SHINGRAN 16:14 - Jinghpaw Common Language Bible 2009

¹⁴ Shanhte gaw lamik kumla ni hpe madun dan lu ai nat ni a numla ni rai nga ma ai. Dai nat masum gaw, jahtum chyalai n-gun atsam rawng ai Karai Kasang a nhtoi kaba ngu ai tara jeyang ai shani majan gasat na matu, mungkan ting na hkawhkam ni hpe jahpawng la na pru sa wa ma ai.

Jinghpaw Hanson Version Bible

¹⁴ dai ni gaw lamik kumla galaw dan nna, Chyahtum chyalai n-gun rawng ai Karai Kasang a nhtoi kaba shani na majan gasat na matu, mungkan ting na hkawhkam ni hpe jahpawng la na pru sa wa ai nat a wenyi ni rai nga ma ai.

SHINGRAN 16:14 ပူးပေါင်းရင်းမြစ်များ

1 HKAWHKAM 22:6

Dai re ai majaw Ahab mung myihtoi mali tsa daram hpe shaga jahpawng tawn nhtawm shanhte hpe, “Ramot mare hpe ngai sa htim gasat ang na kun?,” ngu nna san yu wu ai. Shanhte mung, “Dai mare hpe htim gasat manu; dai Madu gaw nang hpe awng padang jaw na ra ai,” ngu nna htan mu ai.

EZEKELA 14:9

“Myihtoi wa gaw n teng n man ai mahtai jaw nna htoi shut ai rai yang, dai gaw dai Madu ngai nan shi hpe shut shangun ai rai nga sai. Ngai gaw dai wa hpe Israela amyu masha ni a hpawng kaw nna yeng seng kau na we ai.

MAHTE 24:14

Dai mungdan a Kabu Gara Shiga a lam hpe, masha amyu baw shagu a matu mara sakse tai u ga, mungkan ting hta e hkaw dan lu na rai nga ai; dai hpang e jahtum nhtoi gaw du na ra ai.

MAHTE 24:24

Hpa majaw nga yang, masu ai Meshia hte masu ai myihtoi ni paw pru na mara ai; shanhte gaw byin mai ai rai yang, Karai Kasang e lata la tawn sai masha ni hpe pyi lam shadam kau lu hkra lamik kumla kaba hte mauhpa amu ni galaw dan na mara ai.

MARKU 13:22

Hpa majaw nga yang, masu ai Meshia hte masu ai myihtoi ni paw pru na ra ai. Shanhte gaw Karai Kasang a lata la ai masha ni hpe pyi lam shadam lu yang shadam lu hkra lamik kumla ni hte mauhpa amu ni galaw dan na mara ai.

LUKA 2:1

Dai ten e, Roma mungdan ting hta nga ai masha jahpan hta la na matu, Roma hkawseng Augustu kaw nna mungga shapraw dat wu ai.

YAWHAN 8:44

Nanhte gaw, nanhte a kawa ngu ai gumlau nat a kashu kasha ni rai nga myit dai rai nna, nanhte a kawa a kayut ai hku hkan mayu myit dai. Shi gaw shawng npawt kaw nna, masha sat ai wa rai nga ai rai nna, tengman ai maga de galoi mung n nga ai, hpa majaw nga yang shi hta teng man ai lam n rawng nga ai. Shi gaw masu magaw ai wa langai mi rai nna masu magaw lam yawng a kawa mung rai nga ai majaw, shi a masu ai ga tsun yang, dai gaw shi a shingra myit hte maren tsun ai lam rai nga lu ai.

ROMA 1:8

Nanhte a kam sham ai gaw mungkan ting chyam hkra kajai gumhkawng wa sai majaw Yesu Hkristu a jaw e nanhte mahkra a matu mara, nye a Karai Kasang hpe ngai shawng chyeju dum shakawn kungdawn nngai.

2 HTESALONI 2:9

Dai N hkru Ai Wa gaw Satan a n-gun atsam hte du sa na ra ai rai nna masu ai lamik kumla amyu myu hte mauhpa amu ni hpe galaw dan na ra ai.

1 TIMOHTI 4:1

Htawm hpang de masha nkau mi gaw makam masham hpe kabai kau na mara ai; shanhte gaw masu hkalem ai wenyi ni a ga madat nna nat ni a sharin shaga ai lam ni hta hkan sa na mara ai lam dai, Wenyi gaw asan sha tsun nga ai.

YAKU 3:15

Shing re ai hpaji byeng-ya chyawm gaw sumsing lamu de nna yu wa ai hpaji byeng-ya n rai; dai gaw dinghta mungkan hte wenyi lam n re ai asai ashan hte nat matse hte sha seng nga ai.

YAWSHU 11:5

Ndai hkawhkam ni yawng rau hpawng nna n-gun galung la nhtawm Israela amyu masha ni hpe htim gasat na matu Merom hka shi makau e dap jung da nga ma ai.

1 YAWHAN 5:19

Mungkan ting gaw n hkru ai wa a up hkang ai a kata e rai nga ai, rai ti mung anhte gaw Karai Kasang hte seng ai rai nga ga ai hpe anhte chye ga ai.

SHINGRAN 12:9

Shaloi, mungkan ting hpe masu hkalem kau ai Nat Satan ngu ai, moi na lapu rai nga ai baren numraw kaba gaw, shi a ali ama ni hte rau ga de jahkrat kau ai hkrum wu ai.

SHINGRAN 13:3

Matse labye a baw ni hta na langai mi gaw, si na daram nma kap ai zawn rai nga ai, rai ti mung dai nma gaw mai mat salu ai. Mungkan ting gaw dai matse labye a lam mau mahka ai hte shi a hpang hkan nang nga ma ai.

SHINGRAN 16:16

Dai nat wenyi ni gaw hkawhkam ni hpe, Hebre ga hku Armagedon ngu ai shara de shaga jahpawng da mu ai.

SHINGRAN 16:7

Dai hpang dai tawn hkungri kaw na nsen langai mi mung, “Chyahtum chyalai n-gun atsam rawng ai Madu Karai Kasang e, na a jeyang ai lam ni gaw, kaja wa teng man ai hte ding hpring nga lit dai law!,” nga nna tsun ai ngai na nngai.

SHINGRAN 17:14

Shanhte gaw Sagu Kasha hpe hpyen gasat na mara ai; rai ti mung dai Sagu Kasha gaw, shi shaga la nna lata la hkrum ai, kangka re ai shi a hpang hkan nang ai ni hte rau awng padang lu na ra ai. Hpa majaw nga yang, shi gaw Madu ni a Madu, Hkawhkam ni a Hkawhkam rai nga ai,” nga nna ngai hpe tsun ai.

SHINGRAN 20:8

Mungkan ting chyam bra nga ai Goga hte Magoga ngu ai masha amyu ni yawng hpe hkalem na matu pru sa wa na ra ai. Satan gaw hpyen gasat na matu panglai na zaibru daram law ai shi a masha ni hpe jahpawng da na ru ai.

SHINGRAN 3:10

Hpa majaw nga yang, nang gaw ngai hkang da ai hte maren myit galu na hte hkam sharang na lam mungga hpe nang hkan nang ndai majaw, ga ntsa e nga ai masha ni yawng hpe chyam dinglik yu na matu mungkan ga hproi hkra ru yak jam jau du ai ten hta ngai nang hpe makawp maga na de ai.

SHINGRAN 6:17

Shan a hkrithpa pawt bu ai nhtoi kaba nang e du ra ai rai nna, kadai wa mi dai hpe tsap shingdang da lu na rai nga a ni?,” nga ma ai.