SHINGRAN 19:2 - Jinghpaw Common Language Bible 2009

² Shi a tara daw dan ai lam ni teng man ai hte ding hpring nga lu ai! Tinang a hpye ai amu hte ga ntsa ting hpe shut hpyit shangun ai shawa num hpe shi daw dan nu ai. Madu a shangun ma ni hpe sat kau ya ai majaw, Karai Kasang gaw shi hpe ari jaw nu ai!,” nga nna tsun ai ngai na nngai.

Jinghpaw Hanson Version Bible

² shi a tara dara ai lam ni tengman ai hte dinghpring nga lu ai; hpye ai amu hte ga ntsa ting hpe shut hpyit shangun ai shawa num kaba hpe shi dawdan nna, shi a shangun ma ni a asai matai, dai num a ntsa e bai htang ya nu ai law,” nga nna tsun ai, ngai na nngai.

SHINGRAN 19:2 ပူးပေါင်းရင်းမြစ်များ

2 HKAWHKAM 9:7

Ahab a kasha rai nga ai na a madu hkawhkam wa hpe nang sat kau na rai ndai; shing rai ngai gaw nye a myihtoi ni hte kaga shangun ma ni hpe sat sharu kau ya ai Yezebela hpe ari jaw na we ai.

SHAKAWN KUNGDAWN 19:9

Madu hpe hkrit hkungga ai lam mai kaja nga ai rai nna, dai gaw htani htana agrin nga na ra ai. Madu a tara dara ai lam teng man nga ai rai nna, dai gaw tut nawng e tara rap ra nga ai.

ESAIA 25:1

Madu e, nang gaw nye a Karai Kasang rai nga ndai; Ngai nang hpe shagrau na nngai, na a mying nsang hpe kungdawn na nngai. Nang gaw mauhpa amu ni hpe galaw nit dai; moi kaw nna nang galaw ai yaw shada lam ni hpe nang kangka ai hte galaw da nit dai.

Daniela 7:26

Dai hpang sumsing lamu hte seng ai tara rung gaw tara jeyang ai amu hta dung nna shi a daru magam n-gun hpe yeng seng kau nhtawm, shi hpe tsep kawp shamyit kau na mara ai.

TARA JAHPRANG 32:35

Dai Madu gaw shanhte hpe matai htang nna, ari jaw na rai wu ai; shanhte hkrat sum ai aten du wa nna, kyindut hkrum na nhtoi ni wa nga sai.

TARA JAHPRANG 32:4

“Dai Madu gaw chyalai n-gun hte hpring ai nanhte a dahpran shara rai nga ai; shi a lam yawng mayawng hkum tsup nna ding hpring nga ai. Nanhte a Karai Kasang gaw sadi sahka hte teng man nga ai rai nna shi galaw ai amu teng man ai hte rap ra nga ai.

TARA JAHPRANG 32:43

“Masha amyu baw ni e, nanhte gaw dai Madu a amyu masha ni hpe shakawn lu na rai myit dai; shanhte hpe sat ai ni yawng ari jaw ai hkrum na rai ma ai. Gumlau hpyen ni hpe shi matai htang nna, shi a amyu masha ni galaw shut ai yubak mara hpe raw dat ya na rai wu ai.

SHINGRAN 15:3

Shanhte gaw, Karai Kasang a shangun ma Mawshe a mahkawn ga hte, Sagu Kasha a mahkawn ga hpe mahkawn mangoi nga let, “Chyahtum chyalai n-gun atsam rawng ai Karai Kasang e, na a magam bungli ni gaw gade wa kaba nga ai hte gade wa mauhpa rai nga a hka! Ju majat prat janat na hkawhkam wa e, na a lam ni gaw gade wa ding hpring ai hte gade wa teng man nga a hka!

SHINGRAN 18:20

Sumsing na ni e, dai mare hten mat ai majaw kabu mu! Karai Kasang a masha ni e, kasa ni hte myihtoi ni e, kabu gara nga mu! Hpa majaw nga yang, nang hpe di ai lam yawng a matu Karai Kasang gaw dai mare hpe tara daw dan nu ai! nga nna tsun ai ngai na nngai.

SHINGRAN 18:3

Hpa majaw nga yang, masha amyu baw shagu gaw, dai mare a hpye ai amu hta myit kayut baw bang ai ngu ai sabyi ntsin hpe lu masai. Ga ntsa na hkawhkam ni mung, shi hte rau hpye ai amu galaw ma ai, ga ntsa na hpaga la ni mung dai mare a ladu lai ai myit kayut sawse lawklek ai a majaw sut su wa masai,” nga nna ja ai nsen hte jahtau wu ai.

SHINGRAN 6:10

Dai Wenyi ni gaw, “Chyahtum chyalai n-gun atsam rawng nna chyoi pra ai hte teng man ai Madu e! Anhte hpe sat kau ai mara a matu ga ntsa na masha ni hpe gaten du hkra nang n jeyang ai, ari n jaw ai nga na n ta?,” nga nna nsen kaba hte jahtau nga ma ai.