PRU MAT 23:2 - Jinghpaw Common Language Bible 2009

² Nang gaw n hkru ai amu galaw ai hte teng man ai lam hpe shadam kau na matu masha law law sakse hkam ya ai maga de hkum hkan et.

Jinghpaw Hanson Version Bible

² N hkru ai amu galaw na masha law ai maga de hkum hkan et; amu tsun ai lam hta tara man ai hku jahten na, masha law ai maga de nang sakse hkam ya lu na n rai;

PRU MAT 23:2 ပူးပေါင်းရင်းမြစ်များ

NINGPAWT NINGHPANG 19:4

Dai manam yan yup ra garai n shang yang, Sodom mare na lasha ni dai nta hpe grup di wang da mu ai. Mare na lasha kaji kaba yawng mung dai shara hta nga nga ma ai.

NINGPAWT NINGHPANG 6:12

Karai Kasang gaw mungkan ga hpe mada yu wu yang, dai gaw n hkru n shawp ai amu hte hpring nga ai hpe mu wu ai; hpa majaw nga yang, shinggyim masha ni mahtang n hkru n shawp ai asak hkrun lam hta hkawm sa nga ma ai.

NINGPAWT NINGHPANG 7:1

Dai Madu gaw Noa hpe, “Nang hte na a nta masha ni yawng dai sanghpaw li kata de shang manu; ndai mungkan ga yawng hta jaw ai amu galaw ai gaw nang chyu sha rai nga ndai hpe ngai mu se ai.

1 HKAWHKAM 19:10

Shi gaw, “Chyahtum chyalai n-gun rawng ai Madu Karai Kasang e, ngai gaw nang - nang hpe chyu sha tut nawng daw jau yu sade ai. Rai ti mung Israela amyu masha ni mahtang nang hte shagrin da ai ga shaka hpe jahten kau nna na a tawn hkungri ni hpe sharun shabya kau let na a myihtoi ni yawng hpe sat kau manu ai. Ngai chyu sha ngam nga ni ai. Shanhte gaw ngai hpe sat kau na matu shanhte tam shakut nga ma ai!,” ngu nna htan wu ai.

YOBA 31:34

Masha ni ngai hpe kaning nga tsun na lam hpe ngai galoi mung n hkrit nngai; shanhte a jahpoi asawng ai ga hpe ngai hkrit nngai majaw, nhku kata e rawng nna galoi mung atsin sha nga nngai n rai.

SHAKAWN KUNGDAWN 72:2

shing rai yang, shi gaw na a amyu masha ni hpe teng man ai lam hte up hkang lu na ra ai, dip gamyet sha hkrum nga ai ni hpe ding man ai lam hte up hkang lu na ra ai.

GA SHAGAWP 1:15

Sha e, dai zawn re ai masha ni a hpang hkum hkan nang et; shanhte hpe koi yen kau u.

GA SHAGAWP 18:5

Mara lu ai wa hpe myi man tau ya na n ang nga ai; mara n kap ai wa hpe tara dara ai hta sum shangun na n mai nga ai.

GA SHAGAWP 4:14

N hkru n shawp ai masha ni hkawm sa ai shara de hkum sa et; tara n lang ai ni a kasi hpe hkum hkan nang nga et.

YEREMIA 37:15

Shanhte gaw ngai hpe masin pawt bu ma ai hte ngai hpe kayat nhtawm htawng shatai tawn ai htingnu amu madu Yonahtan a nta hta sharen da ma ai.

YEREMIA 37:21

Shaloi Hkawhkam Zedekia gaw ngai hpe hkawhkam wang kata e rawng da na matu hkang dat wu ai. Ngai gaw dai yang e nga nga nna, mare kata hta kabaw ai muk tawng ni yawng ma mat ai aten du hkra, ngai gaw shani shagu muk kabaw seng kaw na muk tawng tawng hpe sha let nga nga nngai.

YEREMIA 38:9

“Nye a hkawhkam wa e, ndai masha ni galaw ai amu gaw shut nga masai. Shanhte gaw Yeremia hpe hka htung kata de jahkrat bang kau manu ai, bai nna ndai mare hta lusha hpa mung n nga sai majaw shi gaw teng teng kawsi kyet ai hte si mat na ra ai,” ngu nna tsun wu ai.

EZEKELA 9:9

Karai Kasang gaw, “Israela hte Yuda amyu masha ni gaw hkrit hpa yubak hte shut hpyit ai mara lu nga ma ai. Shanhte gaw mungdan ting hta sai kap amu shut hpyit kau manu ai hte Yerusalem mung ru hka amu ni hte hpring chyat nga sai. Dai Madu ngai nan shanhte a mungdan hpe kau da nna, shanhte hpe n mu lu sai, nga nna shanhte tsun shajang ma ai.

