ROMA 7:6 - Jinghpaw Common Language Bible 2009

⁶ Ya chyawm gaw, anhte hpe sharen da ai jep ai Tara hte si hka mat saga ai majaw dai jep ai Tara hta na anhte lawt lu saga ai. Dai rai nna ka da ai tara dingsa hku n hkan ai sha, Wenyi lam ningnan hku sha Karai Kasang hpe daw jau nga ga ai.

Jinghpaw Hanson Version Bible

⁶ Ya chyawm gaw, si mat hkrum ai hte anhte hpe sharen da ai baw hta na daw hka wa yang, jep ai tara kaw na shalawt dat ai anhte hkrum saga ai: dai rai nna, ga matsun dingsa hku n hkan ai sha, Wenyi a myit ningnan hte anhte daw jau nga ga ai.

ROMA 7:6 ပူးပေါင်းရင်းမြစ်များ

EZEKELA 11:19

Ngai gaw shanhte hpe salum nnan hte myit masin nnan jaw bang ya na nngai. Ngai gaw shanhte a ja la ai nlung salum hpe shaw kau ya nna madat mara ai salum shanhte hpe jaw bang ya na nngai.

EZEKELA 36:26

Ngai gaw myit masin ningnan hte wenyi nnan nanhte hpe jaw ya na nngai. Nanhte a ja la ai nlung salum hpe ngai shaw kau nna madat mara ai myit masin bang ya na nngai.

ROMA 1:9

Ngai tsun ai ga teng man nga ai gaw nye a myit kraw lawang mahkra hte shi a Kasha a Kabu Gara Shiga a lam hkaw tsun ai hte ngai daw jau nga ai Karai Kasang nan nye a sakse rai nga ai.

ROMA 12:2

Nanhte gaw ndai dinghta mungkan a lai madang ni hpe n hkan dagraw ai sha, nanhte gaw Karai Kasang hku nna nanhte a kata lam myit masin hpe tsep kawp galai shai kau shangun mu. Dai shaloi nanhte gaw Karai Kasang a myit ra ai lam, mai kaja ai lam, shi hpe sharawng awng shangun ai lam, hkum tsup re ai lam gaw, hpa rai nga ai ngu ai hpe chye ginhka lu na marin dai.

ROMA 6:11

Dai hte maren yubak mara hte seng nna tsun ga nga yang nanhte gaw nanhte a hkum hpe si mat ai ni zawn myit nawn da ra myit dai. Rai ti mung nanhte gaw Yesu Hkristu hta e Karai Kasang hte kanawn mazum asak hkrung nga lu manit dai.

ROMA 6:19

(Nanhte gaw hkum shan hta gawng kya nna chye na na atsam nan n rawng nga myit dai majaw masha chye na loi ai shani shagu shaga ai baw ga hte tsun nngai.) Shawng de kalang mi nanhte gaw n hkru n kaja ai lam amyu myu galaw u ga nanhte a daw shan ni hpe awu asin re ai hte n hkru n shawp ai a lata de mayam tai na matu mahkra ap kau manit dai. Dai hte maren, ya e nanhte gaw san seng mai kaja ai amu galaw lu u ga, ding hpring ai a mayam ni tai na matu nanhte a daw shan ni mahkra hpe ap ya lu na rai myit dai.

ROMA 6:2

Kaja wa dai hku n rai law! Yubak mara hte si hka mat sai ni anhte gaw dai hta e kaning rai naw matut nna pra nga lu na ga ta?

ROMA 6:22

Rai ti mung ya nanhte gaw dai yubak kaw na shalawt dat ai hkrum nna Karai Kasang a mayam ni tai wa manit dai. Nanhte lu la ai akyu gaw Madu a matu nanhte a hkum hpe awm dawm ap nawng ai a majaw jahtum e htani htana asak lu la ai lam rai nga ai.

