SHARUNG SHAYAWT 1:21 - Jinghpaw Common Language Bible 2009

²¹ “Nye a madai sharung ai nsen ni hpe madat ya et; ngai hpe shalan shabran la na langai mi mung n nga nga ai. Nang gaw nye a ntsa e ru yak tsin-yam tsindam shapraw dat nit dai majaw, nye a gumlau hpyen ni kabu nga ma ai. Nang ga sadi tawn da ai nhtoi hpe shadu nna, ngai hkam sha ai zawn nye a gumlau hpyen ni hpe nni nkri hkam sha shangun u.

Jinghpaw Hanson Version Bible

²¹ Ngai madai ai hpe shanhte na timung ngai hpe shalan shabran ai wa n nga ai; Ngai hkrum ai ruyak hpe hpyen ni yawng na lu nna, ndai lam nang shabyin ai majaw, shanhte kabu nga ma ai. Nang ndat da ai nhtoi nang shadu nna, shanhte gaw ngai zawn tai mu ga.

SHARUNG SHAYAWT 1:21 ပူးပေါင်းရင်းမြစ်များ

SHAKAWN KUNGDAWN 35:15

Rai ti mung, ngai ru yak tsin-yam hkrum nga ai shaloi, shanhte yawng kabu gara nga ma ai; ngai hpe jawm shinggrup da nna asawng asang di mi ai. Tsasam masha ni ngai hpe gayat ai hte ngai hpe n sim n sa kahpret nga ma ai.

SHAKAWN KUNGDAWN 37:13

Rai ti mung, tara n lang ai ni gaw kade n na yang, jahten kau ai hkrum mat na hpe Madu chye nga ai majaw, shi shanhte hpe mani nga ai.

SHAKAWN KUNGDAWN 38:16

Nye a gumlau hpyen ni, nye a myit ru myit tsang ai lam hta hkum yu kabu shangun nga et; nye a hkrat sum mat ai lam hta mung, shanhte hpe hkum gumrawng shangun nga et!

ESAIA 14:5

Dai Madu gaw shanhte gasat dang la ai masha amyu baw ni hpe nhtum nni zingri ai hte sin pawt lahtet hte amyu masha ni hpe dip gamyet sha lai wa sai n hkru ai up hkang du ni a daru magam n-gun hpe jahtum kau ya nu ai.

YEREMIA 30:16

Rai ti mung, ya chyawm gaw, nanhte hpe kawa sha ai ni yawng hte gaw kawa sha kau ai hkrum na mara ai, nanhte a gumlau hpyen ni yawng bawng dung masha ni zawn woi la ai hkrum na mara ai. Nanhte hpe dip gamyet sha ai ni yawng dip gamyet sha ai hkrum na mara ai, nanhte hpe hpya lu hpya sha ai ni yawng hpya lu hpya sha ai bai hkrum na mara ai.

YEREMIA 48:27

Moba e, nang gaw Israela amyu masha ni hpe kaning rai ashu kau nit ta? Dai hpe dum nga u. Shanhte gaw mya lu mya sha ai damya hpung mi a lata hta rim hkrum ma ai zawn nang shanhte hpe di kau nit dai.

YEREMIA 50:11

Dai Madu gaw, “Babelon mung masha ni e, nang gaw nye a amyu hpe hpya sha kau nit dai; nanhte gaw mam kabye nga ai dumsu shing n rai shabam ai gumra zawn kabu gara ai hte kayin hkawm nga myit dai,

YEREMIA 50:15

Mare grup yin yawng hkan e majan nsen sharawt mu! Ya chyawm gaw Babelon mung hkrat sum mat sai. Shi a mare bunghku ni daw agrawp mat nna run mat nu ai. Ngai gaw Babelon masha ni hpe matai dawp nga nngai majaw, nanhte mung matai dawp la mu, shanhte gaw kaga ni hpe di kau mu ai hte maren, shanhte hpe mung di mu.

YEREMIA 50:29

“Babelon mung hpe gasat na matu, ndan gap ai ni hpe tsun mu. Ndan chye lang, pala chye gap ai masha shagu hpe shangun dat mu. Dai mare kata na masha langai mi mung n hprawng lawt lu hkra, wang shinggrup da mu. Ndai masha ni gaw Israela a Chyoi Pra ai Wa ngu ai ngai hpe gumrawng gumtawng ai arawn alai shapraw dan manu ai majaw shanhte galaw ai hte maren bai tai mu, kaga masha ni hpe shanhte pagawn para di mu ai hte maren shanhte hpe mung di mu.

YEREMIA 50:31

“Babelon e, nang gaw gumrawng gumtawng ai myit hte hpring nga ndai majaw, Chyahtum Chyalai N-gun rawng ai Tsaw Htum ai dai Madu ngai nan nang hpe hkap daw na nngai! Nye a matu nang hpe ari jaw na aten gaw du nga sai.

