ROMA 1:21 - Jinghpaw Common Language Bible 2009

²¹ Shanhte gaw Karai Kasang hpe chye chyang ninglen Karai Kasang hpe shagrau sha-a ang ai hte maren, n shagrau sha-a ma ai, chyeju jawm shakawn kung dawn ai lam n galaw ma ai, shanhte a myit mang ai lam gaw, lachyum n pru kaman li la sha rai mat malu ai majaw, shanhte a htauli htaula myit kaja ai myit masin ni gaw sin mak ai hte hpring chyat nga malu ai.

Jinghpaw Hanson Version Bible

²¹ Shanhte Karai Kasang hpe chye chyang ninglen, Karai Kasang hpe shagrau sha-a ang ai hte maren, n shagrau n sha-a ma ai hte, shakawn kungdawn mung n rai ma ai; shanhte a myit mang ai lam gaw, kaman lila sha rai mat malu ai rai nna, shanhte a n gring ai myit gaw, sin mak mat malu ai.

ROMA 1:21 ပူးပေါင်းရင်းမြစ်များ

2 HKAWHKAM 17:15

Shanhte gaw shi a matsun maroi ga ni hpe madat mara na matu ningdang kau nhtawm shi hte shanhte a kaji kawa ni hte tawn da ai ga shaka hpe n hkan shatup ai hte shi a shadum jahprang ai ga ni hpe shanhte n kaw n law di kau ma ai. Shanhte gaw manu n dan ai hpara sumla ni hpe nawku nhtawm tinang hkum hpe manu shagrit kau ma ai; shanhte gaw grup yin masha amyu baw ni a htung lailen ni hta hkan nhtawm shanhte a arawn alai ni hpe len n la na matu dai Madu a hkang da ai ga ni hpe mung n madat nga ma ai.

YEREMIA 2:5

Dai Madu gaw ning nga tsun ai: “Na a nji nwa ni gaw kaning re ai mara hte ngai hpe mara shagun ma ta? Hpa lam a majaw shanhte hpe ngai kaw na kayin kau shangun nga a ta? Shanhte gaw akyu n jaw ai hpara sumla ni hpe nawku nna shanhte nan manu n dan ai ni tai wa masai.

SHAKAWN KUNGDAWN 50:23

Chyeju dum ai shagu hkungga gaw ngai hpe shagrau sha-a ai lam rai nga ai; nye a ga madat mara ai ni yawng hte hpe ngai teng teng hkye hkrang la na nngai.”

2 TIMOHTI 3:2

Masha ni gaw tinang a akyu tam ai, nam mak lawhpa, shakawng shakat ai, myit tsaw myit dap gumrawng ai ni rai na mara ai. Shanhte gaw roi asawng ga tsun ai ni, kanu kawa ni hpe gumlang ai ni, chyeju n chye dum ai ni, nawku makam masham kata ai ni rai na mara ai.

SHINGRAN 14:7

Dai lamu kasa gaw, “Shinggyim masha amyu baw shagu hpe tara dara na aten du ra ai. Dai majaw, Karai Kasang hpe hkrit hkungga mu! Shi a htani htana galu kaba ai hpung shingkang hpe shagrau sha-a mu! Sumsing lamu hte ginding aga, panglai hte hka hpawk ni hpe hpan tawn da ai wa hpe nawku nga mu!,” nga nna nsen kaba hte tsun nga ai.

YAWHAN 3:19

Tara dara ai masa lam ndai hku rai nga ai; nhtoi gaw ndai mungkan ga de du sa sai, rai ti mung masha ni a arawn alai n shawp nga malu ai majaw, shanhte gaw nsin hpe nhtoi hta grau tsaw ma ai. Dai gaw tara dara hkrum ai lam nan rai nga ai.

