SHINGRAN 17:3 - Jinghpaw Common Language Bible 2009

³ Shaloi Wenyi gaw ngai hpe woi nawng mat wa nna, dai lamu kasa gaw, ngai hpe nam mali de woi sa mat wa ai. Dai shara e baw sanit hte nrung shi tu nna Karai Kasang hpe matsa shatan ai mying hkrai pri ka da ai, hkyeng mang ai matse labye a ntsa e dung nga ai numsha langai mi hpe ngai mu nngai.

Jinghpaw Hanson Version Bible

³ Shaloi shi ngai hpe wenyi hte nam mali de woi nawng mat wa ai rai nna, baw sanit hte nrung shi tu nna, matsa shatan ai amying hkrai pri re ai hkyeng kabrim ai matse labye a ntsa e dung nga ai numsha hpe, ngai mu nngai.

SHINGRAN 17:3 ပူးပေါင်းရင်းမြစ်များ

1 HKAWHKAM 18:12

Ngai pru mat wa ai shaloi jang, dai Madu a wenyi gaw n chye ai shara nkau mi de nang hpe woi mat wa na ra ai n rai ni? Dai hpang nang ndai yang e nga nga ai ngu nna Ahab hpe ngai tsun jang, shi nang hpe n mu tam ai shaloi ngai hpe sat kau na ra ai. Ngai chyawm gaw ma aten kaw nna dai Madu hpe kam sham nawku ai wa rai nga nngai hpe dum u law.

2 HKAWHKAM 2:16

“Nang e n-gun ja ai masha yawng anhte hta manga shi rai nga ga ai. Na a madu hpe sa tam saga. Dai Madu a wenyi gaw shi hpe shapoi mat wa nna bum ntsa hkan e mung, kadit shara nkau mi hkan e mung shi hpe tawn kau da mai nga ai,” ngu nna tsun ma ai. Elisha gaw, “N rai law, nanhte sa lu na myit dai n rai,” ngu nna htan wu ai.

Shawlumon A Mahkawn Ga 8:5

Shi tsaw ra ai wa hte lahpum hte lahpum jum let nam mali de na pru wa ai num gaw kadai rai ta? Nang shangai wa ai shara ngu ai ja magaw si hpun nhpang e ngai nang hpe jasu ni ai.

EZEKELA 11:24

Karai Kasang a wenyi gaw shi a shingran hta ngai hpe pawn la nna Babelon mung na bawng dung ai ni hpang de ngai hpe bai woi nhtang wa ni ai. Dai hpang shingran hkoi mat wa nna,

EZEKELA 3:12

Dai hpang, Karai Kasang a wenyi gaw ngai hpe pawn mat wa nna, nye a shingdu e, “Sumsing lamu lahta tang hta dai Madu a hpung shingkang hpe shakawn mu!,” nga nna ja ja wu kade ai hte tsun ai nsen hpe ngai na nngai.

EZEKELA 8:3

Shi gaw lata hkrang zawn re ai hpe ladawn dat ai hte nye a kara hpe magra jum da wu ai. Shaloi ndai shingran hta, Karai Kasang a wenyi gaw ngai hpe ntsa de pawn shalun la nhtawm Yerusalem de woi sa nga ai. Shi gaw ngai hpe Nawku Htingnu a dingdung chyinghka a kata shang wa lam de woi sa nga ai; dai shara gaw Karai Kasang hpe nchyi nmu byin shangun ai nsu nnawn hpara sumla langai mi hpe shadun da ai shara mung rai nga ai.

Daniela 11:36

“Suri hkawhkam gaw shi myit ra ai hte maren galaw na ra ai. Shi gaw kaga karai kadai hta mung grau kaba nga ai: Tsaw Htum ai Karai Kasang hta pyi grau kaba nga ai nga nna shi shakawng dan na ra ai. Karai Kasang shi hpe ari jaw ai aten du hkra, shi gaw ndai amu galaw na ra ai. Karai Kasang gaw shi shatawng shada nu ai hte maren tup hkrak galaw na ra ai.

Daniela 7:20

Ngai gaw de a baw hta tu ai nrung shi a lam mung, hpang e tu lung wa ai nrung hte nrung masum hkrat mat ai lam ni hpe mung chye mayu nngai. Dai ni hta myi ni tu nna, shakawng shakat gumrawng gumtawng ai hte tsun chye ai n-gup langai rawng nga ai. Dai wa mahtang kaga ni hta grau nna hkrit kajawng shangun nga ai.

Daniela 7:25

Shi gaw Tsaw Htum ai Karai Kasang hpe tsun ninghkap nna, Karai Kasang a amyu masha ni hpe dip gamyet kau na ra ai. Shi gaw shanhte a makam masham tara ni hte lusha poi ni hpe galai kau mayu na ra ai. Karai Kasang a amyu masha ni mung shi a daru magam n-gun npu hta masum ning jan taw nga na mara ai.