YEREMIA 51:24

Dai Madu gaw, “Babelon mung hte de a mung masha ni gaw Yerusalem e shanhte galaw ai n hkru ai lam yawng a matu ngai matai htang na hpe nanhte mu na rai myit dai.

YEREMIA 51:49

Babelon gaw mungkan ga ntsa na masha amyu baw ni yawng a si hkrung si htan amu hpe woi shabyin nu ai; shi gaw Israela amyu masha law law a si hkrung si htan amu hpe mung shabyin nu ai majaw, ya gaw Babelon mung kadawng daw mat na ra ai. Dai Madu ngai nan tsun ni ai.

SHARUNG SHAYAWT 1:16

“Dai re ai majaw, nye a myi ni gaw myi prwi ni hte kabrat nga li ai. Kadai mung ngai hpe shalan shabran lu ai n rai; kadai mung ngai hpe nden marai shajat ya lu ai n rai. Gumlau hpyen gaw ngai hpe ka-up dang kau nu ai; nye a amyu masha ni hpa mung n lu mat manu ai.

SHARUNG SHAYAWT 1:2

Shi gaw shana tup hkrap nga ai rai nna shi a shabyi hku myi prwi ni lwi hkrat nga ai. Shi a shawng na jinghku ni yawng hta shi hpe shalan shabran na langai mi mung n nga nga ai. Shi a myit hkrum manang ni shi hpe gumle gumlau ai hte ya gaw shi hte nhtan shai nga masai.

SHARUNG SHAYAWT 1:22

“Shanhte a n hkru ai amu yawng a matu shanhte hpe daw dan u; Nye a shut hpyit ai yubak ni a majaw nang ngai hpe ari jaw ndai zawn, shanhte hpe ari jaw u. Ngai gaw nchyi nmu hkrum ai hte madai sharung nga nngai; ngai myit machyi nga nngai.”

SHARUNG SHAYAWT 1:4

Ya chyawm gaw chyoi pra ai shani ni hta nawku na matu Nawku Htingnu de kadai mung n sa nga ai. Dai shara hta mahkawn shakawn ai mahkawn ma ni nni nkri hkrum ma ai, hkinjawng ni mung madai sharung nga ma ai. Mare chyinghka ni gaw katsi katsang rai nna, Ziun gaw tsin-yam tsindam hkrum nga ai.

SHARUNG SHAYAWT 1:8

Shi a arawng sadang hkoi mat nu ai; shi gaw singgu krin rai nga ai hte n kaw n law di hkrum nga ai. Shi gaw madai sharung ai hte shi a myi man hpe kaya ai hte makoi magap da nga ai. Yerusalem gaw shi hkum hpe awu asin di nhtawm hkrit hpa yubak hte matsat shabat di kau wu ai.

SHARUNG SHAYAWT 2:15

Dai mare hku lai wa ai masha ni gaw nang hpe yu nna jahpoi asawng nga ma ai. “Ndai mare gaw yu tsawm na zawn rai nga a ni? Ndai mare gaw mungkan ting a gumrawng shara rai nga a ni?,” nga nna shanhte a baw ni kanga nhtawm Yerusalem mare a hten run mat ai hpe yu nna ashu nga ma ai.

SHARUNG SHAYAWT 2:16

Na a gumlau hpyen ni yawng nang hpe jawm ashu nhtawm n dawng ai myi hte nang hpe yu shati da ma ai. “Anhte ndai mare hpe jahten kau lu saga ai! Anhte myit mada ala nga ai shani gaw dai shani nan rai nga ai,” nga nna shanhte gaw shanhte nten ni maka let jawng kau ma ai.

EZEKELA 26:2

Shi gaw, “Si chye ai masha wa e, ndai gaw Turu mare masha ni a kabu gara ai nsen rai nga ai. Shanhte gaw, ‘Yerusalem gaw run mat sai! Dai mare a sut n-gun mung htum mat sai! Dai mare gaw anhte hpe shingjawng lu sana n rai!,’ nga nna jahtau tsun ma ai.

YOELA 3:14

Hkying hkying law nga ai masha wunawng wuwa gaw Tara Jeyang ai Kadit hta nga nga ma ai. Dai yang e, dai Madu a nhtoi kade n na yang du wa na ra ai.

SHINGRAN 18:6

Shi nanhte hpe di ai hte maren shi hpe bai di htang mu; shi galaw ai lam yawng mayawng hte maren, htam lahkawng bai htang mu; nanhte a matu gawm hta shi kayau lajang ya ai luhpa hta htam lahkawng ja ai hku jahpring ya mu.