ROMA 2:10 - Jinghpaw Common Language Bible 2009

¹⁰ Karai Kasang gaw shawng nnan e Yuda masha ni hpe rai ti mung, dai hpang maigan masha ni hpe rai ti mung, mai kaja ai bungli shachyen ai ni nlang hte hpe hpung shingkang arawng sadang hte ngwi pyaw simsa ai lam jaw na maru ai.

Jinghpaw Hanson Version Bible

¹⁰ bai, Yuda masha hpe nan rai timung, Heleni masha hpe rai timung, kaja ai bungli shachyen ai ni nlang hte hta hpung shingkang, arawng sadang hte ngwipyaw ai gaw, rai nga u ga:

ROMA 2:10 ပူးပေါင်းရင်းမြစ်များ

YOBA 22:21

Ya chyawm gaw, Yoba e, Karai Kasang hta ngwi pyaw sim sa lam galaw tawn u; gumlau hpyen zawn shi hpe hkum di et; shing rai galaw ai rai yang, shi nang hpe shaman ya na ra ai.

SHAKAWN KUNGDAWN 15:2

Lam shagu hta Karai Kasang a ga hpe madat mara ai wa gaw teng man ai amu hpe tut nawng e galaw nga nna; shi tsun ai ga mung teng man ai hte myit malang nga ai majaw,

SHAKAWN KUNGDAWN 29:11

Dai Madu gaw shi a amyu masha ni hpe n-gun atsam jaw ya ai rai nna ngwi pyaw sim sa ai chyeju hte shanhte hpe shaman ya nga ai.

SHAKAWN KUNGDAWN 37:37

Mai kaja ai masha wa hpe matsing da u, ding hpring ai masha wa hpe maram masam yu u; ngwi pyaw sim sa ai masha wa gaw aru arat law law lu nga ai;

GA SHAGAWP 11:18

Tara n lang ai masha ni gaw teng teng hpa mung lu la nga ai n rai ti mung; teng man ai amu hpe, nang galaw nga ai rai yang chyawm gaw shagrau sha-a ai kumhpa hpe nang teng teng hkam la lu na rin dai.

GA SHAGAWP 8:18

Sut su ai hte shagrau sha-a na lam, ngamu ngamai lam hte awng dang ai lam jaw ya na matu mung, ngai lu nga nngai.

ESAIA 26:12

Madu e, nang gaw anhte hpe ngamu ngamai lam shakat ya na rai nga ndai, anhte hkam la lu ai arai yawng mayawng hte gaw nang galaw ai amu a akyu chyeju hkrai rai nga ai.

ESAIA 32:17

Masha hkum shagu gaw jaw ai amu galaw wa na mara ai majaw dai mung e ngwi pyaw sim sa lam hte shim lum lam htani htana nga nga na ra ai.

ESAIA 48:18

“Nye a hkang da ai ga hpe nang madat mara nga ai rai yang chyu sha, galoi mung n hkyet mat chye ai hka shi hka zawn, shaman chyeju gaw na a matu lwi hkrat wa na ra ai. Awng padang gaw panglai hkin-gau de hkaleng ni katsu taleng lung wa ai zawn nang hta dan pru wa na ra ai.

ESAIA 48:22

Dai Madu gaw, “Yubak kap ai ni a matu shim lum lam n nga nga ai,” ngu nna tsun ai.

ESAIA 55:12

“Nang gaw kabu gara ai hte Babelon kaw na pru wa na rai ndai; nang gaw mare kata kaw na ngwi pyaw sim sa ai hte woi wa ai hkrum na rai ndai. Bum ni hte kawng ni aja awa mahkawn mangoi na mara ai, hpun ni mung kabu gara jahtau garu na mara ai.

ESAIA 57:19

Ngai gaw ni ai, tsan ai shara hkan nga ai ni yawng hpe ngwi pyaw sim sa lam jaw na nngai! Ngai gaw nye a amyu masha ni hpe shamai shatsai na nngai.

YEREMIA 33:6

Rai ti mung, ngai gaw ndai mare hte dai hta shanu nga ai amyu masha ni hpe shamai shatsai ai hte shanhte hpe hkam kaja shangun na nngai. Ngai shanhte hpe ngwi pyaw sim sa lam law htam shangun nna shim lum ai lam madun dan na nngai.

BU HKAWM 6:26

Dai Madu gaw nang hpe mada mara nna myi man pa shangun ai hte ngwi pyaw sim sa ai lam jaw ya nga u ga law.