ROMA 6:4

Dai re ai majaw Hkristu gaw kawa a hpung shingkang hte si mat ai ni kaw na hkrung sharawt la hkrum wu ai hte maren anhte mung asak ningnan hta rawt hkawm wa lu hkra, dai hkalup hkam ai hta e anhte si hkam nna shi hte rau lup makoi ai hkrum saga ai.

ROMA 7:1

Hpu nau ni e, nanhte gaw jep ai Tara a lam ni hpe chye nga myit dai rai nna, ya ngai nanhte hpe tsun na lam hpe atsawm sha chye na na myit dai. Jep ai Tara gaw masha ni hpe shanhte naw hkrung nga ai aten laman e up madu nga ai.

ROMA 7:2

Ga shadawn tsun ga nga yang, Hkungran sai numsha langai mi gaw shi a madu wa asak naw hkrung nga dingsa, hkungran ai tara hte gyit hkang da nu ai. Rai ti mung, madu wa si mat a yang gaw, madu wa hte gyit hkang da ai tara hta na shi lawt nu ai.

ROMA 7:4

Hpu nau ni e, nanhte dai ga shadawn hte bung nga myit dai. Nanhte gaw Hkristu a hkum hkrang daw shan ni rai nna jep ai Tara hta e nanhte si wa manit dai, ya gaw Karai Kasang a magam amu hta akyu rawng asi si lu u ga, si ai kaw na hkrung sharawt la hkrum ai Hkristu hte seng ai ni rai wa manit dai.

2 KORINHTU 3:6

Anhte gaw ga shaka ningnan a matu amu gun hpai lu u ga, anhte hpe atsam marai jaw ai gaw Karai Kasang shi nan rai nga ai. Dai ga shaka ningnan gaw ka da ai tara hta rawng ai n re ai sha, Wenyi kaw na rai nga ai. Hpa majaw nga yang laika hkum hte ka da ai tara gaw asak hpe si shangun nga ai; dai Wenyi chyawm gaw asak jahkrung ya nga ai.

2 KORINHTU 5:17

Kadai rai ti mung Hkristu hte langai sha tai mat ai shaloi shi gaw masha ningnan tai wa sai, shawng na dingsa hte gaw lai mat wa sai, yu mu yawng mayawng ningnan tai wa sai.

GALATI 3:13

“Hpun hta e jen da hkrum ai wa kadai rai ti mung Karai Kasang a dagam dala hkrum ai wa rai nga ai,” nga nna Chyum laika hta tsun da nga ai hte maren, Hkristu gaw anhte a matu mara dagam dala hkrum ai wa tai wa ai a jaw e jep ai Tara a dagam dala hkrum ai kaw na anhte hpe hkrang shaw la mi ai.

GALATI 6:15

Marai langai ngai gaw matu gadoi hkam ai lam rai ti mung, n hkam ai lam rai ti mung ahkyak madung n rai; ningnan hpan da hkrum ai wa tai na she ahkyak madung rai nga ai.

EHPESU 4:24

Nanhte gaw Karai Kasang a hkrang sumla hte hpan da ai gawng shingyan ningnan hpe bu hpun dagraw nna dai hta nan teng man ai hte seng ai ding hpring chyoi pra ai sak hkrung lam hpe shadan dan lu na rai myit dai.

HPILIPI 3:3

Matu gadoi hkam ai lam majing hpe hkam la ai ni gaw shanhte n rai, anhte she rai nga ga ai. Hpa majaw nga yang, anhte gaw Karai Kasang hpe shi a Wenyi hte nawku daw jau nna Hkristu Yesu hta langai sha tai lu ai asak hkrung lam hta kabu gumrawng ai ni rai ga ai. Anhte gaw shinggan maka kumla shadik poi ni hta n kam hpa ga ai.

KOLOSE 3:10

Hpan da ai Karai Kasang gaw dai masha ningnan hpe Karai Kasang shi a hkrang sumla hte grau grau bung wa hkra galaw lajang nga dingyang rai nga ai. Shing rai galaw ai gaw nanhte dai Madu hpe hkum tsup hkra chye chyang wa lu na matu rai nga ai.