SHINGRAN 15:4

Madu e, nang hpe n hkrit hkungga ai kadai wa nga lu na rai ta? Nang galu kaba nga ai hpe n yin la ai kadai nga lu na rai ta? Nang chyu sha chyoi pra nga ndai; nang galaw ai amu ni ding hpring nga ai lam yawng mu lu ma ai majaw, masha amyu baw shagu ni, na a man e, sa nawku na mara ai law!,” nga nna tsun ma ai.

1 PETRU 2:9

Rai ti mung nanhte gaw lata la ai amyu, Hkawhkam a hkinjawng ni, chyoi pra ai amyu masha ni hte Karai Kasang shi nan madu nga ai ni rai nga myit dai; shing rai lata la ai lam gaw, nanhte hpe nsin kata kaw nna shi a mauhpa nhtoi de shaga bang wa ai wa a hpung shingkang rawng ai magam amu ni hpe shana shabra shabrawng dat ya na matu rai nga ai.

SHAKAWN KUNGDAWN 81:12

Shing rai, shanhte a baw ja ai lam hku sa wa lu mu ga; shanhte ra mara hpe galaw lu mu ga, ngai shanhte hpe ahkang jaw dat nngai.

YEREMIA 16:19

Madu e, nang gaw ngai hpe makawp maga ai hte n-gun atsam jaw ya ai wa rai nga ndai; nang gaw ngai hpe ru tsang hkrum ai aten ni hta karum la nga ndai. Mungkan ga a jahtum de na amyu baw ni gaw nang kaw du sa wa nna, “Anhte a kaji kawa ni gaw hpara sumla ni hta kaga hpa mung n nga nga ai, dai ni gaw hpa akyu n rawng ai hte kaman lila hkrai rai nga ai.

ROMA 11:10

Shanhte myi n mu lu hkra shanhte a myi ni sin mak malu ga, shanhte a marung ni gaw gun hpai ra ai lit a majaw tut nawng htingkung nga shangun u,” nga ai.

ROMA 1:28

Dai masha ni gaw Karai Kasang hte seng ai teng man ai machye machyang shanhte a myit hta bang da na ningdang kau ma ai majaw shanhte n galaw ang ai n hpru n mai re ai amu galaw mu ga, Karai Kasang gaw shanhte hpe n san n seng ai myit mang lam ni hta nawng kau mu ai.

ROMA 1:19

Dai masha ni hpe Karai Kasang shi nan asan sha shadan dan sai majaw Karai Kasang hte seng nna chye na mai ai lam ni hpe asan sha chye na lu masai. Ndai lam a majaw Karai Kasang shanhte hpe ari jaw mu ai.

ROMA 15:9

Maigan amyu masha ni pyi Karai Kasang a matsan dum lama ai lam hpe shakawn kungdawn lu mu ga, ngu nna mung du sa ra ai. Chyum laika hta, “Dai re ai majaw maigan amyu ni a kata hta ngai nang hpe shakawn na nngai, Na a mying nsang hpe mahkawn mangoi na nngai,” nga nna ka da ai hte maren rai nga ai.

KASA 26:18

Ngai hpe kam sham ai a marang e shanhte yubak mara ni raw dat kau ai hkrum nna Karai Kasang a lata la ai amyu hta lawm lu mu ga, n sin kata nna nhtoi de, Satan a atsam kata nna Karai Kasang hpang de shanhte kayin wa lu hkra nang shanhte a myi jahpaw ya na rai ndai,’ nga nna ngai hpe tsun nngai.

HOSEA 2:8

Ngai gaw shi hpe nai mam nsi naisi, sabyi ntsin, tsanlun sau, Bala hpara hpe nawku ai hta shi lang ai ja gumhpraw yawng hpe jaw ai wa rai nga nngai hpe shi galoi mung yin la nga ai n rai.

ESAIA 60:2

Kaga masha amyu baw ni gaw nsin hte ka-up da hkrum na mara ai, Rai ti mung dai Madu a nhtoi gaw na a ntsa e htoi tu na ra ai; Shi a htoi kabrim ai hpung shingkang gaw nang hte rau nga nga na ra ai.

