ROMA 9:1 - Jinghpaw Common Language Bible 2009

¹ Ngai gaw Hkristu hte seng ai wa rai nna teng man ai ga ngai tsun nga nngai, hte ngai n masu nngai. Ngai teng man ai ga tsun nga nngai gaw dai Chyoi Pra ai Wenyi e up hkang ai hpe hkam la nga ai nye a kraw lawang myit e sakse hkam ya nga ai.

Jinghpaw Hanson Version Bible

¹ Hkristu hta e tengman ai ga ngai tsun nngai, ngai n masu nngai;

ROMA 9:1 ပူးပေါင်းရင်းမြစ်များ

ROMA 1:9

Ngai tsun ai ga teng man nga ai gaw nye a myit kraw lawang mahkra hte shi a Kasha a Kabu Gara Shiga a lam hkaw tsun ai hte ngai daw jau nga ai Karai Kasang nan nye a sakse rai nga ai.

ROMA 2:15

Dai jep ai Tara a hkang da ai lam ni gaw shanhte a kraw lawang ni hta ka da nga sai hpe shanhte a sat lawat nsam ni hku nna sakse hkam madun dan nga ai. Shanhte a htauli htaula myit ni mung dai lam teng nga ai hpe sakse hkam nga ai. Hpa majaw nga yang, shanhte a myit mang ai lam ni gaw kalang lang shanhte hpe mara shagun nna kalang lang gaw makawp maga madi shadaw nga ai.

ROMA 8:16

Anhte Karai Kasang a kashu kasha ni rai nga ga ai lam Karai Kasang a Wenyi nan anhte a Wenyi hte rau sakse hkam tsun shana shabra ya mi ai.

ROMA 9:2

Nye amyu masha ni nye a sai daw sai chyen ni a matu nye a kraw lawang e matut manoi ngai hkam sha nga ai yawn hkyen ai hte machyi hkrum ai lam gaw ngai tsun na nga yang grai kaba la nga ai n rai ni?

2 KORINHTU 1:12

Anhte myit kata hta asan sha gumrawng na lam langai mi nga ai; dai gaw, ndai mungkan hta anhte a asak hkrung lam, grau nna nanhte hte kanawn mazum matut mahkai ai lam ni hta masha a machye machyang hta n shamyet shanat ai sha Karai Kasang a chyeju atsam hte anhte gaw Karai Kasang jaw ai teng man san seng ai myit masin e up hkang ai hku nna amu galaw ai lam rai nga ai.

2 KORINHTU 1:23

Korinhtu mare de ngai bai n sa sana ngu nna ngai myit daw dan ai lam gaw nanhte hpe hkyamsa shangun mayu ai majaw re ai lam, nye a myit masin hpe chye ya ai Karai Kasang gaw nye a sakse rai nga sai.

2 KORINHTU 11:10

Hkristu a teng man ai ga ngai hta rawng nga ai hte maren, ndai nye a gumrawng ai lam hpe Ahkaia mung shara shagu hta kadai mung jasim shangap kau ya lu na n rai, ngu nna ngai ga sadi jaw nngai.

2 KORINHTU 11:31

Ngai masu magaw ga n tsun ai gaw Madu Yesu a Kawa Karai Kasang chye nga ai. Dai Madu Karai Kasang a mying ningsang gaw tut nawng a nga u ga law!

2 KORINHTU 12:19

Anhte gaw nanhte a man hta tut nawng e tinang hkum hpe mara n lu ai ngu nna makawp maga tsun shakut ai ni re ngu htang myit dai nhten? Dai hku n rai law! Hkristu tsun shangun mayu ai hte maren Karai Kasang a man e anhte tsun nga ga ai. Dai hta n ga, tsaw ra ai ni e, anhte galaw ai lam ni yawng gaw nanhte hpe karum na matu she galaw ga ai.

GALATI 1:20

Ya ngai ka dat ai lam gaw teng ai lam rai nga ai; ngai masu magaw ga n tsun nga ai hpe Karai Kasang chye nga ai!

HPILIPI 1:8

Ngai gaw Hkristu Yesu shi nan a myit masin hta rawng ai n-gaw nwai ai myit hte nanhte hpe myit dum marit nga nngai, ngu nna ngai tsun ai ga teng nga ai gaw Karai Kasang nye a sakse rai nga li ai.

1 HTESALONI 2:5

Hpa majaw nga yang, nanhte atsawm sha chye nga myit dai hte maren, anhte gaw nanhte hpang de n teng n man ai hku asawng hkalem ai ga tsun shaga let, shing n rai nammak lawhpa ai lam hpe magap ai ga ni lang let sa ga ai n rai. Dai lam hta Karai Kasang nan sakse rai nga ai.

1 TIMOHTI 1:5

Ndai hkang da ai ga a shatawng shada ai lam gaw, san seng ai myit kaw na pru ai dum chye ai htauli htaula myit hte sawt ai lam n lawm ai makam masham kaw na pru wa ai tsaw ra myit hpe sharawt ya na matu rai nga ai.

1 TIMOHTI 2:7

Dai re ai majaw Madu gaw ngai hpe kasa langai mi hku nna mung, maigan ni a sharin sara langai mi hku nna mung, dai makam masham hte teng man ai lam a mungga hpe hkaw tsun na matu shangun dat ai hkrum ni ai, ngai masu nga ai n rai; ngai teng man ai ga tsun nga nngai.

1 TIMOHTI 5:21

Ndai matsun da ai lam ni hpe myi man n tau, nang galaw sa wa ai lam shagu hta maga ga de n lawm ai sha madat mara hkan sa na matu Karai Kasang hte Hkristu Yesu a man e mung, chyoi pra ai lamu kasa ni a man e mung, ngai nang hpe matsun dat de ai.