SHARUNG SHAYAWT 2:16 - Jinghpaw Common Language Bible 2009

¹⁶ Na a gumlau hpyen ni yawng nang hpe jawm ashu nhtawm n dawng ai myi hte nang hpe yu shati da ma ai. “Anhte ndai mare hpe jahten kau lu saga ai! Anhte myit mada ala nga ai shani gaw dai shani nan rai nga ai,” nga nna shanhte gaw shanhte nten ni maka let jawng kau ma ai.

Jinghpaw Hanson Version Bible

¹⁶ Hpyen ni yawng nang hpe n-gup mahka ma ai; Shanhte gaw, “Anhte shi hpe mayu kau gaw ai; gaja wa ndai shani gaw, anhte myit mada ai shani rai nga ai; anhte tam mu sagaw ai, Nga nna asawng let, wa utik ai hte tsun ma ai.

SHARUNG SHAYAWT 2:16 ပူးပေါင်းရင်းမြစ်များ

SHAKAWN KUNGDAWN 109:2

Tara n lang ai masha ni hte masu magaw ai ni ngai hpe htim gasat kau mani ai. Shanhte nye a lam hpe masu magaw ga ni hte tsun shatan nga ma ai.

SHAKAWN KUNGDAWN 112:10

Tara n lang ai ni dai lam hpe mu nna, masin pawt nga ma ai; shanhte gaw wa utik ai hte myit daw hten mat nna; shanhte a myit mada ai lam ni mung htani htana hten mat na mara ai.

SHAKAWN KUNGDAWN 124:3

shanhte hta masin kahtet ai gaw tung wa nna anhte hpe chyahkrung mayu kau na mu ai;

SHAKAWN KUNGDAWN 22:13

Shanhte gaw hkanghkyi ni zawn, n-gup ni hpe mahka nna; shabam ai hte ngai hpe amya je nga ma ai.

SHAKAWN KUNGDAWN 35:16

Chyahten labye wa hpe jahpoi asawng ai masha ni zawn, shanhte ngai hpe n ju n dawng ai myi hte yu azi da mi ai.

SHAKAWN KUNGDAWN 35:21

“Nang hpa galaw da sai lam hpe anhte mu sagaw ai,” nga nna jahtau tsun let; shanhte ngai hpe mara shagun da nga ma ai.

SHAKAWN KUNGDAWN 35:25

“Shi hpe anhte jahten kau lu sagaw ai! Dai gaw anhte myit ra ai lam nan rai sai,” nga nna shanhte hpe shada da hkum tsun hkat lu shangun et.

SHAKAWN KUNGDAWN 37:12

N hkru n shawp ai masha wa gaw mai kaja ai masha wa hpe n kaja ai hku maw mawn nna shi hpe n ju n dawng ai myi hte yu azi da nga ai.

SHAKAWN KUNGDAWN 41:8

“Shi gaw si machyi chyi nga nna, yupku kaw na galoi mung rawt lu sana n rai,” nga nna shanhte tsun ma ai.

SHAKAWN KUNGDAWN 56:2

Nye a hpyen ni ngai hpe shani tup gasat nga ma ai; ngai hpe gasat ninghkap ai ni grai law la nga ma ai.

SHAKAWN KUNGDAWN 57:3

Shi gaw sumsing lamu kaw nna htan ya ai hte ngai hpe hkye hkrang la na ra ai; ngai hpe dip gamyet sha ai ni hpe shi dang kau na ra ai. Karai Kasang gaw shi a dinggrin tsaw ra myit hte sadi sahka myit, ngai hpe madun dan na ra ai.

ESAIA 49:19

“Na a mungdan gaw hten run nna katsi katsang shara tai mat sai, rai ti mung, ya chyawm gaw dai mungdan gaw dai shara hta sa shanu nga na ni a matu shara nau pyi kaji mat na ra ai. Nang hten run mat ai majaw kau da ai ni gaw nang kaw na htawt sit kau hkrum na mara ai.

YEREMIA 26:6

Nang gaw matut nna n madat n mara ai rai yang, Shilo hpe ngai galaw kau ai zawn ndai Nawku Htingnu hpe mung ngai di kau na we ai. Ndai mungkan ga na masha amyu baw ni yawng hte gaw ndai mare a amying hpe dagam dala shara zawn lang na mara ai,” ngu nna tsun wu ai.

YEREMIA 29:18

Ngai gaw shanhte hpe hpyen majan, kawsi hpang gara hte ana zinli ni hte hkan shachyut na nngai; mungkan ga na masha amyu baw ni yawng shanhte hpe mu mada ai hte hkrit kajawng mat na mara ai. Shanhte hpe ngai shaden shabra kau ai shara shagu hkan amyu masha ni gaw shanhte hta byin lai mat wa sai lam ni a majaw mau kajawng ai hte hkrit gari wa na mara ai. Masha amyu masha ni gaw shanhte hpe asawng asang di ai hte shanhte a amying hpe dagam dala ga zawn lang na mara ai.

