngai shanhte hpe hkang da sai asak hkrun lam hta hkawm sa na lam ngai tsun ni ai, shaloi, shanhte gaw lam shagu hta ngamu ngamai wa na mara ai.

MIHKA 6:8

N rai law, dai Madu gaw anhte hpe mai kaja ai amu galaw na matu she hkang da sai. Anhte kaw na shi hpyi ai gaw ndai lam rai nga ai: “Teng man ai amu galaw na lam, dinggrin tsaw ra myit madun dan na lam, anhte a Karai Kasang hte kanawn mazum ai hta myit grit myit nem hte asak hkrung hkawm nga na lam ni hpe sha, shi hpyi nga ai.”

LUKA 1:6

Dai yan gaw Karai Kasang a man e ding hpring ai yan rai nga ma ai. Shan gaw Madu a jep ai tara nga manga hte hkang da mada yawng hpe htep lahti hkan nang ma ai.

ROMA 6:13

Dai hta n-ga nanhte a hkum hkrang daw shan hpe mung n hkru n shawp ai hta asung jashawn na matu yubak hpe hkum ap ya myit. Shing rai na malai nanhte si ai kaw na hkrung rawt ai n re ai hku nna mung, ding hpring mai kaja ai lam ni hta jai lang hkam na matu mung tinang hkum hkrang hpe Karai Kasang kaw sak ya mu.

1 KORINHTU 6:17

Rai ti mung dai Madu hte pu sin matut ai hku manoi nga ai wa gaw, wenyi lam hku nna Madu hte hkum shan langai sha rai nga ai.

TARA JAHPRANG 10:20

Dai Madu nanhte a Karai Kasang hpe hkrit hkungga nna shi hpe chyu sha nawku lu na rai myit dai. Shi hta sadi dung let shi a mying ningsang hta chyu sha ga sadi ni hpe shagrin da lu na rai myit dai.

TARA JAHPRANG 11:1

“Dai Madu nanhte a Karai Kasang hpe tsaw ra let, shi a tara ni yawng hpe tut nawng madat mara hkan sa na rai myit dai.

TARA JAHPRANG 30:20

Dai Madu nanhte a Karai Kasang hpe tsaw ra mu; shi a ga madat mara let shi hta sadi dung nga mu. Nanhte a nji nwa Abraham, Isak hte Yaku hte hpe shi jaw ai ga sadi mungdan hta nanhte hte nanhte a amyu matu mara ni anga nga lu na marin dai,” ngu nna tsun wu ai.

TARA JAHPRANG 6:13

Dai Madu nanhte a Karai Kasang hpe shagrau sha-a nna shi hpe chyu sha nawku nhtawm shi a mying ningsang hta sha nanhte a ga sadi ni hpe tawn da lu na rai myit dai.

TARA JAHPRANG 6:5

Dai Madu na a Karai Kasang hpe na a myit kraw lawang mahkra hte, na a asak mahkra hte na a n-gun lagaw mahkra hte tsaw ra nga u.

KOLOSE 1:10

Shing rai yang nanhte gaw, Karai Kasang a myit ra ai hku asak hkrung lu nna shi a sharawng awng ai lam hpe tut nawng e nanhte hkan sa galaw lu na marin dai. Dai shaloi nanhte a asak hkrung lam gaw mai kaja ai magam bungli shagu hta asi si wa nna, Karai Kasang hpe chye chyang ai lam hta jat galu kaba wa na marin dai.

2 YAWHAN 1:6

Ya ngai tsun nga ai tsaw ra ai ngu ai gaw Karai Kasang a hkang da ai ga hpe madat mara hkan sa let asak hkrung ai lam hpe ngu ai rai nga ai. Shawng npawt kaw nna nanhte yawng na yu manit dai hkang da ai ga chyawm gaw, nanhte yawng tsaw ra ai hta asak hkrung na lam rai nga ai.

1 SAMUELA 7:3

Samuela gaw Israela amyu masha ni hpe, “Nanhte a myit kraw lawang mahkra hte dai Madu hpang de kayin wa myit dai rai yang, maigan hpara ni yawng hte karai num Astarte a sumla ni hpe yeng seng kau lu na rai myit dai. Nanhte nan dai Madu hta tsep kawp ap nawng nna shi hpe chyu sha nawku myit dai rai yang, Hpilisti masha ni a lata na shi nanhte hpe hkye mawai la na ra ai,” ngu nna tsun wu ai.