SHINGRAN 2:13 - Jinghpaw Common Language Bible 2009

¹³ Nang gara shara e nga nga ndai hpe ngai chye nga nngai. Satan a tingnyang dung nga ai shara e nang nga nga ndai. Ngai hta sadi dung ai hte sakse hkam ai Antipa gaw Satan de nga ai shara ngu ai nanhte a ka-ang e Sat kau hkrum ai aten hta pyi, nang gaw ngai hta sadi dung nga nna, ngai hpe kam sham ai na a makam masham hpe n nyet kau ndai.

Jinghpaw Hanson Version Bible

¹³ Nang de nga ai shara ngai chye nga nngai; Satan a tingnyang dung nga ai shara e nang de nga ndai. Nye a mying nsang hpe nang manoi nga ndai rai nna, Satan de nga ai shara e ngu ai, nanhte a ka-ang e, nye a kangka re ai sakse wa Antipa sat kau hkrum ai nhtoi hte hta pyi, nye a makam masham lam hpe nang n nyet kau ndai.

SHINGRAN 2:13 ပူးပေါင်းရင်းမြစ်များ

MAHTE 10:23

Mare langai mi hta nanhte hpe zingri zingrat myit yang gaw, kaga de hprawng sa mu. Nanhte hpe ngai teng teng tsun made ai gaw, Israela mare nga manga hte hta nanhte galaw ra ai amu n ngut kre shi yang, dai Masha Kasha gaw du na ra ai.

MAHTE 24:9

“Dai hpang masha ni gaw, nanhte hpe rim la nna ari jaw na hte sat kau na matu ahkang aya lu ai ni a lata de ap kau na marin dai. Nye a mying a majaw, masha amyu baw shagu nanhte hpe n dawng n wawm na mara ai.

MAHTE 4:10

Shaloi Yesu gaw, “Satan e pru mat wa u! ‘Dai Madu na a Karai Kasang hpe nang nawku lu na rai nna, shi hpe hkrai daw jau lu na re ai!, nga nna she ka da nga ai,” ngu nna shi hpe htan wu ai.

LUKA 21:17

Nye a majaw nanhte hpe masha ni yawng n ju n dawng na mara ai.

KASA 22:20

Madu a lam sakse hkam ya ai wa Stehpan hpe sat kau ma ai shaloi mung ngai nan makau e tsap nna, shi hpe sat kau ai lam myit hkrum let, shi hpe sat kau ai ni a hpun palawng ni hpe sin ya nngai,’ ngu we ai.

KASA 9:14

Dai hta n-ga, ya mung, nang hpe nawku daw jau ai ni yawng hpe rim la na matu hkinjawng agyi ni kaw na ahkang hte Damasku mare de du sa ra ai,” ngu nna htan wu ai.

1 HTESALONI 5:21

yawng mayawng hpe jep dinglik yu nna mai kaja ai hpe hkap la shagrin da nna,

1 TIMOHTI 5:8

Marai langai ngai gaw, tinang a amyu ru sai, grau nna dinghku masha ni hpe yu lanu lahku ai lam n nga ai wa gaw, dai makam masham hpe ningdang kau ai wa rai nna n kam ai masha langai hta pyi grau nna n hkru n kaja ai wa rai nga ai.

2 TIMOHTI 1:13

Ngai nang hpe sharin ya ai teng man ai mungga hpe nang hkan sa na kasi kamang shatai let ngang ngang jum da nna, anhte Hkristu Yesu hte langai sha tai nhtawm asak hkrung ai hte seng ai makam masham hte tsaw ra myit hta ngang ngang jum manoi nga u.

2 TIMOHTI 2:12

Anhte matut nna hkam sharang nga ga yang gaw, anhte shi hte rau mung up nga lu na raga ai. Anhte shi hpe ningdang kau ga yang gaw, shi mung anhte hpe ningdang kau na ra ai.

HEBRE 10:23

Anhte yin la kam sham ai makam masham a myit mada ai lam hta n shamu n shamawt hkra anhte maju jung nga ga; hpa majaw nga yang, Karai Kasang gaw shi tawn da ai ga sadi hta kangka re ai wa rai nga ai hpe anhte kam hpa lu ga ai.

