ROMA 9:30 - Jinghpaw Common Language Bible 2009

³⁰ Dai re ai majaw anhte tsun mayu ai lam gaw ndai hku rai nga ai. Karai Kasang a man e ding hpring ai ni tai lu na matu n shakut ai maigan amyu ni gaw, shi hpe kam sham ai a marang e Karai Kasang a man e ding hpring wa lu ma ai.

Jinghpaw Hanson Version Bible

³⁰ Dai re ai majaw anhte kaning ngu tsun na ma? Dinghpring ai lam n shachyut ai maigan amyu ni gaw, dinghpring ai hpe lep la ma ai; rai sa, kamsham ai hte lu la ai dinghpring ai hpe lep la ma ai:

ROMA 9:30 ပူးပေါင်းရင်းမြစ်များ

GA SHAGAWP 15:9

N hkru ai masha ni a lam hpe dai Madu matsat nga ai; jaw ai amu galaw ai ni hpe shi tsaw ra nga ai.

GA SHAGAWP 21:21

Matsan dum ai hte myit malang nga u; shaloi asak galu hkra nang nga lu na rin dai, kaga masha ni mung, nang hpe hkungga jaw nna tara rap ra ai hku nang hpe matut mahkai kanawn na ra ai.

ESAIA 51:1

Dai Madu gaw, “Hkye hkrang la hkrum mayu ai ni hte karum la na matu ngai kaw du sa wa ai ni e, nye a ga madat mu. Nang pru sa wa ai kaw na lunghkrung, nang tawk la ai kaw na nhkun hpe myit yu u.

ROMA 10:10

Hpa majaw nga yang, anhte gaw ding hpring ai lu la hkra myit masin hta kam sham nna, hkye hkrang la ai lu la hkra, myit masin hta yin la na ga ai.

ROMA 10:20

Bai Esaia gaw grau nna nden ja ai myit hte, “Ngai hpe n tam ai ni gaw ngai hpe mu manu ai. Nye a lam n san yu ai ni kaw ngai dan pru nngai, nga ai.” ngu nna tsun mu ai.

ROMA 10:6

Rai ti mung, Karai Kasang hpe kam sham ai hte Karai Kasang a man e ding hpring wa lu ai lam hte seng nna Chyum Laika hta, “Sumsing lamu de kadai wa lung wa lu na kun?”

ROMA 3:5

Rai ti mung, masha nkau mi gaw, anhte a n ding n hpring ai gaw Karai Kasang a ding hpring mai kaja ai hpe grau nna shapraw shadan dan ai n rai ni? Nga nna san na mara ai. Anhte kaning ngu htan na rai ta? Karai Kasang anhte hpe ari jaw ai shaloi-dai gaw Karai Kasang shi shut ai amu galaw nu ai, ngu nna anhte tsun lu na kun? (Shing nga ai gaw, masha ni tsun ga ai hte maren tsun dat ai sha rai nga ai.)

ROMA 4:11

Shi gaw Karai Kasang e ding hpring ai ngu nna sawn ya ai hpe hkam la ngut ai hpang e she matu gadoi ai hking hpe hkam la wu ai. Dai matu gadoi ai hking gaw, Abraham a makam masham a majaw matu gadoi hking garai n hkam la ai kaw nna Karai Kasang e ding hpring ai ngu ya hkrum ai hpe madun dan ai masat dazik kumla nan rai nga ai. Dai re ai majaw Abraham gaw matu gadoi ai hking n hkam la ti mung, Karai Kasang hpe kam sham ai a marang e ding hpring ai ngu ya hkrum wu ai.

ROMA 4:13

Karai Kasang gaw Abraham hte shi a aru arat ni hpe, mungkan ga a madu tai shangun na nga nna ga sadi tawn da nu ai. Dai zawn shi ga sadi tawn da ai gaw Abraham gaw dai jep ai Tara hpe madat mara hkan sa shatup ai majaw n rai, Karai Kasang hpe kam sham ai a marang e shi hpe ding hpring ai wa ngu nna Karai Kasang hkap la sawn ya ai rai nga ai.

ROMA 4:22

Shing rai kam sham wu ai majaw Karai Kasang Abraham hpe ding hpring ai wa ngu nna hkap la wu ai.

ROMA 4:9

Dawi tsun ai, ndai a lu ai lam gaw matu gadoi hkam ai ni hte sha seng nga a ni? Kaja wa n rai law! Dai gaw matu gadoi n hkam ai ni hte mung seng nga ai. Hpa majaw nga yang, “Abraham gaw Karai Kasang hpe kam sham wu ai majaw Karai Kasang gaw shi hpe ding hpring ai wa ngu nna hkap la wu ai,” nga nna Chyum Laika hta ka da ai ga hpe anhte tsun ga ai.