JAW JAU 19:15

“Tara shang amu ni tsun daw dan myit dai shaloi, myit malang ai hte teng man ai hku hparan ya na rai myit dai; matsan ai wa hpe n maga, lu su ai wa hpe mung n mada ai sha daw dan na rai myit dai.

HAGI 1:4

“Nye a amyu masha ni e, nanhte gaw nye a Nawku Htingnu hten run taw nga ai aten hta kaja ai dum nta ni hta hpa majaw rawng nga myit ni?

MARKU 15:15

Pilat gaw shawa masha ni hpe myit shapyaw ya mayu ai hte, shanhte a matu Baraba hpe dat ya mu ai. Dai hpang Yesu hpe anu kayat nhtawm jen sat kau na matu ap kau dat mu ai.

LUKA 23:51

Shi gaw Yuda amyu mung bawng salang hpung hta lawm ai wa langai mi rai nga ai rai ti mung, shanhte a bawng daw dan ai hte galaw ai lam hpe myit n hkrum lawm wu ai.

KASA 24:27

Shing rai ni ning lai ai hpang, Porku Hpestu gaw Hpilik a aya hte munggyi tai wa nna Hpilik gaw Yuda masha ni kaw na myi man ra ai majaw Pawlu hpe naw sharen tawn da wu ai.

KASA 25:9

Hpestu gaw Yuda amyu masha ni kaw myiman pa mayu wa ai rai nna Pawlu hpe, “Nang Yerusalem mare de lung wa nna, dai yang e nye a man e ndai mara shagun da ai lam ni hte seng nna daw dan hkam na, nang hkraw nga n ni?,” ngu nna shi hpe san wu ai.

ROMA 1:32

Shing rai galaw ai ni gaw si ging nga ma ai nga nna Karai Kasang a tara hta hkang da nga sai hpe shanhte chye chyalu rai ma ai rai ti mung, shanhte hkum nan dai lam ni hpe galaw dingyang rai nga ma ai hta n ga, dai hku hkan galaw ai ni hpe mung n-gun jaw awlaw ma ai.

TARA JAHPRANG 1:17

Nanhte tara daw dan ai amu ni hta myi man tau ai lam madun lu na myit dai n rai; shi kadai wa mi rai nga ai rai tim, myi man n lata ai sha masha shagu hte hpe maren mara jeyang lu na rai myit dai. Nanhte daw dan ai amu ni gaw Karai Kasang kaw na rai nga ai majaw kadai hpe mung hkrit agam lu na myit dai n rai; nanhte a matu daw dan hparan yak ai amu pru wa ai rai yang, ngai hpang de shashawn myit; dai hpe ngai daw dan ya na de ai,’ ngu nna sharin matsun se ai.

TARA JAHPRANG 16:19

Tara jeyang ai lam hta n teng n man ai hku myi man tau ya ai lam madun lu na myit dai n rai; mayun kumhpa ni la sha lu na ma ai n rai; dai gaw hpaji rawng ai ni hte ding man ai ni a myi hpe shamak kau ya nhtawm shanhte a tara daw dan ai lam hpe shut kau shangun nga ai.

TARA JAHPRANG 24:17

“Maigan masha ni hte jahkrai nmai ma ni a ahkaw ahkang ni hpe hkum pat shingdang da ya lu na n rai; gaida jan a hpun palawng hpe hkoi jaw gumhpraw a matu pahkam arai shatai kau ya lu na n rai.

YAWSHU 24:15

Nanhte shi hpe daw jau na n ra sharawng myit yang chyawm gaw Mesopotamia mung e nanhte a nji nwa ni nawku ai hpara ni, shing n rai ya nanhte nga nga ai mung na Amori hpara ni hta gara hpe mahtang jaw jau na gaw, dai ni jang daw dan la mu. Ngai hte nye a nta masha ni chyawm gaw dai Madu hpe nawku daw jau na ga ai law,” ngu nna tsun wu ai.

1 SAMUELA 15:24

Shawlu gaw, “Rai sa, ngai shut kau ni ai law; ngai gaw dai Madu a hkang da ai ga hte na a matsun maroi ga ni hpe n madat kau se ai. Ngai gaw nye a masha ni hpe hkrit we ai majaw shanhte ra ai hku galaw kau shangun se ai.

1 SAMUELA 15:9

Rai ti mung, Shawlu hte shi a masha ni gaw Agag a asak hte hpawn kaja htum ai sagu, dumsu, grau kaja htum ai dumsu ni, sagu kasha ni hte kaja ai arai hpa hpe mung n shaza kau ai sha jahkrung da ma ai; asung n shang ai hte manu n dan ai arai ni hpe chyu sha jahten shaza kau ma ai.