SHAKAWN KUNGDAWN 14:2 - Jinghpaw Common Language Bible 2009

² Hpaji rawng nna shi hpe nawku daw jau ai ni nga dam ai rai yang, dai hpe mada yu na matu dai Madu gaw sumsing lamu kaw nna shinggyim masha ni hpe gum yu nga ai.

Jinghpaw Hanson Version Bible

² Zai byeng-ya rawng ai wa nga ai, n nga ai, Karai Kasang hpe tam ai wa nga ai kun? Mada yu na nga, Yehowa lamu de nna, masha kasha ni hpe gum yu nga ai.

SHAKAWN KUNGDAWN 14:2 ပူးပေါင်းရင်းမြစ်များ

NINGPAWT NINGHPANG 11:5

Dai hpang dai Madu gaw shinggyim masha ni galaw da sai mare hte langchyi hpe yu yu na nga, yu hkrat wa wu ai.

NINGPAWT NINGHPANG 18:21

Ngai na la sai dai mara shagun ai nsen ni, teng ai n teng ai hpe chye lu na matu, ngai nan yu yu na nngai,’ ngu nna tsun wu ai.

NINGPAWT NINGHPANG 6:12

Karai Kasang gaw mungkan ga hpe mada yu wu yang, dai gaw n hkru n shawp ai amu hte hpring nga ai hpe mu wu ai; hpa majaw nga yang, shinggyim masha ni mahtang n hkru n shawp ai asak hkrun lam hta hkawm sa nga ma ai.

2 HKAWHKAM LABAU 19:3

Timung nang hta mai kaja lam naw nga nga lit dai. Amyu masha ni nawku ai Ashera karai num a hkrang sumla ni yawng hpe nang yeng seng kau nna, Karai Kasang a myit ra sharawng ai lam hta hkan nang na, nang shakut nit dai,” ngu nna tsun wu ai.

2 HKAWHKAM LABAU 30:19

“O Madu, anhte a kaji kawa ni a Karai Kasang e, htung hte maren shanhte n san n seng shajang nga ma ti mung, myit masin mahkra hte nang hpe nawku nga ai ni a mara hpe na a mai kaja ai myit hte mara dat ya u law.”

YOBA 15:14

Shinggyim masha kadai mung teng teng san seng lu a ni? Kadai mung Karai Kasang hta ding man lu a ni?

SHAKAWN KUNGDAWN 107:43

Hpaji rawng ai ni ndai amu ni a lam hpe myit sawn yu nga mu ga; shanhte gaw dai Madu a dinggrin tsaw ra myit hpe myit yu nga mu ga law.

SHAKAWN KUNGDAWN 11:4

Dai Madu gaw shi a chyoi pra ai Nawku Htingnu hta e, nga nga ai; sumsing lamu hta shi a tingnyang nga nga ai. Shara shagu hkan nga nga ai amyu masha ni hpe shi mada yu nna, shanhte hpa galaw nga ma ai hpe chye nga ai.

SHAKAWN KUNGDAWN 69:32

Dip gamyet sha hkrum nga ai ni, dai lam hpe mu ma ai shaloi, shanhte kabu gara wa lu na mara ai; Karai Kasang hpe nawku daw jau ai ni mung myit n-gun lu la na mara ai.

SHAKAWN KUNGDAWN 82:5

“Nanhte gaw hpaji n chye nga myit hka! Kade sha angawk angak rai nga myit hka! Nanhte gaw tsep kawp hten run mat manit dai; teng man rap ra ai tara gaw ndai mungkan kaw na mat mat sai.

SHAKAWN KUNGDAWN 92:6

Angawk ai masha wa n chye lu ai hte hpaji n rawng ai masha wa myit n hkawn lu ai lam baw mi nga nga ai.

GA SHAGAWP 2:9

Nang gaw ngai tsun ai ga hpe madat mara ai rai yang, teng man ai lam, tara dara ai lam hte mai kaja rap ra ai lam shagu hte hpe nang chye na lu na rin dai; nang hpa galaw ang ai lam hpe mung, nang chye lu na rin dai.

GA SHAGAWP 8:5

Nanhte myit n kung nga myit ni? Myit kunghpan wa na matu sharin la mu. Nanhte angawk angak rai nga myit ni? Chye myit chye mang lu hkra, sharin la mu.

GA SHAGAWP 9:16

“Nyan tang ai masha ni e, shang wa marit,” nga nna saw shaga nga ai.

GA SHAGAWP 9:4

“Hpaji n chye ai masha ni e, shang wa marit! Angawk Angak re ai wa e, sa rit!

