ROMA 12:8 - Jinghpaw Common Language Bible 2009

⁸ shadum shahprang n-gun jaw chye ai chyeju kumhpa rai yang gaw shadum shahprang n-gun jaw ga. Masha hpe karan kachyan alu jaw chye ai atsam rai yang gaw n daw n hta jaw u ga, up hkang na ahkang aya chyeju kumhpa lu ai wa gaw shakut shaja let kasang kalang up hkang nga u ga, matsam dum chye ai wa gaw kabu gara ai myit hte galaw u ga.

Jinghpaw Hanson Version Bible

⁸ shadum jahprang chye ai wa gaw, shadum jahprang ai amu hpe, shachyen u ga; alu jaw ai wa gaw n daw n hta jaw u ga; up hkang ai wa gaw, kasang kalang hte up nga u ga; matsan dum chye ai wa gaw, kabu gara ai myit hte galaw u ga.

ROMA 12:8 ပူးပေါင်းရင်းမြစ်များ

NINGPAWT NINGHPANG 18:19

Abraham gaw shi a shadang sha ni hte shi a matu mara ni nye a ga hpe madat mara nna ding hpring teng man ai amu hpe galaw ai lam hta shi hkang lu na matu ngai shi hpe lata la ni ai. Shanhte hkan shatup ai rai yang, nye a ga sadi hte maren, shi a matu lam shagu hpe ngai shadik ya na nngai,” ngu nna shi kraw e tsun wu ai.

SHAKAWN KUNGDAWN 112:9

Shi gaw ra kadawn nga ai wa hpe nhpaw n-ya jaw ya nna, shi a matsan dum ai lam galoi mung yawm mat ai n rai; Shi gaw daru magam n-gun jat wa ai hte hkungga lara ai hkrum na ra ai.

SHAKAWN KUNGDAWN 37:21

Tara n lang ai masha wa gaw arai shap la ti mung, galoi mung nhtang ya nga ai n rai; rai ti mung, mai kaja ai wa gaw shi a kumhpaw kumhpa ni hpe ndaw nhta jaw ya nga ai.

GA SHAGAWP 22:9

Ndaw nhta jaw ya u; Na a lusha matsan mayan wa hpe garan ya u, shaloi dai amu a majaw shaman ai chyeju nang hkam la na rin dai.

HPAJI NINGLI 11:6

Na a nli hpe jahpawt manap e gat u; shana de mung gat u. Dai ni yawng atsawm sha tu ai kun? Shara mi hte shara mi gat da ai shara hta gara mahtang grau kaja ai kun? Nang galoi mung n chye ndai.

HPAJI NINGLI 9:10

Nang yu wa na katsan ga hta e, amu bungli, myit mang ai, machye machyang hpaji hte hpaji byeng-ya hpa mung n nga ai majaw nang galaw ai amu hpa hpe mung ja ja galaw u.

ESAIA 32:5

Angawk ai wa gaw shagrau ging nga ai shing n rai gumbyak masha gaw myit malang nga ai nga nna kadai mung myit yu na ma ai n rai.

ESAIA 32:8

Rai ti mung shagrau ging ai wa chyawm gaw myit malang ai hku amu galaw nna ding man ai amu a matu ngang ngang tsap nga ai.

ESAIA 64:5

Nang gaw ding man ai amu galaw nga ai ni hta kabu gara lam mu tam ai ni hte, shanhte asak hkrung nga na matu nang kade daram ra sharawng nga ndai hpe adum nga ai ni hpe nang hkalum la nga ndai. Nang anhte hpe masin pawt ndai, rai ti mung anhte gaw yubak matut galaw nga ga ai; na a kaba la ai sindawng kahtet ai lam madun dan nga ti mung, moi chyaloi nhkoi kaw na anhte gaw shut hpyit amu matut galaw saga ai.

MAHTE 25:40

Dai rai nna Hkawhkam wa gaw, ‘Nanhte hpe ngai teng teng tsun made ga, ndai ngai nau ni hta na kaji htum ai wa langai mi hpe nanhte galaw ai gaw, nanhte ngai hpe galaw manit dai rai nga ai!,’ ngu nna shanhte hpe htan na mu ai.

KASA 11:23

Shi sa du ai shaloi dai masha ni hpe Karai Kasang gara hku chyeju jaw nga ai lam mu lu yang shi kabu gara nga ai hte dai Madu hta myit masin mahkra hte lashum lanoi kam sham nna sadi dung nga na matu nlang hte hpe shadum shahprang mu ai.

KASA 13:12

Munggyi wa dai byin ai lam hpe mu jang Madu a sharin shaga ai lam hpe grai mau ai hte kam sham nga ai.

KASA 13:15

Mawshe a Tara laika hte myihtoi ni a laika ni hpe hti ngut jang tara jawng agyi ni gaw shanhte hpang de masha shangun dat nna, “Hpu nau ni e, shawa hpawng hpe shadum jahprang n-gun jaw na mungga lu myit yang gaw, nanhte hpe ga shaga shangun mayu ga ai,” ngu wu ai.

