TARA JAHPRANG 12:10 - Jinghpaw Common Language Bible 2009

¹⁰ Ya nanhte Yawdan hka rap jang, dai Madu nanhte hpe mungdan madu la shangun nhtawm dai yang e nga lu na rai myit dai. Shaloi nanhte a gumlau hpyen ni yawng a lata kaw na shim lum hkra shi nanhte hpe bau sin ya ai a majaw ngwi pyaw sim sa ai hte nga lu na rai myit dai.

Jinghpaw Hanson Version Bible

¹⁰ Rai timung, nanhte Yawdan hka rap nna, Sali wunli matu nanhte a Karai Kasang Yehowa nanhte hpe jaw ai mungdan hta nanhte nga sha lu ai hte, grup yin masha hpyen ni yawng a lata na maga tawn nna, nanhte ngwipyaw nga lu ai shaloi;

TARA JAHPRANG 12:10 ပူးပေါင်းရင်းမြစ်များ

1 HKAWHKAM 4:25

Shi ahkrung nga dingsa Yuda hte Israela mung na amyu masha ni shim lum ai hte shanu nga lu ma ai majaw, dinghku shagu tinang nang a sabyi ru ni hte lakum hpun ni hta ngwi pyaw ai hte nga lu ma ai.

1 HKAWHKAM 8:56

“Shi ga sadi tawn da nga ai hte maren shi a amyu masha ni hpe ngwi pyaw sim sa lam jaw ya ai dai Madu hpe shakawn mu law. Shi a shangun ma Mawshe hku nna jaw da sai kaga ga sadi ni yawng hpe shi shatup nga ai.

1 HKAWHKAM LABAU 22:18

Shi gaw, “Dai Madu na a Karai Kasang gaw nang hte rau rai nga nna, shara shagu hkan ngwi pyaw sim sa lam nang hpe jaw da nga sai. Shi gaw ngai hpe ndai mung na amyu masha ni yawng hpe up hkang shangun nga ai; ya chyawm gaw shanhte gaw na a npu hte dai Madu a man e taw nga ma ai.

SHAKAWN KUNGDAWN 4:8

Ngai kaleng taw ai shaloi, ngwi pyaw ai hte ngai yup lu nga nngai; O Madu e nang chyu sha ngai hpe hkum hkum tsup tsup shim ai shara hta tawn da nga ndai.

PRU MAT 33:14

Dai Madu gaw, “Ngai nang hte rau sa na nngai, ngai nang hpe awng padang jaw na de ai,” ngu nna tsun wu ai.

GA SHAGAWP 1:33

Rai ti mung, nye a ga hpe madat mara ai ni chyawm gaw shim lum ai lam lu la na ma ai. Shi gaw ngwi pyaw sim sa nna, hkrit tsang lam hpa mung hkrum hkra na wu ai n rai.”

YEREMIA 23:6

Shi hkawhkam tai nga ai shaloi, Yuda amyu masha ni shim lum nga na mara ai, Israela amyu masha ni ngwi pyaw sim sa ai hte nga lu na mara ai. Shi gaw ‘Anhte A Hkye Hkrang La Madu,’ ngu nna shamying hkrum na ra ai.

YEREMIA 32:37

Nye a pawt sindawng ai hte masin kahtet ai hta ngai shanhte hpe shaden shabra kau dat ai mungdan ni yawng hta na amyu masha ni hpe ngai shinggyin la na nngai; ngai gaw shanhte hpe ndai shara de bai woi wa nhtawm ndai yang e shim lum ai hte shanhte shanu nga lu mu ga.

YEREMIA 33:11

nang gaw kabu gara garu jahtau nsen, mani pyaw ai nsen hte kabu gara ai hkungran poi lusha sha ai nsen ni hpe kalang mi bai na lu na rin dai. Shanhte gaw nye a Nawku Htingnu de mahku hkungga ni la sa let mahkawn shakawn ai nsen hpe nang na lu na rin dai; shanhte gaw, ‘Shi gaw mai kaja nga ai hte shi a tsaw ra myit htani htana prat dingsa agrin nga ai majaw, Chyahtum Chyalai N-gun Rawng ai dai Madu hpe chyeju dum mu,’ ngu nna tsun na mara ai. Ngai gaw ndai mungdan hpe shawng na hte maren, ngamu ngamai shangun na nngai. Dai Madu ngai nan tsun ni ai,” nga nna tsun wu ai.

EZEKELA 28:26

Shanhte gaw dai shara hta shim lum ai hte shanu nga lu na mara ai; Shanhte gaw nta ni galaw nna sabyi sun ni hkai na mara ai. Ngai gaw shanhte hpe n kaw n law di kau ai shanhte a htingbu mungdan ni yawng hpe ari jaw na nngai; shaloi Israela gaw shim nga na ra ai. Ngai nan shanhte a Madu Karai Kasang rai nga ai hpe shanhte chye lu na mara ai,” ngu nna tsun wu ai.

EZEKELA 34:25

Ngai gaw shanhte a shim lum lam jaw ya lu ai ga shaka shanhte hte shagrin da na nngai. Mungdan kata na hkrit tsang ra ai matse labye ni hpe mung yeng seng kau na nngai, shaloi nye a sagu ni pa layang ni hta shim ai hte shanu nga lu nna maling kata hkan e mung yup nga lu na mara ai.