MAHTE 10:13

Dai nta na masha ni nanhte hpe hkap hkalum la myit yang gaw, nanhte a shaman ai ga shanhte a ntsa e nga nga u ga: rai ti mung, nanhte hpe shanhte n hkalum la ma yang gaw nanhte a shaman ai ga nanhte kaw bai nhtang wa u ga.

LUKA 1:79

nsin hte si ai shingnip kata e dung nga ai ni yawng hte hpe lamu na nhtoi jahtoi ya na ra ai,” nga ai. Anhte a sat lagaw ni hpe ngwi pyaw ai lam de woi sa wa na ra ai.

LUKA 12:37

Dai madu du wa yang maja nga mala ai hpe, madu hpe wa mu lu shangun ai shangun ma ni gaw a lu ma ai. Ngai nanhte hpe tsun made ga, shi a ntsa palawng hpe raw nna, shanhte hpe sha ku grup dung shangun nna galaw daw na ra ai.

LUKA 19:42

“Mare nang e, ngwi pyaw sim sa ai lam lu la na matu hpa baw ra nga ai ngu ai hpe dai ni nang chye lu wu taw gaw law! Rai ti mung ya gaw nang dai hpe n mu n chye lu ndai!

LUKA 22:14

Ya aten du jang, Yesu gaw sape ni hte rau sha ku e dung nga ai.

LUKA 9:48

“Ndai ma hpe nye a mying a majaw hkap la ai wa kadai mung, ngai e shangun dat ai wa hpe hkap la ai rai nga ai, dai rai nna, nanhte mahkra hta grau kaji ai wa gaw, grau kaba ai wa rai nga ai,” ngu mu ai.

YAWHAN 12:26

Nye a amu hpe gun hpai mayu ai kadai mung, ngai kaw hkan nang lu na rai nna, ngai nga ai shara e nye a shangun ma mung nga na ra ai, nye Wa gaw nye a amu gun hpai ai wa kadai hpe mung shagrau na ra ai,” ngu tsun wu ai.

YAWHAN 14:27

“Ngwi pyaw sim sa ai gaw ngai nanhte hpe tawn da ya ma sade ai; Nye a ngwi pyaw simsa ai nanhte hpe ngai jaw made ai, mungkan ga na ni jaw ai zawn ngai nanhte hpe jaw made ai n rai. Nanhte myit hkum ru myit, hkrit mung hkum hkrit myit.

YAWHAN 16:33

Nanhte gaw ngai hte langai sha tai nna ngwi pyaw ai lam lu la myit ga, ngu nna ndai ga ngai nanhte hpe tsun ni ai. Mungkan ga gaw nanhte hpe nni nkri jahkrum na ra ai; rai ti mung gwi gwi dakring dakan rai nga mu! Ngai gaw mungkan ga hpe dang kau se ai!,” ngu mu ai.

KASA 10:35

Karai Kasang gaw shi hpe hkrit hkungga nawku daw jau nna ding hpring ai amu galaw ai wa kadai hpe mung amyu n lata ai sha sharawng awng hkap la nga ai.

ROMA 14:17

Hpa majaw nga yang, Karai Kasang a Mungdan gaw sha sha, lu lu rai nga na hku n re ai sha, Chyoi Pra ai Wenyi e jaw ya ai shaman chyeju ni rai nga ai, ding hpring ai ngwi pyaw ai hte kabu gara ai lam ni hte seng nga ai.

ROMA 15:13

Ya Chyoi Pra ai Wenyi a n-gun atsam hte nanhte a myit mada ai lam matut nna gumring gumrat galu kaba wa myit ga, myit mada ai lam a npawt rai nga ai Karai Kasang gaw, nanhte a kam sham ai lam hta e chyeju hte ngwi pyaw ai amyu myu nanhte hpe jahpring shatsup ya myit ga law.

ROMA 2:7

Masha nkau mi gaw kaja ai amu galaw nga let, hpung shingkang hpe mung, arawng sadang hpe mung, n si n mat ai asak hkrung lam hpe mung tam nga ma ai; Dai ni hpe Karai Kasang htani htana asak jaw na ra ai.

ROMA 2:9

Shawng nnan e Yuda amyu masha ni, dai hpang maigan masha ni rai nga ai n hkru n kaja ai bungli galaw ai shinggyim masha ni yawng a ntsa e tsin-yam tsindam hte machyi ai ari ahpri hkrum na mara ai.

ROMA 5:1

Ya anhte gaw Karai Kasang hpe kam sham ai hte ding hpring wa lu ga ai majaw, anhte a Madu Yesu a marang e Karai Kasang hte mahku mara rai sim sa ai lam lu la ga ai.

