TARA AGYI 2:17 - Jinghpaw Common Language Bible 2009

¹⁷ Rai ti mung Israela masha ni gaw shanhte a ningbaw ni a ga hpe n madat hkraw nga ma ai. Israela gaw dai Madu hta sadi sahka myit n rawng nga manu ai majaw kaga hpara ni hpe nawku ma ai. Dai Madu a hkang da ai ga ni hpe shanhte a kawa ni madat mara hkan sa nga ma ti mung, ndai ban prat nnan amyu masha ni mahtang n hkan n sa mat ma ai.

Jinghpaw Hanson Version Bible

¹⁷ Rai timung, dai tara agyi ni a ga shanhte n madat hkraw ma ai: Hpara shaje ni kaw shanhte sa nna shut hpyit lam hkan let nawku dagup ma ai: kaji kawa ni hkan sa ai Yehowa a matsun maroi lam hta na, shanhte alawan yit mat wa nna, kaji kawa ni sa ai hku n hkan ma ai.

TARA AGYI 2:17 ပူးပေါင်းရင်းမြစ်များ

SHAKAWN KUNGDAWN 106:39

Shanhte galaw ai amu ni hte shanhte hkum hpe awu asin di kau nna; Karai Kasang hta sadi sahka myit n dung mat nga masai.

SHAKAWN KUNGDAWN 106:43

Madu gaw law law lang, shi a amyu masha ni hpe mawai la nga ai; shanhte shi hpe gumlau na lam, lata la nga ma ai majaw, yubak nawng de grau nna lup shang mat wa masai.

SHAKAWN KUNGDAWN 73:27

Nang hpe kau da ai ni gaw teng teng htum mat na mara ai; nang hta sadi n dung ai ni hpe Nang shamyit kau na rin dai.

PRU MAT 32:8

Shanhte hkan sa na matu ngai hkang da ai lam hta na dam mat wa nhtawm ja shabyawng la let dumsu usu kasha langai galaw la nna dai hpe nawku ai hte shagu hkungga nawng jau ya nga masai. Shanhte gaw dai gaw Egutu mung kaw na shanhte hpe woi shapraw wa ai shanhte a hpara rai nga ai ngu tsun nga masai.

YEREMIA 3:6

Yoshia hkawhkam tai nga yang, dai Madu gaw ngai hpe, “Israela ngu ai sadi n dung ai numsha gaw kaning re ai amu galaw nu ai hpe nang mu nit ni? Shi gaw ngai kaw na kayin mat wa nhtawm kawng shagu a ntsa hte tsit lali ai hpun npu shagu hta shawa num zawn amu galaw nu ai.

YEREMIA 6:16

Dai Madu gaw shi a amyu masha ni hpe, “Lam numshe hkan e tsap nga nna yu yu mu. Lam dingsa ni hte kaja htum ai lam hpe san mu; shing rai dai lam hta hkawm sa mu, shaloi nang gaw myit masin sim sa ai hte nga lu na rai ndai,” ngu nna tsun ni ai. Rai ti mung, shanhte gaw, “N rai law, anhte n hkan na ga ai!,” ngu nna tsun ma ai.

HOSEA 2:2

Nye a ma ni e, nanhte a kanu hpe hpyi nem mu; shi gaw nye a madu jan n rai sanu ai, ngai mung shi a madu wa n rai sangai. Shi a la shaw ai amu hte shawa num galaw ai amu hpe jahkring kau na lam hpyi nem mu.

JAW JAU 17:7

Israela amyu masha ni gaw prang yang hkan e shanhte a yam nga ni sat let bainam nat matse ni hpe nawng jau ai hku dai Madu hta sadi sahka loi mi pyi n nga lu na myit dai n rai. Israela amyu masha ni gaw ndai hkang da ai matsun maroi ga hpe prat mi hte prat mi madat mara shadik shatup lu na rai ma ai.

AMO LAIKA (AMOS) 2:4

Dai Madu gaw, “Yuda amyu masha ni gaw lang hte lang yubak galaw shut kau manu ai, dai lam a majaw, ngai shanhte hpe teng teng ari jaw na nngai. Shanhte gaw nye a sharin shaga ai ga matsun ni hpe n kaw n law di ma ai, nye a hkang da ai ga ni hta n hkan sa ma ai. Shanhte gaw shanhte a kaji kawa ni hkan nang yu sai akyu n rawng ai hpara sumla ni hta nan lam yit nga masai.