SHAKAWN KUNGDAWN 86:9

Nang hpan tawn da ai masha amyu baw ni yawng hte gaw nang kaw sa nna dingnyawm wa na mara ai; shanhte gaw na a galu kaba ai lam hpe shakawn na mara ai.

1 PETRU 1:18

Nanhte a kaji kawa ni kaw na hkan dagraw la ai manu n rawng ai asak hkrung lam a arawn asam hta na nanhte hpe hpa baw hte galai hkrang la sai lam nanhte chye nga myit dai. Dai gaw jahten sharun kau lu ai ja gumhpraw zawn re ai arai lama ma hte n rai,

HPAJI NINGLI 7:29

Ngai gaw ndai lam yawng mayawng hpe sharin la ni ai; Karai Kasang gaw anhte hpe asan sha hpan da ti mung, anhte mahtang anhte a hkum hpe kashuk kashak shabyin nga ga ai.

TARA JAHPRANG 28:29

Nanhte gaw myi amam ai wa zawn shani chyingtung e pyi lamawm hkawm na rai myit dai; nanhte gaw nanhte hkawm sa na lam hpe pyi mu tam lu na n rai; nanhte galaw ai hpa lam mung ngamu ngamai shangun lu na n rai. Nanhte gaw dip gamyet sha hkrum nna zingri zingrat kashun kashe du daw sai hkaw sha ahkrum na marin dai; nanhte hpe kadai mung karum la na myit dai n rai.

NINGPAWT NINGHPANG 8:21

Dai hkungga a manam pyaw ai sangau gaw dai Madu hpe awng sharawng shangun nga ai rai nna dai Madu gaw, “Shinggyim masha e galaw ai amu a majaw, ginding aga hpe ngai galoi mung dagam kau na ni ai n rai; shi a myit mang ai lam ni gaw shi naw kaji nga ai aten kaw nna n shawp nga ai hpe ngai chye nngai. Ndai lang ngai galaw kau ni ai zawn asak rawng ai hkrung mahkrung ni yawng hpe ngai galoi mung bai jahten na ni ai n rai.

NINGPAWT NINGHPANG 6:5

Ga ntsa na shinggyim masha shagu hte gaw kade wa n shawp n kap nga ai hte aten shagu hta shanhte a myit mang ai lam kade wa n hkru nga ma ai hpe dai Madu mu ai shaloi,

1 HKAWHKAM 20:23

Hkawhkam Benhadad a du salang ni mahtang shi hpe, “Israela a karai ni gaw bum ga na karai ni rai nga ma ai majaw, Israela masha ni anhte hpe dang kau mi ai; anhte mahtang pa layang hkan e shanhte hpe gasat ga ai rai yang, anhte teng teng wa shanhte hpe dang kau lu na ga ai.

YEREMIA 9:14

Dai zawn hkan galaw na malai, shanhte gaw du ja ai hte shanhte a kaji kawa ni shanhte hpe hkan galaw na matu sharin da ya ai hte maren, Bala hpara sumla ni hpe nawku ma ai.

YEREMIA 17:9

“Masha a myit masin hpe kadai chye lu nga a ni? Grai masu magaw ai hta jan nna hpa mung n nga nga ai; dai gaw shamai shatsai la na matu nau wa machyi sawng mat nga ai.

EZEKELA 20:25

“Dai hpang, ngai gaw shanhte hpe n kaja ai tara ni hte asak n jahkrung ya lu ai matsun maroi ga ni hpe jaw da nngai.

EZEKELA 14:5

Ndai hpara sumla ni yawng gaw Israela amyu masha ni hpe ngai kaw na kayin kau dat nga ai, rai ti mung, nye a mahtai hte maren, shanhte a sadi dung ai hpe ngai bai hkam la lu na myit mada nga nngai.