ROMA 13:12 - Jinghpaw Common Language Bible 2009

¹² Shana ahkying lai magang wa nna shani nhtoi du magang wa ra ai. Dai re ai majaw nsin hte seng ai bungli ni hpe raw sharun kau nna, nhtoi a hpyen hking hpe dagraw nga ga.

Jinghpaw Hanson Version Bible

¹² Shana ahkying lai magang wa nna, shani nhtoi du magang wa ra ai. Dai re ai majaw, nsin hte seng ai bungli hpe anhte raw sharun kau nna, nhtoi a hpyen hking hpe dagraw nga ga.

ROMA 13:12 ပူးပေါင်းရင်းမြစ်များ

Shawlumon A Mahkawn Ga 2:17

jahpawt bungli bung wa ai aten kaw nna nsin garai n sin ai aten du hkra shayaw da nga ai. Nye a tsaw ra wa e, chyahkyi zawn mung, Behtera bum ntsa na shan-nga zawn mung nhtang wa rit.

ESAIA 2:20

Dai nhtoi du ai shaloi, shanhte gaw shanhte galaw ai aja gumhpraw hpara sumla ni hpe kabai kau nna dai ni hpe sharu ni hte patsip ni hpang de tawn kau da ya na ra ai.

ESAIA 30:22

Nanhte gaw gumhpraw hte sup ai hpara sumla ni hte ja hte sup ai hpara sumla ni hpe la nna matsat shabat arai zawn dai ni hpe kabai kau nna, “Nye a man kaw na pru mat wa mu!,” ngu nna jahtau tsun na rai myit dai.

ROMA 13:14

Dai hta n ga Madu Yesu Hkristu hpe hpyen hking zawn bu hpun dagraw nga mu; hkum shan a myit marin ai hta myit lawm myit shadik la ai lam ni hpe jahkring kau mu.

1 KORINHTU 10:11

Ndai lam ni mahkra shanhte hta byin wa ai gaw, kaga masha ni a matu shari tai na matu rai nna, anhte hpe shadum shahprang sadi jaw na matu ka da nga ai. Hpa majaw nga yang, anhte gaw mungkan aprat htum na ni wa ai ten hta sa pra ang ai ni rai nga ga ai.

1 KORINHTU 7:29

Bai, hpu nau ni e, ngai ngu mayu ai gaw ndai hku rai nga ai: ahkying ladaw law law n nga sai, ya kaw nna hkungran sai la ni gaw, n hkungran ai la ni zawn nga manu ga.

2 KORINHTU 10:4

Anhte a majan gasat ai hta lang ai laknak ni gaw mungkan shinggyim masha ni lang ai baw laknak n rai, ngang kang ai hpyen dap ni hpe jahten kau lu ai Karai Kasang a n-gun atsam hte hpring ai laknak ni rai nga ai. Anhte gaw n teng n man ai ndang kalang ga ni hpe jahten kau ga ai.

2 KORINHTU 6:7

anhte hkaw tsun ai teng man ai mungga hte Karai Kasang a n-gun atsam hku nna mung, anhte gaw Karai Kasang a shangun nchyang ni rai nga ga ai lam shadan dan saga ai. Anhte gaw wenyi lam hte seng ai majan htim gasat na hte anhte a hkum hpe hkap makawp maga na matu dai teng man ai lam hpe anhte a laknak shatai nna lang ga ai.

EHPESU 4:22

Dai rai nna nanhte gaw shawng de nanhte hkan sa yu sai asak hkrung lam hta na gawng shingyan dingsa hpe mung, pyaw hpa lam hpe marin marit nna hkalem hkalau mayu ai myit a majaw, hten mat sai gawng shingyan dingsa hpe mung kabai kau mu.

EHPESU 5:11

Nsin hta hkawm sa nga ai masha ni galaw ai akyu n rawng ai nsin hte seng ai bungli ni hpa mung n hkan galaw ai sha, dai amu ni hpe nhtoi de shadan dan nga mu.