EZEKELA 34:28

Maigan tara hkan ai masha amyu baw ni mung shanhte hpe galoi mung kashun kashe lu na mara ai n rai. Matse labye ni mung shanhte hpe kawa sha lu na mara ai n rai. Shanhte gaw shim lum ai hte shanu nga lu nna kadai mung shanhte hpe jahkrit shama lu na mara ai n rai.

EZEKELA 38:11

Makawp maga lam hpa mung n nga ai hte mare bunghku n kum da ti mung, ngwi pyaw sim sa ai hte shim lum ai hku amyu masha ni tinang hkrai asan apan rai shanu nga ai mungdan hpe shang gasat na matu nang myit daw dan na rin dai.

EZEKELA 38:8

Shaning law law lai mat wa ai hpang, masha amyu baw ni law law a lata kaw na rau sha woi nhtang wa nna hpyen majan hpa mung n hkrit n tsang ra sai hte amyu masha ni shanu nga ai mungdan hpe shang gasat na matu ngai shi hpe ahkang jaw ya na nngai. Shi gaw aten na na katsi katsang tai mat nna jahkam da sai rai ti mung, ya, dai mungdan hta amyu masha ni yawng shim lum ai hte shanu nga sai Israela bum ni hpe shang gasat na ra ai.

TARA JAHPRANG 11:31

Dai Madu nanhte a Karai Kasang jaw ya nga ai mungdan hpe madu la na matu, Yawdan hka rap na nanhte ri ri sha rai nga manit dai. Nanhte gaw dai mung hpe la nna dai yang e shanu nga myit yang, dai ni ngai nanhte hpe jaw ya nga ai tara ni yawng hpe teng teng hkan sa madat mara lu na rai myit dai.

TARA JAHPRANG 3:27

Pisga bum pungding de lung wa nhtawm sinpraw, sinna, dingdung dingda maga de yu la u. Nang gaw Yawdan hka galoi mung rap lu na n rai nit dai majaw nang mu mamu hpe atsawm sha mada la u.

TARA JAHPRANG 33:12

Shi gaw Benyamin amyu bawsang hte seng nna ning ngu tsun wu ai: “Ndai amyu bawsang hpe dai Madu tsaw ra nna makawp maga da nga ai; Shi shanhte hpe shani tup makawp maga ya nna, shanhte a ka-ang e shi nga nga ai.”

TARA JAHPRANG 33:28

Shing rai, lamu de na numri hkrat ai hte ga kata na hka hpawk ni pru nhtawm, nai mam hte sabyi ntsin ing ai lamu ga hta, Yaku amyu matu ni ngwi pyaw sim sa ai hte shim ai hku nga lu na rai ma ai.

TARA JAHPRANG 4:22

Ngai gaw ndai ga e si na ni ai; hka hpe galoi mung rap lu sana ni ai n rai; rai ti mung nanhte chyawm gaw rap lu nna dai ga sau hte hpring nna ningru ningja ai mungdan hpe madu la lu na rai myit dai.

TARA JAHPRANG 9:1

“Israela amyu masha ni e, madat mu! Nanhte hta grau kaba nna n-gun grau ja ai masha amyu baw ni madu da ai mungdan hpe dai ni, nanhte Yawdan hka rap nhtawm sa madu la na sha rai manit dai. Shanhte a mare ni hpe lamu dep bunghku ni hte kum shinggrup da nga ai.

YAWSHU 11:23

Yawshu gaw dai Madu Mawshe hpe hkang da nu ai hte maren, mungdan ting gasat la nhtawm Israela amyu masha ni hpe shanhte a sali ga hku shi jaw nhtawm amyu bawsang shagu hte hpe sali karan ya wu ai. Dai rai nna, shanhte gaw majan man hta na mung hkring sa la lu ma ai.

YAWSHU 14:1

Ndai gaw Yawdan hka a sinna hkran de nga ai Hkanan mung hpe Israela amyu masha ni kaning rai karan la ai lam rai nga ai. Hkinjawng Eleaza, Nun a kasha Yawshu, Israela amyu bawsang, lakung lama ni a ningbaw ni hpe dai masha jahpan hta hkan nna karan ya mu ai.

YAWSHU 3:17

Amyu masha ni hkun hkraw ai ga ntsa hku kabye rap nga ma yang, dai Madu a Ga Shaka Sumpu hpai nga ai hkinjawng ni gaw amyu masha ni yawng rap kawt mat wa ai aten du hkra Yawdan hka ka-ang na hkun hkraw ai ga ntsa e tsap nga ma ai.

YAWSHU 4:12

Rubin, Gad amyu bawsang ni hte Manashe amyu bawsang ka-ang hkup ni mung Mawshe shanhte hpe tsun da sai hte maren majan gasat na matu jin jin galaw da nhtawm ngam nga ai amyu masha ni a shawng e rap sa wa ma ai.

1 SAMUELA 7:12

Dai hpang, Samuela gaw nlung langai la nna Mizpa hte Shen lapran e jung tawn nhtawm, “Dai Madu gaw lam htum hkra anhte hpe karum la mani ai,” ngu nna tsun wu ai. Dai rai nna nlung dai hpe “Karum la Nlung” ngu nna shamying wu ai.