GALATI 1:6

Hkristu a chyeju hta nanhte hpe shaga la ai wa kaw na nde wa lawan ai hku hka wa nna, Kabu Gara Shiga kaga amyu ni hkap la nga myit dai majaw nanhte hpe mau nga nngai.

TARA JAHPRANG 31:16

Dai Madu gaw Mawshe hpe, “Nang gaw kade n na yang si wa na sha rai nit dai. Nang si mat ai hpang amyu masha ni nye a ntsa e sadi sahka myit n rawng mat nna shanhte hte tawn da ai nye a ga shaka hpe jahten kau na mara ai. Shaloi shanhte ngai hpe kau da nhtawm shanhte shang sha na mungdan hta nawku ai maigan hpara ni hpe nawku wa na mara ai.

TARA JAHPRANG 31:18

Shanhte gaw n hkru n shawp ai amu galaw nna hpara shaje ni hpe nawku ma ai majaw shanhte hpe karum la na matu ningdang kau na we ai.

TARA JAHPRANG 9:12

“Dai hpang dai Madu gaw ngai hpe, ‘Egutu mung kaw na nang woi wa ai na a amyu masha ni gaw hten za ai hte n hkru ai amu ni galaw shapraw manu ai; dai sha n-ga, shanhte hkan sa galaw na matu ngai hkang da ai kaw na mung shanhte kayin mat wa manu ai hte shanhte a matu hpara sumla hpe mung galaw shachyaw manu ai majaw bum kaw na alawan yu wa su,’ ngu nna tsun wu ai.

TARA JAHPRANG 9:16

Nanhte gaw dai Madu nanhte a Karai Kasang nanhte hpe jaw ya manit dai shi a hkang da ai ga hpe n madat ai sha, nanhte nan dumsu kasha hkrang hpe nhprang arai hte jaw nna hpara sumla galaw nhtawm shi hpe shut kau nga manit dai gaw ngai mu ni ai.

YAWSHU 24:24

Amyu masha ni gaw Yawshu hpe, “Dai Madu anhte a Karai Kasang hpe anhte nawku daw jau na ga ai. Shi a hkang da ai ga hpe anhte madat mara hkan sa na ga ai,” ngu nna tsun ma ai.

YAWSHU 24:31

Yawshu ahkrung nga dingsa Israela amyu masha ni mung dai Madu hpe nawku daw jau ma ai; shi n nga mat wa ai hpang e mung, dai Madu gaw Israela a matu galaw dan nu ai lam magup hpe ningbaw ni ahkrung nga dingsa shanhte hkum nan matut galaw nga ma ai.

TARA AGYI 2:7

Israela amyu masha ni gaw dai Madu hpe Yawshu a prat tup hta nawku daw jau ma ai; shi n nga mat wa ai hpang e mung Israela a matu dai Madu galaw dan nu ai galu kaba ai amu ni yawng hpe mu dep dat ai ningbaw ni a prat hta mung dai Madu hpe matut nna nawku daw jau ma ai.

TARA AGYI 8:33

Gidon si mat ai hpang Israela amyu masha ni gaw Karai Kasang hpe bai n kam n sham ai hte Bala hpara ni hpe nawku mat ma ai. Shanhte mahtang Bala ga shaka hpe shanhte a hpara zawn shatai da mu ai rai nna,

1 SAMUELA 12:12

Rai ti mung nanhte hpe htim gasat hkyen nga ai Amon Hkawhkam Nahasha hpe nanhte mu myit dai shaloi, nanhte a hkawhkam rai nga ai dai Madu hpe ningdang kau nhtawm ngai hpe mahtang, ‘Anhte hpe up hkang na hkawhkam langai ra ga ai,’ nga nna tsun myit dai.

1 SAMUELA 12:17

Ndai aten gaw hkun hkraw ai aten rai nga ai, n rai ni? Rai ti mung dai Madu gaw mu shangoi dat nna marang jahtu dat u ga, ngu nna ngai hpyi dat na nngai. Dai lam byin wa ai shaloi, nanhte shi kaw hkawhkam hpyi ai shaloi, dai Madu hpe nanhte yubak kaba galaw shut kau sai lam rai nga sai hpe nanhte dum chye wa na myit dai.”

1 SAMUELA 12:19

shanhte gaw Samuela hpe, “Madu e, chyeju hte anhte n si mat u ga, dai Madu na a Karai Kasang kaw anhte a matu hpyi nem ya mi. Kaga anhte a yubak yawng hta kaga, hkawhkam hpyi nna shut kau ai anhte a yubak mara ni yawng hpe mung ya anhte dum chye saga ai,” ngu nna tsun ma ai.