HEBRE 3:6

Hkristu chyawm gaw Karai Kasang a nta hpe up ai Kasha re ai hku nna kangka rai sadi dung nga ai. Anhte nden marai rawng nna tinang ni a kabu gara myit mada ai lam hpe jahtum du hkra myit mu myit hkut ai hte ngang ngang kang kang manoi nga ga yang gaw, Karai Kasang a nta masha ni rai nga ga ai.

YAKU 2:7

Shanhte gaw nanhte hpe jaw da sai mying kaja hpe jahpoi jahpyak ya ai ni rai ma ai.

SHINGRAN 1:5

Kangka re ai sakse wa, si mat ai ni hta na shawng numshawn hkrung rawt wa ai wa, dinghta ga na hkawhkam ni hpe up ai Madu Yesu Hkristu kaw nna mung, chyeju hte ngwi pyaw ai gaw nanhte hta anga nga malit ga law. Anhte hpe tsaw ra nna, shi hkum nan hpe hkungga nawng si hkam ai hte anhte a yubak kaw na raw dat mi ai hte,

SHINGRAN 11:3

Bai, nye a sakse yan lahkawng hpe ngai shangun dat na mawe ai rai nna, shan gaw lachyit nba bu hpun let nhtoi 1,260 ya tup Karai Kasang a mungga hpe myihtoi ga hku hkaw tsun na mara ai.

SHINGRAN 12:11

Anhte a hpu nau ni gaw, Sagu Kasha a asai majaw mung, shanhte sakse hkam nga ai teng man ai mungga a majaw mung, Satan hpe awng dang kau lu mu ai rai nna, shanhte gaw si ai du hkra tinang a asak hpe n lahpawt ma ai.

SHINGRAN 13:2

Dai ngai mu ai matse labye gaw rawnggawk hte bung nna, shi a lagaw ni gaw tsap lagaw zawn, shi a n-gup hkanghkyi n-gup zawn rai nga ai. Baren numraw gaw shi a hpung dagu hte mung shi a tingnyang hpe mung, shi a kaba la ai ahkang aya hpe mung, dai matse labye a lata de ap ya wu ai.

SHINGRAN 14:12

Karai Kasang a hkang da ai ga ni hpe hkan shatup nna, Hkristu hta kangka sadi dung ai ni ngu ai Karai Kasang a masha ni gaw, ndai lam hta hkam sharang ai lam nga ra nga ai.

SHINGRAN 17:14

Shanhte gaw Sagu Kasha hpe hpyen gasat na mara ai; rai ti mung dai Sagu Kasha gaw, shi shaga la nna lata la hkrum ai, kangka re ai shi a hpang hkan nang ai ni hte rau awng padang lu na ra ai. Hpa majaw nga yang, shi gaw Madu ni a Madu, Hkawhkam ni a Hkawhkam rai nga ai,” nga nna ngai hpe tsun ai.

SHINGRAN 17:6

Bai, dai numsha gaw Karai Kasang a masha ni a asai hpe mung, Madu Yesu hta sadi dung ai majaw sat kau hkrum ai ni a asai hpe mung, lu nna nang bam taw nga ai hpe, ngai mu nngai. Shi hpe mu yang, kaja wa dik hkra mau mahka mat nngai.

SHINGRAN 2:2

Nang galaw sai amu hpe ngai chye nga nngai. Nang gade yak la ai hte galaw sai lam, nang gade hkam sharang sai lam ngai chye nga nngai. Nang gaw n hkru n hkra re ai masha ni hpe ra mi n rai nga shangun lu ndai mung, Kasa n re ai ni kasa rai ga ai nga nna tsun ai kasa hpyi hpun ai ni hpe nang san dinglik yu nna, shanhte masu ai ni re ai lam shadan kau ya lu ndai mung, ngai chye nga nngai.

SHINGRAN 3:11

Ngai alawan du na ring ngai; na a janmau hpe kadai mung n kashun la kau ya u ga, nang lu ai made hpe asin nga u.

SHINGRAN 3:3

Dai re ai majaw, nang hpa baw sharin hkam la lu sai hte, na la lu ai lam hpe bai dum u; dai hpe madat mara nna, na a yubak mara ni kaw na myit malai kayin wa u. Nang n maja nga taw gaw, lagu lagut zawn ngai nang kaw du na ring ngai; gara aten e ngai nang kaw du sa na ra ai hpe pyi nang n chye na ndai.