SHINGRAN 19:3 - Jinghpaw Common Language Bible 2009

³ Bai lang mi shanhte gaw, “Karai Kasang hpe shakawn kungdawn mu! Dai mare kaba hpe hkru kau ai wan shinglet ni hta na wan hkut gaw, htani htana prat dingsa amawng lung nga ai,” nga nna jahtau tsun ma ai.

Jinghpaw Hanson Version Bible

³ Bai lang mi shanhte gaw, “Haleluya: dai mare a wan hkut gaw, htani htana prat dingsa amawng lung nga ai,” nga ma ai.

SHINGRAN 19:3 ပူးပေါင်းရင်းမြစ်များ

NINGPAWT NINGHPANG 19:28

Sodom hte Gomora mare ni hte kadit ting hpe shi mada yu wu yang, wan htung kaba kaw na pru ai wan hkut zawn ga kaw nna mawng lung nga ai hpe mu lu wu ai.

SHAKAWN KUNGDAWN 104:35

Yubak kap ai ni dinghta ga kaw nna shamyit kau ai hkrum nga mu ga; tara n lang ai ni hkoi mat mu ga. Nye a wenyi e, dai Madu hpe shakawn u! Dai Madu hpe shakawn nga u law!

ESAIA 34:10

Dai mungdan gaw shani shana hkru nga na ra ai, wan hkut mung dai mungdan kaw na htani htana rawt mawng taw nga na ra ai. Dai mung gaw prat mi hte prat mi katsi katsang shara tai mat nna kadai mung dai mung hku bai ga lai hkawm sana ma ai n rai.

YUDA 1:7

Sodom hte Gomora mare yan hpe mung dai mare yan a grup yin na mare ni hpe mung myit dum nga mu. Dai mare ni kaw na mare masha ni gaw dai lamu kasa ni zawn, num la n se n sa lam hta pyaw daw kadaw nna shing ra maka hte nhtan shai ai hku nga sha ma ai majaw yawng a matu asan sha dan dan leng leng sadi jaw ai hku nna htani htana wan hta ari hkrum sha ma ai.

SHINGRAN 14:11

Shanhte hpe nni nkri di zingri ai hta na wan hkut gaw, htani htana prat dingsa amawng lung nga ai. Dai matse labye hte shi a hkrang sumla hpe nawku ai ni hte, shi a mying a masat dingsat shakap hkam la ai ni yawng gaw, shani shana htingtsi hkyamsa ai lam lu la na ma ai n rai,” nga nna nsen kaba hte jahtau tsun ai.

SHINGRAN 18:18

dai mare hpe hkru kau ai wan shinglet kaw na wan hkut hpe mu yang, shanhte gaw, “Galoi mung ndai mare daram galu kaba hkik hkam ai mare kaga mi n nga yu sai!,” nga nna jahtau ma ai.

SHINGRAN 18:9

Shi hte hpye ai amu galaw nna sawse lawklek ngang kayut ai ga ntsa na hkawhkam ni gaw, dai mare hkru ai wan kaw na pru ai wan hkut hpe mu ma ai shaloi, hkrap ngu hkrap ngoi sharung shayawt na mara ai.

SHINGRAN 19:1

Dai hte a hpang e, sumsing lamu kata e masha wunawng wuwa kaba langai mi a wu ngoi ai nsen hte bung ai nsen hpe ngai na nngai. Shanhte gaw, “Karai Kasang hpe shakawn kungdawn mu! Hkye hkrang la ai lam, hpung shingkang hte hpung dagu gaw, anhte a Karai Kasang hte seng nga ai!

SHINGRAN 19:4

Shaloi, dai salang hkun mali hte asak hkrung ai dusat mali hte gaw, dingnyawm dagup nna, tingnyang hta dung nga ai Karai Kasang hpe nawku let, “Amen! Karai Kasang hpe shakawn kungdawn mu!,” nga ma ai.