Daniela 7:8

Ngai gaw dai nrung ni hpe yu mau nga yang, kaga ni a ka-ang hta nrung kaji tu pru wa nga ai hpe ngai mu nngai. Dai gaw dai yang e nga nga sai nrung masum hpe baw kau nga ai. Ndai nrung hta gumrawng gumtawng ai hte shakawng shakat chye ai masha a myi ni hte n-gup langai rawng nga ai.

MAHTE 27:28

Shanhte shi a hpun palawng ni hpe raw kau ya nna hkyeng ai nsam rawng ai nba lawai ya mu ai.

KASA 8:39

Shan hka na lung wa ma yang dai Madu a Wenyi Hpilip hpe woi mat wa wu ai. Du wa mung Hpilip hpe bai n mu nu ai rai tim shi sa wa ai lam de kabu gara let wa mat nu ai.

2 HTESALONI 2:4

Shi gaw masha ni nawku daw jau nga ai karai ngu ai baw nga manga hpe nhtan shai ninghkap nna, shi hkum nan hpe yawng mayawng a ntsa e hpung shingkang grau rawng ai wa re ngu nna shagrau shatsaw na ra ai. Shi gaw Karai Kasang a Nawku Htingnu kata de pyi sa shang dung nga nna shi hkum dai Karai Kasang re ai ngu nna tsun ndau na ra ai.

SHINGRAN 1:10

Dai Madu a nhtoi hta e Wenyi hta ngai nawng mat wa ai rai nna, ngai gaw pahtau nsen hte bung ai nsen kaba langai mi nye a shingdu maga de nna shaga ai hpe na lu nngai.

SHINGRAN 12:14

Dai shaloi numsha gaw, baren numraw a hpyen kaw na lawt lu nna, nam mali na shi a shara de pyen wa lu na matu langda kaba a singkaw lahkawng shi hpe jaw dat wu ai. Shi gaw dai shara e masum ning e shata kru baren numraw a hpyen hpe n hkrit ra ai sha bau lanu lahku ai hkrum na rai nga ai.

SHINGRAN 12:3

Bai kaga mauhpa lamik kumla kaba langai mi lamu kata e dan pru wa ai. Baw sanit tu nna, nrung shi tu ai hkyeng ai baren numraw kaba langai mi gaw, shi a baw ni hta janmau langai hpra gup da nga ai.

SHINGRAN 12:6

Dai numsha gaw, shi a matu Karai Kasang lajang da ya ai nam mali de hprawng mat wa ai. Dai shara hta nhtoi 1,260 ya du hkra shi hpe bau maka na maru ai.

SHINGRAN 17:18

“Nang mu ai numsha gaw, mungkan hkawhkam ni hpe up ai mare kaba rai nga ai,” nga nna ngai hpe tsun ai.

SHINGRAN 17:4

Dai numsha gaw, hkyeng mang ai hte shaba pu nsam rawng ai bu hpun palawng bu hpun nna, hpu ging ai ja, lungseng, pale hte mawn sumli nga ai. Shi gaw shi a hpye ai amu a asi rai nga ai n san n seng matsat shabat lam hte hpring chyat re ai ja gawm, shi a lata hta lang da wu ai.

SHINGRAN 18:12

Shanhte a gun rai ni gaw: ja arai, gumhpraw arai, hpu ging ai lungseng ni, pale, lachyit sumpan, shaba pu nsam rawng ai sumpan, lai hte da ai sumpan, hkyeng kabrim ai sumpan, manam pyaw ai baw hpun amyu myu, magwi kawng hte galaw ai arai amyu myu, manu rawng ai hpun arai, magri mang arai, hpri arai, lunghpraw arai amyu myu,

SHINGRAN 18:16

“Lachyit sumpan, shaba pu nsam rawng ai lai sumpan, hkyeng ai bu hpun palawng bu hpun nna, ja rai, hpu ging ai lungseng hte pale ni hte mawn sumli ai galu kaba ai mare gaw, dingnye lu a hka! Dingnye lu a hka!

SHINGRAN 21:10

Bai, dai Wenyi gaw ngai hpe woi nawng mat wa ai hte, dai lamu kasa gaw, ngai hpe grai tsaw ai bum pungding de woi du nna, Karai Kasang shanu nga ai sumsing lamu de nna yu hkrat wa ai Chyoi Pra ai Yerusalem Mare ngai hpe madun nngai.

SHINGRAN 4:2

Shaloi jang Wenyi hta ngai nawng mat wa nngai. Sumsing lamu hta e tingnyang langai mi nga nga ai rai nna, dai tingnyang hta marai langai mi dung nga ai.