YEREMIA 50:17

Dai Madu gaw, “Israela amyu masha ni gaw hkanghkyi ni e shachyut jahtaw kau dat ai sagu ni zawn rai ma ai. Shanhte gaw shawng nnan e Asuri hkawseng wa htim gasat ai hkrum ma ai; dai hpang Babelon Hkawhkam Nebuhkadneza gaw shanhte a nrut nra ni hpe makrut sha kau nu ai.

YEREMIA 50:7

Shanhte hpe mu ai ni yawng gaw shanhte hpe gasat kau nga ma ai. Shanhte a gumlau hpyen ni gaw, ‘Shanhte gaw dai Madu hpe yubak galaw shut kau manu ai, dai rai nna anhte galaw kau ai amu gaw shut ai n rai. Shanhte a kaji kawa ni gaw dai Madu hpe kam hpa ma ai, shanhte hkum nan mung shi hta sadi dung nga ang ma ai,’ ngu nna tsun ma ai.

YEREMIA 51:34

Babelon hkawhkam gaw Yerusalem hpe azat mani nna sha kau nu ai. Shi gaw namtau zawn; baren numraw gaw dai hpe mayu kau ai zawn mare hpe kaman di kau wu ai. Shi gaw shi ra sharawng ai hpe la nna ngam ai hpe kabai kau nu ai.

SHARUNG SHAYAWT 1:21

“Nye a madai sharung ai nsen ni hpe madat ya et; ngai hpe shalan shabran la na langai mi mung n nga nga ai. Nang gaw nye a ntsa e ru yak tsin-yam tsindam shapraw dat nit dai majaw, nye a gumlau hpyen ni kabu nga ma ai. Nang ga sadi tawn da ai nhtoi hpe shadu nna, ngai hkam sha ai zawn nye a gumlau hpyen ni hpe nni nkri hkam sha shangun u.

SHARUNG SHAYAWT 3:46

“Anhte a gumlau hpyen ni yawng e n kaw n law jawm galaw ai hte asawng asang di ai mung hkrum sha saga ai.

EZEKELA 23:32

Tsaw Htum ai dai Madu gaw, “Nang gaw na a kana a gawm kaw na lu na rai ndai; dam lada nna sung nga ai. Masha shagu gaw nang hpe asawng asang di nna ashu na mara ai; dai gawm gaw hpring nga ai.

EZEKELA 25:15

Tsaw Htum ai dai Madu gaw, “Hpilisti masha ni gaw shanhte a jaw prat gumlau hpyen tai nga ai ni hpe gumshem ai hku matai htang nna n dawng n yawt ai myit hte shanhte hpe jahten sharun kau ma ai.

EZEKELA 25:3

Tsaw Htum ai dai Madu ngai nan tsun nga ai mungga madat na matu shanhte hpe tsun u: Nang gaw awu asin di kau hkrup sai nye a Nawku Htingnu hpe mung, shingran katsi mat sai Israela mungdan hpe mung, bawng dung hkrum ai Yuda amyu masha ni hpe mung, yu kabu ai hte yu sharawng nga nit dai majaw,

EZEKELA 25:6

“Ndai gaw Tsaw Htum ai dai Madu tsun ai mungga rai nga ai: Nang gaw lahpawk dum let kabu gumhtawn hkawm nga ndai. Nang gaw Israela mungdan hpe n kaw n law di kau nga ndai.

EZEKELA 36:3

“Myihtoi htoi u, Tsaw Htum ai dai Madu ngai nan tsun ai mungga hpe tsun ndau u. Israela a bum ni hpe htingbu mungdan na amyu baw ni gasat nna lanep shatai kau ai shaloi, Israela hpe kadai mung mani asawng nga ma ai.

EZEKELA 5:15

“Ngai gaw nang hpe pawt sindawng nna masin kahtet ai hte ari jaw ai shaloi, na a grup yin na masha amyu baw ni yawng gaw hkrit kajawng na mara ai. Shanhte gaw nang hpe yu matsat ai hte asawng asang di kau na mara ai.

HOSEA 8:8

Israela gaw kaga amyu baw ni zawn tai mat nna ndi chyaga zawn asung n shang nga ai.

MIHKA 4:11

Masha amyu baw ni law law nang hpe gasat na matu hpawng nga masai. Shanhte gaw, “Yerusalem gaw hten run mat ra ai! Ndai mare hten run taw nga ai hpe anhte mu lu na ga ai!,” ngu nna tsun ma ai.

KASA 7:54

Yuda tara kongsi hpung hta lawm ai ni gaw Stehpan a ga hpe na jang masin nachying pawt nna wa wudik let yu da mu ai.