TARA JAHPRANG 11:17 - Jinghpaw Common Language Bible 2009

¹⁷ Dai hpe nanhte galaw myit dai rai yang, dai Madu gaw nanhte hpe masin pawt nna nanhte a lamu ga hpe nai mam n tu mat u ga nga, ja ja hkun hkraw mat hkra marang n jahtu ya na rai wu ai. Shi nanhte hpe jaw ai mungdan gaw kaja nga tim pyi kade n na yang nanhte gaw dai mung e si mat na rai myit dai.

TARA JAHPRANG 11:17 ပူးပေါင်းရင်းမြစ်များ

1 HKAWHKAM 17:1

Gilead mung Tishbi mare kaw na Elia mying ai myihtoi langai mi gaw Hkawhkam Ahab hpe, “Dai Madu a mying ningsang hta mung, ngai daw jau nga ai dai ahkrung nga ai Israela a Karai Kasang hta mung ngai bai tsun ai aten du hkra, ndai lahkawng masum ning laman numri mung n hkrat, marang mung n htu na ra ai gaw ngai nang hpe tsun nga nngai,” ngu nna tsun wu ai.

1 HKAWHKAM 8:35

“Na a amyu masha ni nang hpe shut kau ai mara a majaw marang n htu mat jang, shanhte myit malai wa nna ndai Nawku Htingnu de myi man yawng let nang kaw shagrit shanem ai hte hpyi nem mu yang,

2 HKAWHKAM LABAU 6:26

“Na a amyu masha ni nang hpe shut kau ai mara a majaw marang n htu mat jang, shanhte myit malai wa nna ndai Nawku Htingnu de myi man yawng let nang kaw shagrit shanem ai hte hpyi nem wa mu yang,

2 HKAWHKAM LABAU 7:13

Marang n htu shangun ai mung, nsi naisi ni hpe sha shaza kau na matu dinggam-yaw ni hpe shangun dat ai hte nye a amyu masha ni a ntsa e ana zinli shangun dat ai aten shagu hta,

YOBA 12:15

Karai Kasang gaw marang n jahtu ya ai shaloi, hkun hkraw mat nga ai; hka bai hpaw dat ai shaloi, hka mawru du nga ai.

JAW JAU 26:19

Ngai gaw nanhte a gumrawng kawng shadaw kau ya na made ai; lamu marang htu na ra ai n rai; nanhte a lamu ga gaw hkun hkraw mat nna ahpri zawn ja mat na ra ai.

JAW JAU 26:20

Nanhte galaw shaja ai bungli yawng gaw kaman lila rai na ra ai, hpa majaw nga yang nanhte a lamu ga gaw nsi naisi n shakat ya ai hte hpun ni hta asi si jaw na ra ai n rai.

AMO LAIKA (AMOS) 4:7

Ngai gaw nanhte a hkai nmai ni marang grai ra ai shaloi, marang n htu shangun nngai. Ngai gaw mare langai a ntsa e marang jahtu ya ti mung kaga mare hta n jahtu ya nngai. Hkauna pa langai a ntsa e marang htu ti mung, kaga langai mi hta hkun hkraw nga ai.

TARA JAHPRANG 31:20

Ngai gaw shanhte a kaji kawa ni hpe ga sadi jaw da sai hte maren, dai ngamu ngamai ai sut hte hpring nna ningru ningja ai mungdan de shanhte hpe woi wa ai shaloi, dai mung e shanhte sha mayu, lu mayu ai lusha hkum dingnum sha lu nna, ngwi pyaw sim sa ai hte nga lu na mara ai. Rai ti mung, shanhte mahtang lam dam mat nhtawm hpara shaje ni hpe nawku daw jau mat na mara ai; ngai hpe ningdang kau ma ai majaw nye a ga shaka hpe jahten kau na mara ai;

TARA JAHPRANG 4:26

Ngai gaw sumsing lamu hte ginding aga a mying gang let, nanhte hpe sakse hkam da made ga, nye a ga hpe nanhte n madat n hkan sa ai rai yang, kade n na yang, dai mungdan hta htum mat na rai myit dai. Yawdan hka rap nna nanhte shang madu la hkyen ai mungdan hta grai na hkra hkrung nga lu na myit dai n rai. Nanhte gaw tsep kawp shamyit kau ai hkrum na rai myit dai.

TARA JAHPRANG 6:15

Kaga karai shaje ni hpe nanhte nawku myit dai rai yang, nanhte hte rau anga nga ai dai Madu nanhte a Karai Kasang gaw shingjawng kashun ai hpe n hkam sharang lu ai majaw dai Madu a masin kahtet ai gaw wan zawn chyi nna, nanhte hpe atsai awai shamyit kau na rai wu ai.

TARA JAHPRANG 9:19

Dai Madu gaw nanhte hpe shamyit kau lu na daram masin kahtet nga wu ai majaw shi ja ja pawt sindawng ai hpe ngai hkrit nga nngai; rai ti mung dai Madu gaw ndai lang hta mung nye a ga madat ya ni ai.