ROMA 3:30 - Jinghpaw Common Language Bible 2009

³⁰ Karai Kasang gaw langai sha re ai Karai Kasang rai nga ai rai nna matu gadoi hkam ai Yuda masha ni hpe mung, matu gadoi n hkam ai maigan masha ni hpe mung, shanhte a kam sham ai a marang e, shi a man e ding hpring ai ni re ai nga nna hkap la mu ai rai nga ai.

Jinghpaw Hanson Version Bible

³⁰ Rai sa, matu gadoi hkam ai ni kamsham ai hte, matu gadoi n hkam ai ni kamsham ai a marang e, dinghpring shangun ai Karai Kasang gaw langai sha rai nga a yang gaw, maigan ni a Karai Kasang mung, shi rai nga ai.

ROMA 3:30 ပူးပေါင်းရင်းမြစ်များ

ROMA 2:26

Lama wa matu gadoi n hkam ai maigan masha langai mi gaw jep ai Tara a hkang da ai lam ni hpe hkan shatup wa yang, dai wa hpe Karai Kasang gaw matu gadoi ai hking hkam la ai wa zawn nawn ya na wu ai n rai ni?

ROMA 2:27

Nang gaw dai ka da ai jep ai Tara hku nna matu gadoi ai hking hkam la ai wa rai nga nhtawm me Tara tawt lai ai wa rai nga ndai majaw maigan masha ni nanhte Yuda masha ni hpe tara dara na mara ai. Shanhte gaw hkum shan hte seng ai matu gadoi hking n hkam la ma ai rai ti mung, jep ai Tara hpe gaw hkan shatup ma ai.

ROMA 3:22

Yesu Hkristu hpe kam sham ai a marang e masha gaw Karai Kasang a man e ding hpring wa lu ai. Karai kasang gaw Yesu hpe kam sham ai ni yawng hpe ding hpring wa shangun sai. Hpa majaw nga yang lachyen lahka ai lam hpa mung n nga ai.

ROMA 3:28

Dai jep ai Tara hta hkang da ai magam bungli ni hpe hkan galaw ai hte n re ai sha, kam sham ai hte sha masha gaw Karai Kasang a man e ding hpring ai kaw du wa lu ai hpe ya anhte chye lu saga ai.

ROMA 4:16

Dai ga sadi gaw jep ai Tara hpe hkan shatup ai ni a matu sha n rai Abraham zawn Karai Kasang hpe kam sham ai ni yawng a matu mung rai nga ai, hpa majaw nga yang Abraham gaw anhte yawng mayawng a wenyi lam hta Kawa rai nga ai.

ROMA 4:9

Dawi tsun ai, ndai a lu ai lam gaw matu gadoi hkam ai ni hte sha seng nga a ni? Kaja wa n rai law! Dai gaw matu gadoi n hkam ai ni hte mung seng nga ai. Hpa majaw nga yang, “Abraham gaw Karai Kasang hpe kam sham wu ai majaw Karai Kasang gaw shi hpe ding hpring ai wa ngu nna hkap la wu ai,” nga nna Chyum Laika hta ka da ai ga hpe anhte tsun ga ai.

GALATI 3:20

Rai ti mung Karai Kasang gaw ga ndat jaw ai shaloi, lapran e htinglet ya na masha n lawm ra ai, shi nan ading tawk galaw nu ai; Karai Kasang gaw langai sha rai nga ai.

GALATI 3:28

Dai rai nna nanhte hta shada da ginhka ginrang na lam n nga sa; Yuda amyu masha ni hte Grik masha ngu na mi n nga, mayam hte shanglawt ngu na mi n nga, lasha hte numsha ngu na mi n nga, nanhte yawng mayawng hte gaw Hkristu hta e langai sha rai nga myit dai.

GALATI 3:8

Dai Chyum laika mung, “Karai Kasang gaw makam masham hte sha maigan masha ni hpe ding hpring shangun na maru ai,” nga nna tau tsun da sai. Dai rai nna Chyum Laika gaw, “Amyu baw shagu gaw na gawp e gumring gumrat hkrum na mara ai,” nga nna Abraham hpe dai Kabu Gara Shiga shana ya mu ai.

GALATI 5:6

Kaning rai nme law, anhte gaw Hkristu Yesu hta e rai nga ga yang gaw, matu gadoi hkam ai n hkam ai ngu ai gaw hpa ahkyak n rai nga ai; ra ahkyak ai lam gaw tsaw ra myit dan dawng hkra amu galaw ai dai makam masham she rai nga ai.

GALATI 6:15

Marai langai ngai gaw matu gadoi hkam ai lam rai ti mung, n hkam ai lam rai ti mung ahkyak madung n rai; ningnan hpan da hkrum ai wa tai na she ahkyak madung rai nga ai.

TARA JAHPRANG 6:4

“Israela e, ndai ga hpe adum nga mu! Dai Madu anhte a Karai Kasang chyu sha Madu rai nga ai.

HPILIPI 3:3

Matu gadoi hkam ai lam majing hpe hkam la ai ni gaw shanhte n rai, anhte she rai nga ga ai. Hpa majaw nga yang, anhte gaw Karai Kasang hpe shi a Wenyi hte nawku daw jau nna Hkristu Yesu hta langai sha tai lu ai asak hkrung lam hta kabu gumrawng ai ni rai ga ai. Anhte gaw shinggan maka kumla shadik poi ni hta n kam hpa ga ai.

1 TIMOHTI 2:5

Hpa majaw nga yang, Karai Kasang gaw langai sha nga ai rai nna, Karai Kasang hte shinggyim masha hpe htinglu ya ai wa shinggyim masha sa tai ai Hkristu Yesu ngu ai masha mung langai sha rai nga ai.