SHINGRAN 18:3 - Jinghpaw Common Language Bible 2009

³ Hpa majaw nga yang, masha amyu baw shagu gaw, dai mare a hpye ai amu hta myit kayut baw bang ai ngu ai sabyi ntsin hpe lu masai. Ga ntsa na hkawhkam ni mung, shi hte rau hpye ai amu galaw ma ai, ga ntsa na hpaga la ni mung dai mare a ladu lai ai myit kayut sawse lawklek ai a majaw sut su wa masai,” nga nna ja ai nsen hte jahtau wu ai.

Jinghpaw Hanson Version Bible

³ Kaning rai nme law, shi a hpye ai amu ngu ai tsabyi jahku hte masha amyu baw shagu kadawng daw mat masai; ga ntsa hkawhkam ni mung shi hte rau hpye ai amu galaw nna, shi a hpung shingkang hte sawse lawklek ai lam a majaw, mungkan ga na hpaga ni sut su wa masai,” nga nna ja ai nsen hte jahtau wu ai.

SHINGRAN 18:3 ပူးပေါင်းရင်းမြစ်များ

ESAIA 47:15

Na a prat tup hta nang bawng jahkrup ai gumhpan hpan ai sara ni gaw na a matu mai kaja ai lam yawng mayawng galaw ya na mara ai. Shanhte yawng gaw nang hpe kau da nna shanhte a lam de sa mat wa na mara ai, nang hpe hkye la na matu kadai mung nga na n rai,” nga nna tsun ai.

YEREMIA 51:34

Babelon hkawhkam gaw Yerusalem hpe azat mani nna sha kau nu ai. Shi gaw namtau zawn; baren numraw gaw dai hpe mayu kau ai zawn mare hpe kaman di kau wu ai. Shi gaw shi ra sharawng ai hpe la nna ngam ai hpe kabai kau nu ai.

YEREMIA 51:7

Babelon gaw nye a lata hte lang nna mungkan ting hpe shanang kau ai ja gawm zawn rai nga ai. Masha amyu baw ni gaw dai hta rawng ai sabyi ntsin hpe lu nang nna, shanhte chye ai hku hkawm nga ma ai.

SHARUNG SHAYAWT 4:5

Lang mi mu mai htum ai lusha ni sha yu sai masha ni gaw lusha kyet ai majaw nmaw lam hkan e si taw nga ma ai; pyaw hpa lam hta len yu sai ni gaw lusha a matu shanut shanaw hkan tam mahkai hta nga ma ai.

NAHUM 3:4

Ninewe shawa num gaw ari jaw hkrum nga sai. Shi gaw ahpraw tsawm htap ai hte si na daram gunglau shalen lu ai atsam hte hpring nga ai, shi gaw masha amyu baw ni hpe chye alau la nna shanhte hpe mayam shatai nga ai.

LUKA 7:25

Shing n rai, hpa hpe yu na sa myit ta? Mani tsawm ai bu hpun palawng bu hpun tawn ai wa hpe rai ni? Dai zawn tsawm htap ai bu hpun palawng bu hpun nna nhpaw n-ya ningngai nga lu ai gaw, hkawhkam htingnu ni hta mu lu nga ai.

1 TIMOHTI 5:11

Rai ti mung asak naw kaji ai gaida jan ni hpe gaida jan jahpan hta n bang u ga, hpa majaw nga yang, shanhte a myit ra ai lam e shadut ai a jaw e hkungran mayu wa ai shaloi Hkristu kaw na htak mat wa chye ma ai.

SHINGRAN 14:8

Bai, lahkawng ngu na lamu kasa langai mi gaw, shawng na lamu kasa a hpang hprut dan pru nna, “Babelon mare kaba kadawng daw mat sai! Kadawng daw mat sai! Dai mare gaw hpye ai amu hta myit kayut ai ngu ai nsa ja sabyi ntsin masha amyu baw shagu hpe lu shangun nu ai!,” nga nna tsun nga ai.

SHINGRAN 17:2

Ga ntsa na hkawhkam ni gaw shi hte hpye ai amu galaw nna, mungkan ga na masha ni gaw, shi a hpye ai amu ngu ai sabyi ntsin hte nang ma masai,” nga nna ngai hpe tsun ai.

SHINGRAN 18:19

Shanhte gaw tinang a baw ni hta ga nhpu hte bun nna, “Dai galu kaba ai mare gaw, dingnye lu a hka! Dingnye lu a hka! Panglai sanghpaw li madu ni hpe shi a sut gan hte lu su shangun ai mare gaw, hkying hkum mi laman lu malu sum hkrum mat sahka!,” nga nna hkrap ngu hkrap ngoi ai hte sharung shayawt let jahtau ma ai.

SHINGRAN 18:23

Pyengdin a nhtoi mung, nang hta htawm hpang galoi mung na lu na n rai. La nnan ni hte num nnan ni a nsen ni mung, nang hta htawm hpang galoi mung mu lu na n rai. Hpa majaw nga yang, na a hpaga la ni gaw, ga ntsa ting hta daru magam atsam rawng dik ai ni rai wa masai; nang gaw ga ntsa na masha ni yawng hpe na a shut ai mandan lakle hte masu hkalem sha kau nit hka!”

SHINGRAN 18:7

Tinang hkum hpe shagrau shareng nna ningngai lu sai shadawn shadang hte maren, shi hpe dai yawn hkyen ai hte nni nkri lam htang jaw mu. Hpa majaw nga yang, shi gaw, ‘Ngai hkawhkam jan nang e hkaw dung nga nngai! Ngai gaida jan n rai, ngai galoi mung yawn hkyen ai n hkrum na nngai!,’ nga nna tinang dai atsun nga ai.

SHINGRAN 18:9

Shi hte hpye ai amu galaw nna sawse lawklek ngang kayut ai ga ntsa na hkawhkam ni gaw, dai mare hkru ai wan kaw na pru ai wan hkut hpe mu ma ai shaloi, hkrap ngu hkrap ngoi sharung shayawt na mara ai.