TARA AGYI 16:18 - Jinghpaw Common Language Bible 2009

¹⁸ Delila gaw dai teng man ai lam tsun dan nu ai hpe chye jang Hpilisti hkawhkam ni hpang de shiga shana dat nhtawm, “Ya kalang mi naw nhtang sa marit; shi gaw ngai hpe teng man ai lam tsun dan nu ai,” ngu nna tsun wu ai. Shaloi shanhte mung gumhpraw gun let sa wa ma ai.

Jinghpaw Hanson Version Bible

¹⁸ Shing nga shi a myit hta rawng marawng tsun dan ai Delila chye jang, Hpilisti du ni hpe, “Ya kalang mi naw sa marit; shi a myit hta rawng marawng ngai e tsun dan ni ai,” ngu nna bai shaga dat wu ai. Dai rai nna Hpilisti du ni mung gumhpraw gun let shi hpang de du ma ai.

TARA AGYI 16:18 ပူးပေါင်းရင်းမြစ်များ

1 HKAWHKAM 21:20

Ahab gaw Elia hpe mu jang shi hpe, “Nye a gumlau hpyen wa e, nang ngai hpe hkan dep nang nga n ni?,” ngu nna tsun wu ai. Elia gaw, “Rai sa, ngai dep nang nga nngai; nang gaw dai Madu a man e n kaja ai amu hpe nang hkum nan myit jung ai hte htum hkra galaw kau nit dai.

SHAKAWN KUNGDAWN 62:9

Shinggyim masha yawng hte gaw nsa sa lai nbung kasha zawn sha rai nga ma ai; galu kaba ai wa hte kaji kadun ai wa mung, maren sha manu n dan nga ai. Shanhte hpe joi hta shen yu ai shaloi, shanhte a namnak hpa mung n rawng nga ma ai; shanhte gaw nsa sa lai nbung hta pyi grau nna tsang nga ai.

GA SHAGAWP 18:8

Kadum kahte tsun ai lam gaw grai mu sau nga ai; dai hpe anhte gade sha mayu bang kau dat mayu nga a hka!

BU HKAWM 22:7

Moba hte Midian ningbaw ni gaw shanhte hte rau matsa ya na jahpu gun let Balam hpang de sa nhtawm Balak hkang dat ai ga shi hpe tsun dan ma ai.

MAHTE 26:15

“Ngai nanhte a lata hta Yesu hpe ap ya jang, ngai hpe gade jaw na myit ta?,” ngu nna san mu ai. Dai rai nna shanhte gaw gumhpraw lap sumshi hti ya mu ai.

EHPESU 5:5

Hpye ai wa, kaya n chye sari n rawng ai wa, nammak lawhpa ai wa, kadai rai ti mung, Hkristu hte Karai Kasang yan a mungdan hta sali kamhtaw galoi mung hkam la lu na n re ai hpe nanhte hkrak chye nga myit dai. (Hpa majaw nga yang nammak lawhpa ai lam gaw, sumla nawku ai lam amyu mi rai nga ai)

1 TIMOHTI 6:10

Hpa majaw nga yang, gumhpraw marin ai myit chyawm gaw n hkru n kaja ai lam amyu myu a ru npawt rai nga ai. Masha nkau mi gaw gumhpraw hpe lu la na matu grai myit katu ra sharawng nga ma ai majaw makam masham kaw na lam yit mat wa ma ai hte yawn hkyen ai lam amyu myu hte shanhte a myit kraw lawang ni hpe daw hten mat shangun ma ai.

TARA AGYI 16:17

shi gaw hpang jahtum e, teng man ai lam tsun dan kau wu ai. Shi gaw, “Ngai gaw shangai wa ai aten kaw nna Nazari langai zawn Karai Kasang hta ap nawng da hkrum ai wa rai nga nngai majaw nye a kara hpe galoi mung n rep kau we ai. Nye a kara hpe rep kau jang masha gale zawn nye a n-gun daw mat nna kya mat na rai li ai,” ngu nna tsun wu ai.

TARA AGYI 16:19

Delila gaw Samson hpe shi a lahpyen e shayup da nhtawm masha langai mi hpe shaga la let shi a kara majaw sanit gadoi kau ya wu ai. Shi a n-gun daw mat salu ai majaw Delila shi hpe adip arip di zingri hpang wa nu ai.

TARA AGYI 16:5

Hpilisti hkawhkam manga hte gaw dai num kaw sa nhtawm, “Hpa rai shi n-gun kaba rawng ai mung, anhte shi hpe kaning rai padang dip lu na mung, shi hpe gyit nna shi hpe hpa n di shangun lu hkra re ai lam nang hpe tsun dan lu hkra Samson hpe hpaji daw yu u. Anhte langai hte langai mung nang hpe gumhpraw hkying mi latsa tsa jaw na ga ai,” ngu nna tsun ma ai.