SHAKAWN KUNGDAWN 115:4 - Jinghpaw Common Language Bible 2009

⁴ Shanhte a hpara ni hpe aja gumhpraw hte galaw da nna; dai ni hpe masha a lata hte tawk galaw da nga ai.

Jinghpaw Hanson Version Bible

⁴ Shanhte a sumla ni, aja, gumhpraw, Masha a lata hte galaw ai arai, rai nga malu ai.

SHAKAWN KUNGDAWN 115:4 ပူးပေါင်းရင်းမြစ်များ

1 HKAWHKAM 18:26

Shanhte hpe jaw da ai usu hpe shanhte hpya la nna dai hpe hkyen shachyip tawn nhtawm shana de du hkra, Bala kaw hpyi ma ai. Shanhte gaw, “Bala e, anhte hpe htan ya mi law!,” ngu nna jahtau tsun ma ai. Shing rai shanhte galaw tawn ai tawn hkungri grup grup hta ka manawt nga ma ai. Rai ti mung hpa mahtai mi n pru nga malu ai.

1 HKAWHKAM 18:29

Shanhte gaw shana de jan kangai mat wa ai aten du hkra jahtau marawn let abrawp shajang nga ma ti mung, hpa mahtai mi n pru, nsen langai mi mung n shara rai nga ai.

2 HKAWHKAM 19:18

shanhte a karai ni hpe nat kau ya mu ai. Dai ni gaw shinggyim masha a lata hte tawk sama da ai hpun hte nlung hte galaw da ai hpara sumla ni chyu sha rai nga ai; dai ni gaw karai ni n rai ma ai.

2 HKAWHKAM LABAU 32:19

Shanhte gaw kaga masha amyu ni a karai ni hte masha lata hte tawk da ai hpara sumla ni a lam hpe tsun kajai ma ai hte maren Yerusalem a Karai Kasang hpe mung tsun kajai ma ai.

SHAKAWN KUNGDAWN 97:7

Hpara sumla hpe nawku ai wa kadai rai ti mung, kaya kahpa hkrum nga nna; karai ni yawng gaw Madu a man e, dingnyawm nga ma ai.

ESAIA 37:19

karai ni n rai nga ai shanhte a karai ni hpe nat kau ma ai; dai ni gaw masha a lata hte galaw ai hpun nlung hpara sumla ni sha rai nga ai hpe anhte yawng chye ga ai.

ESAIA 42:17

Hpara sumla ni hpe kam hpa ai ni yawng hte shanhte jaw tawn ai karai ni hpe shaga ai ni gaw shagrit kau ai hkrum nna kaya kahpa hkrum na mara ai,” ngu nna tsun wu ai.

ESAIA 44:10

Karai langai zawn nawku na matu, nhprang gawkngu galaw ai amu gaw mai kaja ai amu n rai.

ESAIA 44:20

Dai gaw wan dap amawp sha nga ai zawn grau kaja ai lam shadan dan na ra ai. Shi a angawk ai myit mang lam gaw karum la n lu mat hkra shi hpe lam woi shadam kau nu ai. Shi a lata hta shi lang da ai hpara sumla gaw dik dik karai n rai nga ai lam hpe shi hkum nan yin la na ra ai n rai.

ESAIA 44:9

Hpara sumla tawk ai ni gaw kaman lila rai nga ma ai, shanhte manu shadan ai hte tawk da ai karai ni gaw asung n shang nga ai. Ndai karai ni hpe nawku ai ni gaw myi kyaw ai hte hpa mung n chye ma ai-shanhte gaw kaya kahpa hkrum na mara ai.

Daniela 3:5

Nanhte gaw pahtau nsen hte rau pahke, tingse, sumpyi, chyingbau hte dawraw hkan dum nang ai nsen ni hpe na lu na rai myit dai. Dai madum sumpyi ni hpe dum hpang dat ai shaloi jang, Hkawhkam Nebuhkadneza shadun da ai hkrang sumla hpe nanhte gum dagup nna nawku lu na rai myit dai.

Daniela 5:23

Nang gaw sumsing lamu Madu hpe ninghkap nhtawm shi a Nawku Htingnu na la wa ai gawm ni hte wan ni hpe la jashawn nga ndai. Nang mung, na a du magam ni mung, na a madu jan ni hte na a lashi num ni mung dai ni hta sabyi ntsin lu nhtawm, ja, gumhpraw, magri mang, hpri, hpun hte nlung ni hte galaw nna, myi n mu, na n na, hpa hpe mung n chye ai karai ni hpe shakawn kungdawn myit dai. Nang mahtang na a asak sumri sumdam hte nang galaw ai lam magup hpe yu hkang nga ai Karai Kasang hpe shagrau sha-a nga ndai n rai.

HOSEA 8:6

Lata sama hpaji rawng ai Israela masha langai mi hpara sumla galaw nga ai. Dai gaw kaja wa karai kasang langai n rai nga a hka! Samari mare hta nawku ai aja dumsu agrawp mani kau ai hkrum na rai hka!

KASA 19:26

Rai ti mung ya ndai Pawlu ngu ai wa gaw Ehpesu mare e sha n rai sa, ganoi Asi mung ting ngu na wa masha lata hte galaw ai karai ni gaw Karai Kasang n re nga nna masha law law hpe gunglau ai hte myit shayit kau ya manu ai gaw, nanhte nan mu lu na lu nga myit dai.

KASA 19:35

Jahtum e mare chyare wa mare masha ni hpe jasim kau ngut jang, “Ehpesu masha ni e, Ehpesu mare gaw galu kaba ai hpara shayi Artemi a nawku htingnu hte sumsing lamu de na hkrat wa ai nlung sumla e bau sin ai mare rai nga ai hpe masha shagu chye nga ai.

TARA JAHPRANG 4:28

Dai shara hkan e, myi n mu, na n na, n lu n sha chye ai hte manam n chye ai hpara ni ngu ai shinggyim masha a lata hte tawk da ai hpun hpara, nlung hpara ni hpe nanhte daw jau na marin dai.