ESAIA 27:11

Hpun lakung lakying ni hkraw mat yang gang daw kau hkrum nga ai, numsha ni gaw dai hpe ju hpun a matu shinggyin la ma ai. Amyu masha ni gaw hpa hpe mung n chye na nga ma ai majaw shanhte a Hpan Madu Karai Kasang gaw shanhte hpe yu matsan dum na ra ai n rai, shanhte hpe kaning re ai n-gaw nwai ai myit mung madun dan na ra ai n rai.

ESAIA 55:6

Dai Madu hpang de kayin wa nna shi kaw akyu hpyi u, ya aten, shi ani sha nga nga ai.

ESAIA 63:15

Madu e, na a chyoi pra ai hte hpung shingkang hta shanu nga ai sumsing lamu kaw na anhte hpe gum yu mi. Anhte a matu na a galu kaba ai tsang ai myit gaw kanang rai nga a ta? Na a daru magam n-gun kanang rai nga a ta? Na a tsaw ra myit hte matsan dum ai myit kanang rai nga a ta? Anhte hpe hpa n nawn hkum rai et.

ESAIA 64:1

Nang gaw hpa majaw sumsing lamu hpe gang hpaw nna n yu wa n ni? Bum ni mung nang hpe mu nna hkrit gari ai hte ashun mai nga ai.

ESAIA 8:19

Rai ti mung amyu masha ni gaw kadum kahte nga nna tsun ai mandan bau ai sara ni hte nat myihtoi ni kaw mandan ga hpyi san na matu nanhte hpe tsun na mara ai. Shanhte gaw, “Hpang jahtum e, amyu masha ni gaw wenyi minla ni kaw nat ga san mai ang ai hte hkrung nga ai ni a matu si mat sai ni hte tsun shaga san jahkrup nga ma ai,” ngu nna tsun na mara ai.

YEREMIA 4:22

Dai Madu gaw, “Nye a amyu masha ni gaw myit n su ma ai; shanhte ngai hpe n chye ma ai. Shanhte gaw angawk ai ma kaji ni zawn rai ma ai; shanhte hta chye na hkawn hkrang ai nyan hpa mung n rawng ma ai. Shanhte gaw n hkru ai amu galaw ai hta myit let ma ai, rai ti mung mai kaja ai amu galaw ai hta hkrat sum ma ai,” ngu nna tsun ai.

YEREMIA 5:1

Yerusalem amyu masha ni e, na a nmaw lam hku hprawng mu! Makau grup yin de mada yu mu! Nanhte hkum ni hpe yu yu mu! Shawa gat ginra ni hkan sawk tam yu mu! Ding hpring ai amu galaw nna Karai Kasang hta kangka nga na matu shakut ai masha langai mi hpe nang mu tam n ni? Nang mu tam ai rai yang, dai Madu gaw Yerusalem hpe mara dat ya na ra ai.

SHARUNG SHAYAWT 3:50

Dai Madu anhte hpe sumsing lamu kaw nna gum yu nhtawm anhte hpe mu mada ai aten du hkra rai nga ai.

Daniela 12:10

Masha law law mung san seng wa na mara ai. N hkru ai ni chye na hkawn hkrang na ma ai n rai, rai ti mung n hkru ai hku sha hkan na mara ai; hpaji rawng ai ni chyu sha chye na hkawn hkrang wa na mara ai.

MAHTE 13:15

Hpa majaw nga yang, shanhte a myit masin ni ayup akup rai nga nna, shanhte a na ni hpe pat kau nhtawm, myi ni hpe myi di tawn ma ai. Dai n rai taw gaw, shanhte a myi ni mu lu nna, shanhte a na ni na lu na hte, shanhte a myit masin ni mung chye na wa ai rai yang gaw, shanhte ngai hta kam hpa nna, shingbyi wa na mara ai. Ngai mung shanhte hpe shamai ya na mawe ai,’ nga nna Karai Kasang tsun ai hpe Esaia htawn tsun ai ga dik wa sai,” ngu mu ai.

ROMA 3:11

Chye chyang ai wa langai mi mung n nga ai, Karai Kasang hpe nawku ai wa mung n nga ai.

HEBRE 11:6

Makam masham n rawng yang kadai mung Karai Kasang hpe sharawng awng shangun lu ai n rai, hpa majaw nga yang, Karai Kasang kaw sit shang ai wa kadai mung, Karai Kasang nga nga ai hte shi hpe hkan tam ai ni hpe chyeju htang jaw nga ai, ngu ai hpe kam sham ai wa rai lu na rai nga ai.