ROMA 9:11 - Jinghpaw Common Language Bible 2009

¹¹ Rai ti mung kasha yan pyi garai n shangai ai rai nna kaja ai hte n kaja ai garai n chye galaw ai ten kaw nna pyi Karai Kasang gaw Rebeka hpe, “Na kasha kaba ai wa mahtang kaji ai wa hpe daw jau na ra ai,” ngu nna tsun wu ai.

Jinghpaw Hanson Version Bible

¹¹ Karai Kasang shakyet da nhtawm, lata la ai lam gaw, magam bungli hte n re ai sha, shaga la ai wa a majaw she grin wa u ga, kasha yan garai n shangai ai rai nna, kaja ai hte n kaja ai hpa garai n galaw ti pyi,

ROMA 9:11 ပူးပေါင်းရင်းမြစ်များ

SHAKAWN KUNGDAWN 51:5

Ngai shangai wa ai shani kaw nna, ngai gaw n hkru n shawp nga nngai; nu a hkritung kaw nna pyi, ngai hta yubak kap nga ni ai.

ESAIA 14:24

Chyahtum Chyalai N-gun rawng ai dai Madu gaw ning ngu dagam shaka wu ai: “Ngai maw mawn ai amu byin wa na ra ai. Ngai galaw na ngu daw dan da ai amu tai wa na ra ai.

ESAIA 23:9

Chyahtum Chyalai N-gun rawng ai dai Madu gaw dai lam hpe shabyin dat nu ai. Shanhte galaw ai amu hta, shanhte a gumrawng gumtawng ai hpe jahtum kau na hte arawng sadang hte hpring ai shanhte a masha ni hpe shagrit kau na matu dai lam shabyin dat nu ai.

YEREMIA 51:29

Dai Madu gaw Babelon mung hpe masha kadai n shanu ai hte katsi katsang shara tai mat na matu maw mawn nga ai majaw mungkan ga gaw gari ashun nga ai.

ROMA 4:17

Dai gaw, “Ngai nang hpe masha amyu law law a kawa shatai sade ai,” nga nna Chyum Laika hta tsun da ai hte maren rai nga ai. Dai rai nna Abraham kam sham ai Karai Kasang a man e dai ga sadi gaw mai kaja ai hte grin nga malit dai. Shi gaw Abraham kam sham ai Karai Kasang, si mat ai ni hpe jahkrung ya ai Karai Kasang, shawng de garai n byin yu ai arai ni byin tai paw pru wa hkra hkang da ai Karai Kasang, shi nan rai nga ai.

EHPESU 2:3

Kaja wa anhte yawng mung shawng de kalang mi shanhte zawn rai nna anhte a hkum shan a marin marit ai lam ni hta hkan sa let hkum shan a ra ai lam ni hte myit masin a ra ai lam shagu hpe hkan sa galaw nga ga ai. Anhte mung hkum shan lam hku nna kaga masha ni hte maren Karai Kasang a pawt sindawng ai hpe hkrum ging ai ni rai nga ga ai.

EHPESU 2:9

Nanhte galaw ai magam bungli a majaw byin wa ai n rai, dai majaw de a lam kadai mung gumrawng shara n nga ai.

EHPESU 3:11

Karai Kasang gaw shi a htani htana shatawng shada ai lam nga ai hte maren anhte a Madu Yesu a marang e ndai lam hpe shi shabyin nu ai.

1 HTESALONI 1:4

Hpu nau ni e, Karai Kasang gaw nanhte hpe tsaw ra nna shi a amyu masha tai na matu shaga la manit dai hpe anhte chye nga ga ai.

1 HTESALONI 2:12

Anhte gaw nanhte hpe n-gun jaw ai lam hte shadaw shalan ai lam galaw saga ai. Shi a mungdan hta shang sha lu na hte hpung shingkang hkam la lu mu ga, nanhte hpe shaga la ai Karai Kasang hpe sharawng awng shangun ai asak hkrung lam hta e hkawm sa nga na matu anhte matut manoi shadut jahkat saga ai.

2 TIMOHTI 1:9

Karai Kasang gaw anhte galaw sai mai kaja dum ai amu bungli lama ma a majaw n rai, shi nan a yaw shada ai lam hte chyeju a majaw anhte hpe hkrang la nna shi a amyu masha tai na matu shaga la mani ai. Shi gaw mungkan nnan lat ai ten a shawng kaw nna Hkristu Yesu a marang e dai chyeju anhte hpe jaw da mani ai.

TITU 3:5

anhte gaw hkye hkrang la ai hkrum saga ai. Ndai zawn hkye hkrang la hkrum ai gaw anhte nan shachyen ai mai kaja ding hpring ai magam bungli lama ma a majaw n rai, shi nan a matsan dum ai chyeju a majaw rai nga ai. Dai chyeju gaw Chyoi Pra ai Wenyi kaw na hka hte bai shangai ai hte asak ningnan lu la ai lam rai nga ai.

1 PETRU 5:10

Rai ti mung nanhte jahkring sha mi nni nkri hkam ngut ai hpang, chyeju yawng mayawng a Madu rai nga ai Karai Kasang gaw nanhte hpe Hkristu hta langai sha tai shangun nna htani htana hpung shingkang hta shang sha lu mu ga, nanhte hpe shaga la ai Madu shi nan nanhte hpe ra n rawng hkra jahkum shatsup ai lam shangang shakang ai lam, n-gun lagaw sharawng ai lam ni jaw nna ngang kang ai npawt hkridun hta tsap nga lu ai ahkang jaw na marin dai.

2 PETRU 1:10

Dai re ai majaw, nye a hpu nau ni e, nanhte hpe Karai Kasang e shaga la ai hte lata la sai ngu ai lam hpe tut tut hkam sha nga na matu grau nna shakut shaja nga mu. Shing rai galaw myit yang gaw, nanhte a makam masham hpe galoi mung kabai kau na myit dai n rai.

SHINGRAN 17:14

Shanhte gaw Sagu Kasha hpe hpyen gasat na mara ai; rai ti mung dai Sagu Kasha gaw, shi shaga la nna lata la hkrum ai, kangka re ai shi a hpang hkan nang ai ni hte rau awng padang lu na ra ai. Hpa majaw nga yang, shi gaw Madu ni a Madu, Hkawhkam ni a Hkawhkam rai nga ai,” nga nna ngai hpe tsun ai.