ROMA 8:6

Hkum shan myit e up hkang kau ai gaw si mat ai hpe shabyin nga ai; Wenyi e up hkang kau ai gaw asak hkrung ai lam hte ngwi pyaw ai lam hpe shabyin nga ai.

ROMA 9:21

Dibu sama wa gaw kagam ga hpe shi ra ai hku galaw na ahkaw ahkang shi lu da wu ai rai nna ga gumdin langai sha hta na chyen mi hpe ahkyak ai poi shingra ni hta lang na dibu kaja, bai chyen mi hpe yu maya shara hta lang na matu dibu galaw lu ai n rai ni?

ROMA 9:23

Dai hta n ga Madu gaw shi a matsan dum lama ai lam hkam la na masha ni ngu ai anhte hpe shi a n hpaw n ya re ai hpung shingkang hpe mu lu shangun na matu ra sharawng nga ai. Dai ni gaw Karai Kasang a hpung shingkang hkam la lu na matu hkyen lajang shajin da sai masha ni rai nga ma ai.

GALATI 5:22

Rai ti mung dai Wenyi a asi chyawm gaw, tsaw ra ai, kabu gara ai, ngwi pyaw ai, myit galu kaba ai, matsan dum ai, mai kaja ai,

GALATI 5:6

Kaning rai nme law, anhte gaw Hkristu Yesu hta e rai nga ga yang gaw, matu gadoi hkam ai n hkam ai ngu ai gaw hpa ahkyak n rai nga ai; ra ahkyak ai lam gaw tsaw ra myit dan dawng hkra amu galaw ai dai makam masham she rai nga ai.

HPILIPI 4:7

Shaloi masha a chye chyang ai nyan hta grau lai ai Karai Kasang a ngwi pyaw ai gaw nanhte a kraw lawang ni hte myit masin ni hpe Hkristu Yesu hta e bau sin na ra ai.

1 TIMOHTI 1:17

Ya htani htana Hkawhkam rai nna, n hten n mat chye ai hpe myi hte n mu lu ai, langai sha rai nga ai Karai Kasang kaw arawng sadang hte hpung shingkang gaw htani htana prat dingsa e anga nga u ga law! Amen.

HEBRE 2:7

Nang shi hpe chyahkring mi lamu kasa ni hta loi mi shagrit ai hku hpan da nit dai, rai ti mung hpung shingkang hte arawng sadang shi a ntsa e janmau shagup ya nu ai, yawng mayawng a ntsa e up hkang na ahkang mung nang shi hpe jaw nit dai,” nga nna mahtang tsun da nga ai.

YAKU 2:22

Shi a makam masham hte magam bungli rau sha ginrun nna rau galaw nga ai hpe nang n mu n chye n ni? Shi a makam masham gaw shi a magam bungli a marang e hkum tsup wa lu sai.

YAKU 3:13

Nanhte hta hpaji byeng-ya hte chye chyang ai masha langai ngai nga a ni? Dai wa gaw shi hpaji byeng-ya rawng ai lam hpe shi a mai kaja ai asak hkrung lam hte mung, shagrit shanem nna hpaji byeng-ya rawng nga ai hku mai kaja ai magam bungli galaw ai hte mung sakse madun u ga.

1 PETRU 1:7

Dai chyam dinglik hkrum ai lam gaw Karai Kasang hpe nanhte kam sham ai myit gaw jet nga ai kun? jen yu na matu rai nga ai. Jahten kau lu ai ja hpe pyi gaw wan hta ju shabyawng nna jen kau ra ai rai nna ja hta grau hpu reng ai nanhte a makam masham hpe mung ngang grin nga na matu jen kau hkrum lu na rai nga ai. Shing rai yang Yesu Hkristu bai dan pru ai nhtoi hta shakawn kungdawn ai, hpung shingkang hte arawng sadang hpe nanhte hkam la na marin dai.

1 PETRU 5:4

Dai Sagu Rem Agyi Kaba Wa dan pru ai shaloi nanhte gaw htoi kabrim ai nsam galoi mung n mat chye ai arawng sadang hte hpring ai janmau lu la na marin dai.

1 SAMUELA 2:30

Na a dinghku hte na a lakung lama ni hkinjawng ni zawn prat tup ngai hpe daw jau lu mu ga ngu, dai MaduIsraela a Karai Kasang ngai nan lai sai prat ni hta ga sadi tawn da ni ai. Rai ti mung ya chyawm gaw dai ga sadi galoi mung grin sana n rai nga sai hpe ngai tsun nga nngai! Shing rai na malai, ngai hpe shagrau sha-a ai ni hpe ngai shagrau sha-a na nngai; ngai hpe n kaw n law re ai ni hpe ngai mung n gawn n sawn di kau na we ai.