ROMA 5:1

Ya anhte gaw Karai Kasang hpe kam sham ai hte ding hpring wa lu ga ai majaw, anhte a Madu Yesu a marang e Karai Kasang hte mahku mara rai sim sa ai lam lu la ga ai.

ROMA 9:14

Dai re ai majaw Karai Kasang gaw n ding n hpring nga ai rai ni? N rai law.

ROMA 9:31

Rai ti mung, Israela amyu masha ni gaw Karai Kasang a man e ding hpring wa shangun na tara langai mi hpe tam shakut ma timung n mu tam ma ai.

GALATI 2:16

Rai ti mung masha gaw jep ai tara hpe hkan sa shadik ai magam bungli hte Karai Kasang a man e ding hpring wa lu ai n rai; Yesu Hkristu hpe kam sham ai hte sha ding hpring wa lu ga ai hpe anhte chye ga ai majaw anhte mung jep ai Tara hpe hkan sa shadik ai magam bungli hte n rai, Hkristu Yesu hpe kam sham ai a marang e Karai Kasang a man e ding hpring ai ni tai wa lu u ga, anhte pyi Hkristu Yesu hta e kam sham saga ai; hpa majaw nga yang, dai jep ai Tara hpe hkan sa shadik ai magam bungli hte kadai mung Karai Kasang a man e ding hpring ai kaw n du wa lu ma ai.

GALATI 3:24

Dai rai nna anhte gaw makam masham a marang e ding hpring wa u ga, jep ai tara gaw sharin ai wa hku nna Hkristu du sa ai aten du hkra anhte hpe sharin sara tai ya mani ai.

GALATI 3:8

Dai Chyum laika mung, “Karai Kasang gaw makam masham hte sha maigan masha ni hpe ding hpring shangun na maru ai,” nga nna tau tsun da sai. Dai rai nna Chyum Laika gaw, “Amyu baw shagu gaw na gawp e gumring gumrat hkrum na mara ai,” nga nna Abraham hpe dai Kabu Gara Shiga shana ya mu ai.

GALATI 5:5

Anhte chyawm gaw, Karai Kasang a Wenyi a atsam hta kam hpa let kam sham ai a marang e Karai Kasang a man e ding hpring ai ngu nna sawn ya ai ahkaw ahkang hpe lu la na ga ai ngu nna myit mada ala nga ga ai.

EHPESU 2:12

Dai aten hta nanhte gaw Hkristu hte daw hka mat ai ni, Karai Kasang lata la ai amyu masha ni hta n lawm ai sumtsan masha ni, shi a amyu masha ni hpe jaw da ai ga shaka hte seng ai ga ndat ni hta tsasam ni rai nna, mungkan hta myit mada shara mung, Karai Kasang mung n lu ai sha, pra nga ai masha ni rai lai wa manit dai hpe dum nga mu.

HPILIPI 3:9

Ngai gaw jep ai Tara hpe madat mara hkan sa shadik ai hku nna nye a ding hpring ai hpe n lu la lu nngai. Ya gaw Hkristu hpe kam sham ai a marang e jaw ya ai ding hpring ai hpe ngai lu la nngai. Dai gaw makam masham a marang e Karai Kasang e matsan dum nna jaw ya ai chyeju kumhpa rai nga ai.

1 TIMOHTI 6:11

Nang chyawm gaw Karai Kasang a masha wa e, dai lam mahkra hte hpe koi gam nga u. Ding hpring ai, tara hkungga ai, kam sham ai, tsaw ra ai, shakut sharang ai hte sumnung ai myit ni hpe lu la hkra shakut shaja nga u.

HEBRE 11:7

Du na ra ai aten hta byin na ra ai garai n mu lu ai arai ni hte seng nna Karai Kasang sadi jaw ai hpe Noa na lu ai gaw shi a makam masham a majaw rai nga ai. Shi gaw Karai Kasang a ga hpe madat mara let sanghpaw li langai mi shachyaw nna shi hte shi a nta dinghku gaw hkye hkrang la ai hkrum manu ai. Shing re ai majaw, mungkan ga hpe shi jeyang nna Noa gaw makam masham hte seng ai ding hpring ai sali wunli hkam la nu ai.

1 PETRU 4:3

Nanhte gaw lai wa sai aten hta ram ram wa na hkra maigan masha ni galaw mayu ai baw hkan galaw lai wa manit dai. Nanhte a asak hkrung lam hpe tara n hkan ai n htap n htuk ai amu, marin marit ai amu, chyaru nang ai, n se n sa galaw ai, nang ai baw malu masha sha ai, tsa lu poi ni galaw ai, hta jai lang manit dai. Dai ni hta grau matsat shabat hkyet rung hpa gaw, sumla ni hpe nawku ai lam rai nga ai.