EHPESU 5:8

Moi shawng de nanhte mung ningsin hta nga lai wa yu manit dai; rai ti mung ya e Madu a masha ni tai wa manit dai rai nna nhtoi de du shang manit dai. Dai re ai majaw, nanhte gaw nhtoi a kashu kasha ni zawn hkan galaw nga mu.

HEBRE 10:25

Shada da hkrum zup hpawng de ai htung lai hpe nkau mi kau tawn da ai lam galaw nga ma ai; anhte gaw dai zawn n galaw ai sha, dai Madu bai du sa na shani ninghtoi ni wa magang ra ai hpe nanhte chye nga myit dai majaw, shada da grau nna n-gun jaw hkat nga ga.

HEBRE 12:1

Ya anhte a matu ndai daram law ai sakse ni gaw anhte hpe wang shinggrup da nga mi ai. Dai re ai majaw, anhte gaw lam e dingbai dingna re ai lam shagu hpe mung, anhte ni hta grai ngang hkra kap noi nga ai yubak hpe mung, yeng seng kau nhtawm, anhte gat na matu myit mada daw dan da ai bandung shadaw du hkra shakut sharang rai gat shadu wa ga.

YAKU 1:21

Dai re ai majaw matsat shabat re ai sat lawat shagu hte n hkru n kaja ai arawn alai yawng hte hpe yeng seng kau mu. Karai Kasang kaw sumnung ai hte shawng kaw nna nanhte a kraw lawang ni hta e shi hkai da ya sai nanhte hpe hkye hkrang la lu ai mungga hpe hkap la mu.

YAKU 5:8

Nanhte mung dai zawn myit galu let hkam sharang nga mu. Nanhte a myit mada ai lam hpe shangang shakang mu; hpa majaw nga yang Madu bai du sa na nhtoi gaw ni wa magang ra ai.

1 PETRU 2:1

Dai re ai majaw nanhte gaw n hkru n kaja ai lam amyu myu hte masu hkalem ai lam sawt ai lam, manawn masham ai lam hte roi asawng ai ga ni hpe yeng seng kabai kau mu.

1 PETRU 4:7

Arai yawng mayawng a hpang jahtum ai aten gaw ni wa magang ra ai, Dai re ai majaw nanhte gaw akyu hpyi lu na matu tinang hkum hpe hkang da nna su hprang let majen maja nga mu.

2 PETRU 3:11

Arai yawng mayawng ndai hku nna jahten kau hkrum na ra ai rai yang gaw, nanhte kaning re ai masha ni rai ra nga myit ta? Nanhte a asak hkrung lam gaw chyoi pra nna Karai Kasang hta sak nawng da ai asak hkrung lam rai ra nga ai.

2 PETRU 3:9

Masha nkau mi myit ai zawn, Karai Kasang gaw shi a ga sadi jaw da sai lam hpe galaw shadik na matu aten la nna lanyan taw nga ai n rai; rai ti mung yawng mayawng yubak mara kaw na kayin wa nna kadai mung hten bya ai n hkrum u ga, shi ra nga ai majaw shi nanhte a ntsa e, myit galu nga ai majaw rai nga ai.

1 YAWHAN 2:18

Nye a shu sha ni e, hpang jahtum ai nhtoi ni wa ra ai! nanhte hpe tsun da sai hte maren, Hkristu a hpyen ngu ai wa gaw du na ra ai rai nna, ya e pyi Hkristu a hpyen ni law law wa dawng pru ra ai majaw, hpang jahtum ai ahkying ni ra ai hpe anhte chye nga ga ai.

SHINGRAN 1:3

Ndai shingran Chyum Laika hpe hti ai wa hte, ndai myihtoi ga hte hpe madat mara nna, ndai laika hta ka da mada hpe hkan galaw ai ni gaw a lu ma ai. Hpa majaw nga yang, tsun dan ai amu lam ni byin wa na ahkying ladaw ni wa magang ra ai.

SHINGRAN 22:10

Bai shi gaw, “Ndai lam ni yawng byin wa na ahkying ladaw ni wa ra ai majaw, ndai laika hta rawng ai myihtoi ga ni hpe hkum makoi magap da et.