KASA 15:32

Yuda yan Sila gaw myihtoi mung rai nga ma ai majaw, shanhte hte aten galu galang ga shaga nna nden marai hte Wenyi n-gun atsam, lu la shangun mu ai.

KASA 20:2

Dai ginwang hkan ga sa wa nna, mungga law law hte shadum jahprang n-gun jaw da ngut jang Ahkaia mung de du ai.

KASA 20:28

Dai majaw nanhte gaw nanhte a hkum nan hpe mung, nanhte a lata hta Chyoi Pra ai Wenyi ap ya da sai sagu hpung ting hpe mung, sadi sahka hte yu lahku nga mu, Karai Kasang gaw shi a hpung tai nga na matu shi a Kasha a si hkam ai hte mari la ai hpung hpe sagu rem ni zawn bau rem nga mu.

KASA 4:36

Dai shaloi Kupru mung na Lewi masha Yosep ngu ai wa nga ai. Shi hpe kasa ni e Barnaba ngu nna mying hkawt shamying mu ai. (De a lachyum gaw shalan shabran n-gun jaw ai wa ngu ai re)

ROMA 12:13

Ra kadawn nga ai nanhte a Hkristan hpu nau ni hpe tinang lu ai arung arai ni gam jaw gam ya nga mu; chyasam manam ni hpe hkap hkalum daw jaw daw ya nga mu.

ROMA 13:6

Dai majaw mung, nanhte hkansi bang nga myit dai; hpa majaw nga yang, ahkang aya lu ai ni gaw tinang galaw ang ai lit ni hpe gun hpai ai shaloi Karai Kasang a matu magam bungli gun hpai ai ni tai nga ma ai.

1 KORINHTU 12:28

Karai Kasang gaw dai Hpung hta e, langai ngu na shara hta Kasa ni, lahkawng ngu shara hta myihtoi ni, masum ngu na shara hta sara ni, dai hpang e lamik kumla galaw ai ni, dai hpang machyi makaw shamai shatsai na atsam lu ai ni, masha kaga ni hpe karum madi shadaw lam madun chye ai atsam lu la ai ni, lam woi ningshawng ni hte, laklai ai ga amyu myu chye shaga ai ni hpe mung shi shara hte shi san tawn da manu ai.

1 KORINHTU 14:3

Rai ti mung Karai Kasang a mungga hkaw tsun ai wa chyawm gaw, masha ni hpe shadaw shangang ai ga, n-gun jaw ai ga, shalan shabran ai ga tsun dan nga ai.

2 KORINHTU 1:12

Anhte myit kata hta asan sha gumrawng na lam langai mi nga ai; dai gaw, ndai mungkan hta anhte a asak hkrung lam, grau nna nanhte hte kanawn mazum matut mahkai ai lam ni hta masha a machye machyang hta n shamyet shanat ai sha Karai Kasang a chyeju atsam hte anhte gaw Karai Kasang jaw ai teng man san seng ai myit masin e up hkang ai hku nna amu galaw ai lam rai nga ai.

2 KORINHTU 11:3

Ewa gaw lapu a hpaji rawng ai zai byeng-ya hte masu hkalem hkrum ai zawn, nanhte mung nanhte a myit mang ai lam jahten kau hkrum nna, nanhte a hpring tsup nna san seng ai myit hte Hkristu hta maju jung kam sham daw jau ai lam hpe kau da na myit tsang nga nngai.

2 KORINHTU 8:12

Nanhte hta jaw ya mayu ai shawang myit rawng ai rai yang, Karai Kasang gaw nanhte a rai lu ai made jaw ya ai kumhpa hpe hkap la na ra ai. Nanhte n rai lu ai hpe Karai Kasang hpyi na n rai.

2 KORINHTU 9:11

Nanhte a lata hku nna shanhte hkap la lu ai nanhte jaw ya ai alu kumhpa ni a majaw masha law law wa Karai Kasang a chyeju hpe shakawn na mara ai. Nanhte aten shagu shawang kumhpa ndaw nhta jaw ya lu hkra Madu gaw nanhte hpe galoi mung sut su shangun na ra ai.

2 KORINHTU 9:13

Ndai nanhte a galaw daw ai amu a awng dang ai kasi kaja a majaw, masha law law gaw, nanhte Hkristu a kabu gara shiga hpe kangka sadi dung ai hku hkap la kam sham myit dai majaw mung, nanhte a shawang myit hte shanhte hte kaga masha ni hpe ndaw nhta alu jaw ya myit dai majaw mung, Karai Kasang a hpung shingkang hpe shagrau sha-a na mara ai.

