NEHEMIA 9:17 - Jinghpaw Common Language Bible 2009

¹⁷ Shanhte gaw ga n madat ma ai; shanhte gaw nang galaw ai amu yawng mayawng hpe malap kau ma ai; shanhte gaw nang galaw dan sai mauhpa amu ni hpe malap kau manu ai. Shanhte gaw gumrawng ai myit hte mayam tai nga ai Egutu mung de shanhte hpe woi nhtang sa wa na matu ningbaw langai san da ma ai. Rai ti mung nang gaw mara dat ya ai Karai Kasang rai nga ndai; nang gaw chyeju myit rawng nna tsaw ra ai hte hkam sharang lu ai wa rai nga ndai. Na a matsan dum ai myit gaw galu kaba nga nna; nang gaw shanhte hpe kau da nga ai n rai.

Jinghpaw Hanson Version Bible

¹⁷ shanhte a ka-ang e nang madun dan ai mauhpa amu hpe n dum nga ai sha, shanhte du shaja ai hte, gumlau let, mayam tai nga ai mung de nhtang wa na nga, hpyen du hpe san da ma ai. Nang chyawm gaw, yubak raw dat ai, matsan dum ai hte chyeju myit rawng ai, myit galu ai hte n-gaw nwai myit madun ai Karai Kasang rai nga nna, shanhte hpe kau da mu ai n rai.

NEHEMIA 9:17 ပူးပေါင်းရင်းမြစ်များ

1 HKAWHKAM 6:13

Nang gaw gap da ai ndai Nawku Htingnu hta nye a amyu masha ni hte rau nga nga na nngai; shanhte hpe galoi mung ngai kau da na nngai n rai,” ngu nna tsun wu ai.

1 HKAWHKAM 8:57

Anhte a kaji kawa ni hte rau shi nga nga ai zawn dai Madu anhte a Karai Kasang mung anhte hte rau anga nga u ga law; shi anhte hpe galoi mung n kau da ai hte n kabai kau nga u ga.

2 HKAWHKAM LABAU 36:13

Zedekia gaw Karai Kasang a mying ningsang hta shi hpe dagam nna sadi dung shangun ai Hkawhkam Nebuhkadneza hpe gumlau wu ai. Shi gaw myit malai lu nna dai Madu Israela a Karai Kasang hpang de kayin wa na matu ja ja ningdang wu ai.

EZRA 9:9

Anhte gaw mayam ni rai nga ga tim, nang gaw anhte hpe mayam amu hta kau da nga ndai n rai. Yuda mung hte Yerusalem mare hta shim lum ai lam mu tam la nhtawm matut nna shanu nga lu na ahkang mung, hten run mat sai na a Nawku Htingnu hpe bai gaw gap na matu mung, Persi hkawseng a jaw e nang anhte hpe myi man pa shangun nga nit dai.

NEHEMIA 9:31

Ti mung, na a matsan dum ai myit galu kaba nga ai majaw, nang shanhte hpe n kau da, n shamyit kau nga ndai. Nang gaw chyeju hte hpring nna matsan chye dum ai Karai Kasang rai nga a hka!

SHAKAWN KUNGDAWN 106:13

Rai ti mung, shanhte gaw shi galaw dan sai amu ni hpe alawan malap kau ya mu ai hte; shi a hpaji jaw ai lam ni hpe n la nga ai sha, galaw kau manu ai.

SHAKAWN KUNGDAWN 106:7

Egutu mung hta shanu nga ai anhte a kaji kawa ni gaw Karai Kasang a mauhpa magam amu ni hpe n chye na kau mu ai; shanhte hpe law law lang shi madun dan sai shi a tsaw ra myit hpe shanhte malap kau nna, shanhte gaw, dai Chyahtum Chyalai n-gun rawng ai Madu hpe pyi, dai Nawng Hkyen e gumlau ma ai.

SHAKAWN KUNGDAWN 130:4

Rai ti mung, nang anhte hpe mara raw dat ya nga ndai, dai majaw, anhte nang hpe hkrit hkungga ai hte madat mara hkan sa nga ga ai.

SHAKAWN KUNGDAWN 78:10

Shanhte gaw Karai Kasang hte ga shaka tawn da ai hpe n mazing da nga ma ai; shi a hkang da ai tara ni hpe hkan sa na matu, ningdang kau nga ma ai.

SHAKAWN KUNGDAWN 78:11

Shanhte gaw shi galaw dan sai magam amu ni hte shanhte mu yu sai mauhpa lamik kumla ni hpe malap kau manu ai.

SHAKAWN KUNGDAWN 78:38

Rai ti mung, Karai Kasang gaw shi a amyu masha ni hpe matsan dum nga ai; shi shanhte hpe n shamyit kau ai sha, shanhte a yubak hpe raw dat kau ya nu ai. Shi gaw shi a masin kahtet ai lam hpe law law lang shakawp da nna; shi a pawt sindawng ai hpe hkum shadang da nga ai.

SHAKAWN KUNGDAWN 86:15

Rai ti mung, Madu e, nang gaw tsaw ra matsan dum ai Karai Kasang rai nga ndai; nang gaw tut nawng e hkam sharang ai, matsan dum ai hte sadi sahka nga ai wa rai nga ndai.

SHAKAWN KUNGDAWN 86:5

Nang gaw anhte a ntsa e, mai kaja nga nna mara dat kau ya nga ndai; nang kaw akyu hpyi nga ai ni yawng a matu, na a dinggrin tsaw ra myit hpe hpring hpring tsup tsup hkam sha shangun nga ndai.

PRU MAT 32:9

Ndai amyu masha ni kade wa baw ja nga ma ai hpe ngai chye ni ai.