2 KORINHTU 9:7

Lahpawt ai myit hte mung n rai, jaw ra ai lit a majaw sha mung n re ai sha, langai hte langai gaw tinang a kraw lawang e myit da ai hte maren jaw u ga; hpa majaw nga yang, Karai Kasang gaw kabu gara ai myit hte jaw ya ai wa hpe tsaw ra nga ai.

EHPESU 6:5

Mayam ni e, nanhte Hkristu hpe daw jau nga ai zawn, nanhte a shinggyim madu ni hpe madat mara let hkrit kamyin ai hte myit malang nna myit su ai hku galaw mu.

TARA JAHPRANG 15:14

Dai Madu nang hpe shaman ya nit dai sagu, nsi naisi hte sabyi ntsin ni hpe lahpawt dum ai myit n rawng ai sha shi hpe jaw na rai ndai.

TARA JAHPRANG 16:11

Tinang a kashu kasha, shangun ma ni hte nanhte a mare hta nga ai Lewi masha ni, maigan masha ni, jahkrai nmai ni hte gaida gaina ni yawng dai Madu a man e rau sha kabu gara nga mu. Ndai amu hpe nawku daw jau ai shara langai hta sha galaw mu.

KOLOSE 3:22

Mayam ni e nanhte a shinggyim madu ni hpe lam shagu hta madat mara nga mu: nanhte gaw myi man pa mayu ai hte shanhte a man e ga madat ai hku n re ai sha, Karai Kasang hpe hkrit hkungga let shanhte a ga hpe san seng ai myit hte madat mara nga mu.

1 HTESALONI 2:3

Anhte gaw shut ai lam hte n san n seng ai maw mawn ai myit hte langai ngai hpe hkalem hkalau mayu ai myit hte, nanhte hpe shadum jahprang ga ai n rai.

1 HTESALONI 2:8

Nanhte gaw anhte a grai nja nhpra re ai ni tai wa manit dai! Karai Kasang kaw na Kabu Gara Shiga sha n rai, anhte a asak hpe pyi garan jaw na jin jin rai nga ga ai.

1 TIMOHTI 4:13

Ngai sa du ai ten du hkra shawa masha ni a man de Chyum Laika hti dan ai lam, mungga htawn tsun ai lam hte sharin achyin ai lam hpe aten jaw nna atsam dat galaw shakut nga u.

1 TIMOHTI 5:17

Ningbaw ningla amu hpe atsawm galaw ai hpung woi ni gaw shabrai htam lahkawng hkam la ging ai wa re ngu nna sawn la mai nga ai. Grau nna mungga htawn tsun ai lam sharin achyin ai lam hpe shakut shaja gun hpai ai ni gaw shing rai hkam la ging ai ni rai nga ma ai.

1 TIMOHTI 6:18

Mai kaja ai galaw na matu mung, mai kaja ai bungli ni hta sut su na matu mung, masha kaga ni hpe karan kachyan jaw jahproi ai lam hta mung, n daw n hta jaw ya na matu jin jin rai nga mu ga shanhte hpe sharin shaga nga u.

HEBRE 10:25

Shada da hkrum zup hpawng de ai htung lai hpe nkau mi kau tawn da ai lam galaw nga ma ai; anhte gaw dai zawn n galaw ai sha, dai Madu bai du sa na shani ninghtoi ni wa magang ra ai hpe nanhte chye nga myit dai majaw, shada da grau nna n-gun jaw hkat nga ga.

HEBRE 13:17

Nanhte a lam woi ningshawng ni a ga hpe madat mara nna shanhte a hkang da ai ga ni hpe hkan sa galaw mu. Shanhte gaw shanhte galaw daw ai amu a jahpan hpe Karai Kasang kaw dan lu na rai nna, shanhte gaw nanhte a myit masin ni hpe n hkring n sa sin ya nga ma ai. Shanhte a ga hpe nanhte madat mara myit yang gaw shanhte galaw ai bungli hpe kabu gara ai hte galaw na mara ai: dai n rai yang shanhte myit yawn let galaw na mara ai rai nna na a matu hpa akyu mi rawng na n rai.

HEBRE 13:22

Hpu nau ni e, ndai n-gun jaw shadum jahprang ai ga hpe hkam sharang ai hte madat la na matu ngai nanhte hpe lajin dat made ai; hpa majaw nga yang, ngai nanhte hpang de ka dat ai ndai laika gaw grai wa galu ai n rai.

HEBRE 13:24

Nanhte a lam woi ningshawng ni yawng hte hte, Karai Kasang a amyu masha ni yawng hpe shakram ya mi, Itali mung na hpu nau ni nanhte hpe shakram dat ma ai.

HEBRE 13:7

Nanhte hpe Karai Kasang a mungga tsun dan lai wa sai shawng de na nanhte a lam woi ningshawng ni hpe myit dum nga mu. Shanhte kaning rai asak hkrung nna gara hku si wa masai hpe amyit dum nga nna, shanhte a makam masham hpe len ningli la nga mu.