GA SHAGAWP 1:24

Ngai hpang de du sa na matu, nang hpe shaga ai hte saw lajin yu se ai rai tim, nang n madat ya ndai.

YEREMIA 18:15

Timung, nye a amyu masha ni ngai hpe malap kau manu ai; shanhte gaw hpara sumla ni hpe manam pyaw ai baw nat nawng ma ai. Shanhte gaw shanhte hkawm sa ang ai hkrun lam hta ahtu kataw mat ma ai; shanhte gaw moi na lam dingsa hta loi mi mung n hkan mat ma ai; shanhte gaw n san da ai lam ntsa hkan e she, hkawm nga ma ai.

YEREMIA 19:15

Chyahtum Chyalai N-gun Rawng ai dai Madu Israela a Karai Kasang gaw, “Nang adu ja nga ndai hte ngai tsun ai ga hpe n madat nga ndai majaw ngai galaw na ngu tsun da ni ai hte maren, ndai mare hta mung, makau grup yin na kahtawng shagu hta mung ari mahkra ngai shapraw na we ai,” ngu nna tsun nu ai.

YEREMIA 7:26

Rai tim, marai langai mi pyi madat ai n rai, dai lam hpe hpa zawn n nawn ya nga ma ai. Dai zawn madat ya na malai, nanhte gaw du grau ja wa ai hte nanhte a nji nwa ni hta grau nna pyi gumlau nga myit dai.

EZEKELA 5:6

Rai ti mung, Yerusalem gaw nye a hkang da ai ga hpe gumlau nna, kaga masha amyu baw ni hta grau nna n hkru n shawp nga ma ai hte shi a grup yin mungdan ni hta grau nna lale kau nga ai hpe madun dan nga nu ai. Yerusalem gaw nye a hkang da ai ga hpe n hkan hkraw ai hte nye a tara ni hpe shatup na matu ningdang kau nu ai.

Daniela 9:9

Anhte nang hpe gumlau kau saga tim, nang gaw matsan chye dum ai hte mara raw dat ya ai wa rai nga ndai.

YOELA 2:13

Nanhte a yawn hkyen ai hpe madun dan lu hkra nanhte a myit masin agrawp shadaw kau mu; hpun palawng gang je kau ai hte sha ram ai n rai,” ngu nna tsun wu ai. Dai Madu nanhte a Karai Kasang hpang de nhtang wa marit. Shi gaw matsan chye dum ai hte n-gaw n wai ai myit hpring hkra rawng nga ai; shi gaw myit galu kaba ai hte shi a ga sadi ni hpe shatup nga ai; shi gaw ari jaw na matu n rai, mara dat ya na matu, tut nawng jin jin rai nga ai wa rai nga ai.

JAW JAU 26:44

Rai ti mung shanhte a gumlau hpyen ni a mung hta naw nga nga yang, ngai gaw shanhte hpe rap rai kau da na n rai; shanhte hpe shamyit kau na nngai n rai. Shanhte hte nye a ga shaka gaw dai hte hta jahtum kau na rai nga a ni? Ngai gaw dai Madu shanhte a Karai Kasang rai nga nngai.

NAHUM 1:3

Dai Madu gaw loi loi hte masin pawt ai n rai, rai ti mung shi gaw daru magam n-gun rawng nga ai hte mara lu ai wa hpe ari n jaw ai sha galoi mung dat dat ai n rai. Dai Madu hkawm ai shara hta, laru ru nga ai; sumwi ni gaw shi a lagaw a npu na ga nhpu rai nga a hka!

BU HKAWM 14:11

Dai Madu gaw Mawshe hpe, “Ndai amyu masha ni galoi aten du hkra ngai hpe n hkap la na rai ma ta? Shanhte hpe ngai galaw dan sai mauhpa lamik kumla law law hpe mu nga ninglen ngai hpe kam sham na matu galoi aten du hkra shanhte ningdang nga na rai ma ta?

BU HKAWM 14:41

Rai ti mung Mawshe mahtang, “Dai rai yang nanhte hpa majaw dai Madu a ga hpe ya n madat nga myit ni? Nanhte awng dang lu na myit dai n rai!

BU HKAWM 16:14

Nang gaw anhte hpe ngamu ngamai ai mungdan de teng teng woi wa nga ndai n rai; anhte madu la na yi sun hkauna ni hte sabyi sun ni hpe mung jaw ndai n rai; dai rai nna ya mung nang anhte hpe masu hkalem na naw shakut nga ndai. An n sa lu na ga ai!,” ngu nna tsun wu ai.

KASA 7:39

“Rai ti mung, anhte a ji wa ni chyawm gaw, shi a ga hpe n madat ma ai. Shi hpe ndang kau nna Egutu mung de bai yu wa mayu ma ai.

ROMA 9:15

Hpa majaw nga yang, shi gaw, “Ngai matsan dum mayu ai wa hpe matsan dum na we ai; ngai chyeju galaw mayu ai wa hpe chyeju galaw na we ai,” nga nna Mawshe hpe tsun dan nu ai.

HEBRE 12:25

Nanhte gaw, dai mungga tsun ai wa hpe n madat ya ai sha ningdang kau ai lam n byin u ga, sadi nga mu. Ndai ga ntsa e shadum shahprang ai wa a ga hpe na la na ningdang kau ai ni yubak ari hta na n lawt lu ma ai, Dai rai nna, anhte gaw, Sumsing lamu kaw nna tsun ai wa hpe shingdu kayin kau ga yang gaw yubak ari kaw na anhte lawt na lam grau n nga mali ai.

1 SAMUELA 12:22

Dai Madu gaw kangka ai ga sadi shaka da nu ai hte maren, nanhte hpe shi a amyu masha majing shatai na, shi daw dan da nu ai majaw, shi nanhte hpe kau da na n rai.